Bolivia - Potosí, Sucre, Tarabuco

---

Bevori min bus uf Sucre gno ha, hani no en Zwüschehalt in Potosí gmacht. 3h weg vo Uyuni – 4050 Meterli über Meer und somit di höchscht glägenscht Stadt vode Wält! Potosí isch eigentli bekannt für sini Miine. Damit mer sich das chli besser chan vorstelle, wie das usgseht i sonre Miine, giz tusigi vo Reisebüros wo Toure det ine abütet. Mir isch das aber z unheimlich gsi! Mir händ Traveller Gschichte verzapft da ischsmer fascht opsi cho..s heg Chind wo schaffed die Miine…dLüüt werded so um di 30 Jahr alt wild Luft und dBedingige so schlächt seged..dMiinearbeiter gsäched aml usser a eimal ein Tag pro Wuche kei Tagesliecht…Es git sogar Tourabüter, womer chan Dynamit chaufe und die Miine zersprenge laah.. (de Guide vo mim Kolleg seg ganz stolz si woner akündet hät, dass sit noistem ali Lüüt defed Dynamit chaufe ohni spezielli Erlaubnis, au Chind, sgebi da kei Altersbegrenzig !!!???) Isch doch nöd normal so öbis.

Am einte Abig bini mitme Tessiner wohni im Hostel gfune ha go Znacht ässe. Det simmer also ghöcklet, i dem eigentlich gmüetliche Restaurant. Eigentlich, will: es isch en Film gloffe und zwar i einere Luutstärki und dezue ane ischs no en brutale Chriegsfilm gsi. Zudem händ d Chöch vom Ruum näbedra öpe die gliche Luutstärki die Top 10 misischte bolivianische Charts glost (und die sind nochli ohrebetäubender als z.B. I got a hangover – taio cruz J). Wils ja nonig en gnueg grosse Music-Film-Mix gsi isch für oisi Öhrli, sind no öpe 4 „Bands“ is Resti ineglatscht zum ihres glernte Stuck vorfüere und Gäld isammle. What a mix! Aber es isch amüsant gsi will niemer schiints gstört ha das zwüsche Schüssereie und Mitgsang us de Chuchi no e Liveband am Werk gsi isch 😊

Potosí hätmer aber im Allgemeine nöd sooo guet gfalle. Vilicht hani mi eifach nachli a di bolivianisch Kultur müese gwöhne J Mer fühlt sich wie öpe 100 Jahr VOR dere Wält, wi mirs ois gwöhnt sind. Ich han uf all Fäll kei Fotis gmacht vo dere höche Stadt, nur Söcke postet vonre traditionell akleidete Frau am Strasserand. Dänn bini witers uf Sucre.



Was für en Gegesatz! Die hübsch, wiss ikleidet Stadt hätmer en zünftig bessere Iidruck gmacht als di restliche Ort zBolivie woni bis ez zGsicht becho han. S hät immerhin flüssends und au warms Wasser gha 😉 Am erste Tag hani mi mit Lüüt usm Hostel „Wasi Masi“ agfründet und me händ ois ufd Söcke gmacht zum am Märt frischi Frücht go pflücke. Wow, yummie!

Mini zwei Kolleginne, dMaren und dSina vo Dütschland händ mi am nächste Namitag ufe Stadttour mitgno. En Bolivianer heg gfrögt, öber dene zwei Mädels öpis über Sucre und sini foif Millione Statue verzelle! Er seg am Tourismus studiere und mües sis Änglisch praktiziere. Isch doch herzig 😉 Will ich mich so dermasse für Gschicht intressier und was jewils die metallige, sich stolz präsentierende Herre bedütet, hani mi dene zweine agschlosse :P d Tour isch nöd mal so langwilig gsi und oise Guide hät sich tapfer gschlage. Nach öpe 1ehalb Stund (und de Hauptplatz vo Sucre isch nöd sooo gross und sgit nöd soo vil Statue(!!)) simmer no en Film go luege. Ich han scho dänkt swird intressant! De Film isch schwarz wiss dreit gsi, begleitet vo freakyger Music und debii ischs no ume uralti, schnulzigi Inkaliebi gange. Das isch zu viel des Guten gsi für Jenny’s Gemüt, drum hani de Film meh oder weniger durepennt! Nachem Film hämer ois dänn bedankt und sind rasch witers bevor er ois no hät wele mee verzele =)

Jede Sunntig häts in Tarabuco, das isch öpe e Stund mitme Microtaxi (Chliibus, wo erst fahrt wänner voll Lüüt isch) vo Sucre, en riesige Märt. sGanze Dorf wird jewils inen Märt umgwandlet! Alli Iiwohner präsentiered ihri hergstellte, vo Hand gmachte Tüecher, Schueh, Schmuck, Ässware etc. Die wo die Berge wohned, bringed ihri Waar mittels Eseli zum Dorfplatz und stelled ihri Sache uf.

De tag hät definitiv dezue bitreit, dasmer Bolivie biz meh as Härz gwachse isch! Die ville Farbe, die bruun brännte Lüüt mit ihrne Gsichtsusdrück, die Atmosphäre, aber au die Armuet. S isch uu idrücklich gsi und hät Lust gmacht, meh zgseh vo so chlinere bolivianische Ortschafte!

---

Photos

Früchte-Verkäuferin
Ich han si gfrögt, wie si aml det hindere chund...si schuffled sich eifach de Wäg frei hätsi mer g antwortet. Ich han dänn nöd gfrögt öb si das jedesmal macht, wänn si ufs WC muen ;)

Bon Appetit =)
...das hät mini Tischnachberin gässe! Oder ebe nur akaflet...

Rallye!
Ufm Heiwäg vo Tarabuco hämr plötzli müse ahalte. Grund: Hüt isch Auto-Rallye agseit! That's Bolivia!