¿Que onda, buey?

---

Am 3.Mai sind mir i den Nacht in Mexico City aacho.
De nögscht Tag hend mir gnutzt um s'Zentrum chli z'erkunde und di erschte echt mexicanische Tacos z'probiere. Am Samschtig hend mir e Tour gmacht, wo mir die wichtigschte religiöse Zentre us drü verschiedene Epoche bsuecht hend.

Tlatelolco: Tlatelolco isch im 14.Jht (Azteken) eis vo de wichtigschte Zeremonie-Zentre in Mesoamerika gsi, sowie au de gröscht Markt. 1521 hend d'Azteke uf dem Platz, under de Fuehrig vo Cuauhtémoc, eri letscht Schlacht verlore. 1609 hend d'Spanier uf d'Ueberreschte vom Zentrum d'Kirche Templo de Santiago baut. Drum wird hüt de Platz "Plaza de las 3 Culturas" gnennt. 2. Oktober 1968 het churz vor Beginn vo de Olympische Spiel en Studenteufstand stattgfunde, wo dur d'Regierig bluetig niedergschlage worde isch. Offiziell hets 30 Tote, inoffiziell abo 300-400 Tote geh.

Basilica de Guadalupe: D'Basilica de Guadalupe isch s'wichtigscht katholische Zentrum in ganz Latinamerika. Ufem Areal stönd 5 Basilike wo alli de Virgen Guadalupe gwidmet sind. A dene 5 Plätz wo d'Basilike jewils stönd isch d'Virgen am Juan Diego erschune. Täglich pilgeret tuusigi vo Gläubige döt ane, die letschte Meter uf de Chnü.

Teotihuacán: Teotihuacánkultur kennt mer hüt als di gröscht pre-aztekisch Kultur in Mesoamerika. Sie sind über 2/3 vo Mexico, Guatamala, Belize und Teil vo Honduras und El Salvador usbreitet gsi.Teotihuacán di gröscht vorkolonial Stadt in Mexico. Hüt cha me devo no s'Zeremoniezentrum besichtige, wo abo zum gröschte Teil rekonstuiert worde isch. Ufem Areal stönd zwei bedütendi Pyramide: D'pirámide de la luna stot ganz am nördliche .End vo de Calzada de los Muertos, enere lange Stross, wo sich durs ganze Zentrum ziet. Vo ere het mo de schönscht Überblick über d'Ruine. D'pirámide del sol isch di 3.gröscht und di 2.höchscht Pyramide uf de Welt. 248 Stegetritt hend mir erklomme zum ufecho. Di 3. wichtig Sehenswürdigkeit in Teotihuacán isch de Templo de Quetzalcóatl (Quetzal=Vogel, Cóatl=Schlange). Er isch mit Steichöpf dekoriert, wo jewils gfiedereti Schlange darstelled.

Am Sunntig sind mir in Coyoacán gsi, hend döt s'Frida Museum, s'Casa Azul, bsuecht und de Rescht vom Tag ufem Markt verbrocht. Am Mentigmittag hend mir en Bus noch Oaxaca gnoh.

Oaxaca isch es Wohlfühlstädtli, farbi, herzig mit guetem Esse vom Markt. I üsne zwei Täg döt sind mir vorallem echli dur Städtli gwanderet und hend möglischt vil iheimisches Esse probiert. Nur d'Heugümper hend mir wegloh. Denn hemmer no üsen lang ghegte Wunsch wohr gmacht und sind ad Küschte gfahre. Mir hend, wie ir eu chönd vorstelle, zwei chilligi Täg am Meer gnosse. Widomol: esse, schlofe, lese, bade und trinke.

---

Photos

basilica de Guadalupe
da isch die alt Basilika. Weg em schlammige Untergrund wird sie nur no wenigi Johr stoh.

Comments

[Gaby]

Ä herzlichs Dankeschön
Äs isch än Gnuss gsi mit eu dur Südamerika und Mexico z'reise. Die vielä Föteli und usführlichä Schilderigä hend lebhafti Iidrück henderlo. Dankeschön und bis bald in Zürich.

[Simone]

Au ich säg Dankä
Hallo Zämä, auch ich tuä mich am Dank vo dä Gaby herzlich aschlüssä, denn es hät immer wider freud gmacht Euri Idräg und Bilder z'läsä und azluägä. Ha mi no gfogät ob Ihr au a dem Kunschtwärkt mitgmacht hend in Mexico, gäbäts doch zuä, Ihr hend das doch planät gha :-) immer diä Nacktfotänä, aber diä hend Ihr nöd inä gstellt :-), es isch ebä zur glichä Zit, won Ihr döttä gsi sind, dä Fotograf bzw. Künstler wo nackti Menschämassänä fotografiert in Mexico gsi :-)) Södeli, jetzt wünsch ich Eu schöni reschtlichi Täg, gnüssäts und bis am Samschtig am Flughafä Sonnigi Grüäss Simone

[Agi]

hei cho
Bald isch die Reis au för üs z'end. Es isch interessant gsi, eu vo di hei us z'begleite. Distanz isch wit gsi und doch sind mer immer bi eu gsi - in gedanke oder ebä übers internet. Mer wünsched eu än guete Heiflug und bis am Samstigobig am Flughafe..