Hänge-Mate in Bs.As.

---

A: Artesania (Kunsthandwerk: Leder, Silber, Stei, Alpaca, Mategschir etc.)

B: La Boca (Viertel, schöni farbigi Hüsli, aber extrem turistisch, mega ufdringlichi Vochäufer)

C: Calor (absolute Smalltalkthema, es isch glich heiss wie in Eldorado)

D: Diebe (bis jetzt sind üs no gar kei begegnet)

E: El Balcon (am Sunntigobig simer mit em Kurt und dä Heidi sletscht mol go esse, in ä herzigs Restaurant in San Telmo inklusive Tangoshow)

F: Flohmarkt (än riesige Flohmarkt uf dä Plaza Dorrego am Sunntig in San Telmo, viel Ramsch aber uh charmant)

G: Ganz tolli Bar (wenn ihr mol in Bs.As. sind den müend ihr unbedingt is Milion i dä Avd. Parana en Cocktail go schlüerfe. Lecker und für üs priswert. Bar und Restaurant erstrickt sich über mehreri "Wohnige" imnä alt ehrwürdige Hus im Kolonialstil.)

H: Heladoooooo (Marktschrei vo de Glacevochäufer und sbeschte Glace vo dä Welt hend mir am Sunntig in San Telmo im el Piave gässe)

I: Israelis (do gits wohrschindlich meh vo dene als in Israel, Shalom Sharon!, langsam wirds dä Sabrina unheimlich es werded immer meh)

J: Jardin Botanico (schöne Park in Palermo)

K: Kino (am Mentigobig simer für 3 Franke BABEL go luege)

L: Lavalle (fuessgängerfründlichi Ichaufsstross)

M: Madres de la Plaza de Mayo (mer hends jo eigentlich scho gwüsst, aber wo mer den am Donschtig bi dä "Demonstration" gsi sind, sind mer den doch überrascht und entüscht gsi wie wenig das da no bedütet und dass es eigentlich nur no ä Show für Turistä isch)

N: no meh Israelis

O: Omnibus (unheimlich geistreiche Filme, mit viel Liebe serviertes Essen, angenehme Temperatur, bequeme Sitze, dies alles gibt es zugegebenermasen im Überlandbus von Misiones nach Buenos Aires nur in begrenzten Mengen.)

P: Palermo (sViertel wo üs am beschte gfallt mit vielne Jungdesignerläde, herzige cool
gstaltete Hüser und Kafis, viel grüe, eifoch uh agnehm zum hänge)

Q: Quilmes (Bier, trinked alli in Literfläsche)

R: Recoleta (Friedhof vo dä Riche, au vo dä Evita. Am Mentig simer dur die schö gstaltete Mausolegasse spaziert)

S: Slums (Wo mer mit em Zug zu dä Elvira usägfahre sind, simer direkt noch em Retiro (Bahnhof) mit riesige Armut konfrontiert worde)

T: Terere (chalte Mate, uh friedlich zum duse uf de Dachterrase sitze und trinke)

U: Urbano Hostel (üses Dihei für 10 Täg, befindet sich im 6.Stock und het ä herrlichi Dachterrase)

V: Viecher und Verkehr (da sind die zwei gröschte Problem, wo mir demit z'kämpfä hend)

W: Wandmalereien (öb im Hostel oder dussä uf dä Stross, in Bs.As. simer scho uf Sprüch, Zeichnige, Graffitis gstossä)

X: Xtuusig Israelis

Y: Yerba (Matekraut)

Z: Zug (oder besser subte (Metro), d Linie A isch au wenns heiss isch fahrenswert. Well ihri Holzwagons no a vergangeni Ziitä erinnered.)

---

Comments

[Tamara]

Hola
Hola, ich find eui Siite wahnsinnig spannend. Ich hoff eu gfallts guet und hey Barbara chum bald wieder, ich brüchi Personal--smile.

[Simone]

Salutti Zämä, also uf därä Terrassä wür ichs mir au guät go lo :-) aber wiä isch jetzt da nomol mit dä Israelis gsi :-))))) Äs macht immer wiedere riesigä Spass Eunä verzelligä Zeilä für Zeilä z'folgä :-) bis zu Eurem nächschtä Itrag, freu mi scho

[Andrea]

Holà Chicas
Eui Siite isch jo würkli super. Uf so warmi Temperature chömed mer im Moment leider nöd. Nur i üsem Wintergarte hets 30 Grad. Mue halt döt ine mini Feri gnüsse. Wenn mer euri Reisebricht so läst, chunt mer richig Fernweh über........ Wünsche eu uf jede Fall e ganz e gueti Ziit uns gnüsseds.

[Agi]

Souvenir
Di erschte Ikäuf vo Bs. As. sind scho dihei acho. 4 Kilo Mate, Täschli, Schue, än Gurt mit änerä wunderschöna Schnalle, T-Shirt. Und das noch erst drü Wuchä reisä. I glaub, mer müend den abaue, wenn ihr drei Ende Mai mit äm gfülltä Rucksack wieder hei chömed. Machets guet und viel Spass.

[Jennifer]

Schweiz?
Ist ja irre, dieser Dialekt. Das man so spricht, ist mir bekannt, aber in Schriftform habe ich das noch niemals gelesen. Sehr unterhaltsam :), aber nur zu verstehen, wenn man es sich laut vorliest, als Norddeutsche.