Colonia, Uruguay – Nüüt für schwachi Mäge!

---

Eimal meh hät min Handywecker (Hot Chocolate – You sexy thing!) vo mim Papi sim alte Mobiltelifon gschället, a dem Tag hämmer müse früeh us de Fädere gumpe zum oises Tagesziil erreiche.

Was für es hübsches Städtli. Colonia schiint gnau so wies tönt. Chlii, ruig, vil Wind. Find ich uf all Fäll =) Vo Buenos Aires gits täglich e Fähre und inre Stund ischmer scho in Uruguay, Colonia. Eini devo händ dLaura, de Florian, Francois, Mattheo und ich ois gschnappt. Da ich mit vier Franzose unterwägs gsi bi, hani mi zünftig müse is Füdli chlüübe, dasi die Cheibe verstah! 😉 aber ich find das tiptop! De Sprachmix zwüsche änglisch, spanisch, französisch und dütsch isch no ganz amüsant..ich forme sogar Sätzli mit allne Sprache drin!

De Tag in Colonia hämmer más o menos (= meh oder weniger, übrigens schiint das de beliebtischti Usdruck z Argentinie zsii), ruig verbracht. In Colonia gitz nöd vil Action, usser de Sturm wo ois de Namitag dur begleitet hät. Isch na cheibe nassi Aglägeheit worde! Drum simmer ali froh gsi womer wider uf oisi Fähre hei händ defe. Aso..ich ha scho vorgaahnt was jetzt chund: e holprigi Schiff-fahrt hei. Schifffahrt, Sturm und Jenny, das git kein guete Mix hani dänkt!

Tja. Scho nach de erste 5 Minute händ d Schiff-Stewardesse agfange Plastic-Säckli verteile. Aber sogar de Teil hani scho verpasst, has demfall als erschts i Richtig WC gschafft! S WC isch dänn au min persönliche Boat-Attendant gsi für die Fahrt. No following comments 😊

---

Photos

Pflanzen-Auto?
Ich glaub d Uruguayaner händs Prinzip vo ökologischem Fahre falsch verstande!

impressions..
Die zwei det sind imfall Chübel und nöd Grill, so win ichs zersch gmeint han :)