Advertisement
Published: June 18th 2013
Än riise Knuddel hät sich dazumal, am 18. Mai am Abig in Quito, Ortsziit 18.54 ereignet, wo äntli es urbekannts Gsicht mitme grooosse Smile is Bluehouse Hostal in Quito inezwatschle cho isch, ereignet. Siehe da, Conny my bäscht friend vo de Schwiiz chund mi fü di negste drüü Wuche go begleite!!
In Quito händ dConny und ich ois zersch mal 3 Täg Ziit gno, zum vode letschte 4 Mönet zbrichte! Näbedbi hämer en huufe Café trunke und en Plan gmacht, wasmer die folgende 3 Wuche wänd gseh vo Ecuador. Ächli id Berge go wandere, Laguune go besichtige, es paar gmüetlichi Städtrundgäng mache, die wunderschöne Galápagos Insle go bsueche, und zum Schluss dKüste go unsicher mache.
Topmotiviert simmer am nägste Tag loos und es paar vom Hostel sind sponti gad au mitcho. Oise ersti Stopp isch Latacunga, respektiiv schline Örtli namens Lasso gsi, en Ort südlich vo Quito und en guete Startpunkt zum uf de Cotopaxi uechlättere. De Cotopaxi isch mit sine 5 897müM de zweitgrössti, aktivi Vulkan uf de Wält. Wilmer uf eigni Fust zum Iigang vom Parque Cotopaxi händ wele ga, hämer ois en lokale Bus gschnappt. De Chauffeur und ich händ ois irgendwie missverstande, drum häter ois
eifach mal uf de Autobahn, näbetere Tafle mitme Pfiil wo azeigt dases 7km ine anderi Richtig zum Cotopaxi gäch, usm Bus uusstiige lah! Määässssi! Aber vo dem chline Bagatell hämmir ois natürli nöd abwimmle lah und händ ois en Guide gmietet, wo ois mit sim 4x4 Chlapf vo 2 000 uf 4 500müm uegfrääst hät. Prompt hät de Conny ihres Chöpfli, , wo sich dHöchene vo Ecuador nani so gwöhnt gsi isch, agfange tunnere… Mer händ also uf 4 500müM Halt gmacht und sind ab det zFuess witer. Dankem schöne Wätter hämer sone supperklari Ussicht gha! Niiicht…grusig benäblet ischs gsi 😉 aber mi hän ois tapfer gschlage und sind bis is erste „Camp“ und no wiiter gwanderet, wos zersch mal e heissi Schoggi gee hät zum Chräft gwünne! Det mached au au die Lüüt Halt, wo ganz uf de Cotopaxigipfel uechräsmed. Wortwörtlich chräsmed, wils jede zähti Schritt öpe müend e Pause ilegge wäg de Höchi und de Asträngig!
Nachdem mer ois widr uf de Wäg abe gmacht händ, wos ächli meh Läbe als nur vulkanischi Gstei hät, simer all froh gsi, e heissi Duschi chöne znee und ois amne Teeli chi ufzwärme. Währendem Teeli-Schlürf hämmer plant, wies witer gad
mit oisem Abentüür-trekkli.
Dä Quilotoa-Loop isch als nägschts uf de To-Do List gstande. Will Conny und ich ois nüt witer debi dänkt händ, hämer agnooh, das die schön Quilotoa-Lagune en guete, 3stündige Spaziergang (!!) seg…ja denkste! Die Wägli sind zum Teil soo zbewandere gsi, dases links und rächts fadegrad 400m id Tüüfi gange isch! Natürli isches sehr beruigend gsi, das oise Guide ois no verzelt hät, das ersch gad es Schwiizer Päärli ums Läbe cho isch wils zwenig vorsichtig gsi seged und id Tüfi gstürzt seged…aber dLagune ischs minere Meinig nah definitiv wert gsi:
1. Wils meeega schön ruig isch und fasch kei anderi Mänsche hät (usser es paar Chind wo nach öpisem zknabbere bättled händ… hanene dänn mini letzte Manís (Erdnüssli) gschänkt 😉)
2. Wiedermal echli Sport duet jedem Füdli guet und
3. Mi händ einigermasse guets Wätter und somit e gueti Ussicht gha!
Am Abig isch oises gmixte Reisetrüppli vo Schwizer und em Foo (our english guy) ums Füür umeghöcklet, wieder eimal meeh am Tee und Kafi schlürfe und ois am ufwärme. In Quilotoa ischs sganz Jahr sehr frisch, hanich mir vome det ane usgwanderete Holländer erkläre lah. Während de gmüetliche Rundi vorem
Cheminee hani wele es Foti schüsse. Chum händs di drü Chind vom Bsitzer vo dem Hotel wo mer gsi sind gseh, händs mi nüm in Rue lah vor luuter Gwunder! Ich glaub das isch für die Kids i dem Moment DAS Spilzüg vode Wält gsi J ich hanene probiert z erchläre, wie mer e Camera brucht, aber si händ eifach nu wele drufloos klicke…dank ihne hani dän öpe e viertel Stund brucht zum en huufe verschwumeni und suschtigi unbruchbari Föteli zlösche 😉
Nach dene paar chalte Nächt in Cotopaxi und Quilotoa hämer ois definitiv entschide, anen wärmere Ort in Ecuador zgah. Baños häts nägschti Örtli gheisse womer agstüürt händ. Mitm Bus simmer öpe 4h in Süde abefahre, bismer i dem chline Städtli mit vil Charme und Touriste itroffe sind. Mit oisne 15kg Backpacks ischs ufd Suechi gange nachme priiswertige Hostel. Das isch immer de aschträngenschti Teil: wämmer uu warm agleit vom einte chalte Ort, inen andere warme, typige Ort reist und denn no muen nach 4h Bus fahre im heisse Wätter de schweri Rucksack umeschleppe zum Hostels abklappere (wämer sich nöd im Voruus uf Hostelworld.com informiert natürli 😉)
Mi händ dänn aber relativ bald eis gfunde wo allne
(am Foo, de Sandra, oisi schwiizer Kollegin, de Conny und mir) gfalle hät. S Highlight vo dem Reisetägli isch aber dänn definitiv de Znacht gsi. Will dConny nach 5 Täg Ferie in Ecuador und ich natürli sowieso nach ächli meh Ziit, de Chäs so fescht vermisst händ, hämmer ois es Fondue gönnt ime Schwiizer Resti zmizzt in Baños, betribe vomne Davoser. Und ich muen säge..es isch sbeste gsi sit langem wohni gässe ha uf minre Südamerika Reis =)))
In Baños hämmers relativ gmüetli gnoo und wenig unternoo, usser ois dBüüch vollgschlage mit allgemein guetem Ässe in ganz Baños! Sogar uf de Strass händs eim Dessert abotte, under anderem au Space-Cookies, womer vilicht nöd sött voreme Polizist knabbere 😉
Galápagos – El sueño único, Montañita y Cuenca
Nach es paar Täg in Baños gnüsse, hämer ois uf de Wäg nach Guayaquil gmacht. Wils so guet i oises Wättergmisch vo Minustemperature bis + 30 typige Grad inepasst hät, simmer ufde Busreis no inen Schneesturm inegrate! Was für Wächsel di ganz Ziit…das isch aber glaub eher öpis ussergwöhnlichs gsi, will sogar di Iiheimische agfange händ Föteli schüsse vo dem iisige Wätterumschlag 😉
Guayaquil, e riesigi,
chläbrigi, unschöni Stadt wos stinkt und nöd vil ztue git. Usser de Flughafe bsueche zum uf die ussergwöhnlich Galápagos-Insle zflüüüüüüüüüüügge =) Wils es Problem ge hät zum online Flüg bueche simmer sponti am Morge früeh an Flughafe düüst idr Hoffnig, dases no es Plätzli hät im Flugi. De Usflug uf Galápagos isch leider nöd ganz billig gsi (nur de Flug 480 USD + Insleitritt 100 USD + Hoste & Co.), aber ich weiss jetzt scho dasi namal gang wils sich so fescht lohnt!
Mit riese Vorfreud, dases mit oisem sponti Flugticket klappet hät, hämer de Flight Attendant zuegluegt wisi zeigt wod Exit Usgäng und s Schwümmwestli zbediene sind, und sind churz drufabe loosgfloge uf Santa Cruz, di meistbewohnti Insle vo Galápagos gfloge.
Di nägste 8 Täg hämmer zimmil spontan gläbt..mer händ ois nämmli keine 5 tägige Toure aghänkt. Vil lieber hämmer vo Santa Cruz us Tagestoure gmacht, und dänn sponti entschide, öbmer uf einere Insle e Nacht wänd blibe, wils doch vo Insle zu Insle öpe 3h Bootfahre sind. DConny und ich sind uf 3 Insle gsi vode Galápagos: Isla Isabela, Isla Santa Cruz und d Isla San Cristóbal, wos ois bsunders gfalle hät… dSeeleue lieged überall am
Hafe ume, mer muess ufpasse dasmer nöd ufsi trampet! Falls mer ine jedoch znöch chunt, fangeds ah mötzle, was uu lustig tönt 😉
Abgseh devo das Galápagos allgemein mis Hightlight vo minre Reis isch, werded mer zwei Täg bsunders in Erinnerig bliibe:
Snorkelling in San Cristóbal
Mer händ a dem Tag 3mal dMöglichkeit gha, zum go schnorchle. De erschti Schnorchelrundgang isch amene traumhafte Strand gsi, wos so vil Seeleue und Tortugas (Schildkrote) gha hät, dasmer nüm usem stuune und lache vor Freud cho isch! Das Gfühl, wän en Seeleu um dich umeschwümmt und dir zum Teil direkt id Auge luegt, isch unbeschriblich cool! Zudem sind all die Tier ja im Freie, also händs immer dMöglichkeit zum flüchte wänns sich nüm wohl fühled. In Galápagos schiined sich aber alli Tierli a Mänschenöchi gwöht zsii 😉 Natürli sötmers nöd alange…
De zweit Schnorch isch bimne riesige Stei namens Leon Dormido zmizzt im Meer gsi. Chum bini is Meer plumpst mit Schnorchel und Taucherbrülle hani fasch nöd chöne schnuufe wils 1. so chalt gsi isch und 2. will ich grad inen Schwarm verbiischwümmender Mantaroche cho bin! Die riise Tier mit irne elegange „Flügel“ und ewigslange Stachel…hani aso
schochi Angst gha zerscht! Inzwüsche findis aber eine vode schönste, elegantischte Tierart unter Wasser… Nachdem ich nach dem Schwarm scho deeply impressed gsi bin vo dere galapagosanische Unterwasserwält, hät oises Schnorchelgrüppli gad nomee Glück gha und näbed normale Haie no öpe 4 Hammerhaie unter ois dureschwümme gseh. Spötistens dänn hani mi gfrögt, öb das eigentli nöd gföhrlich isch wo mir da mached!! Oise Guide hät dezue nu gmeint, was ich da eigentli heg, die seged doch Vegetarier und es hegi usserdem rund um Galápagos gnueg zhabbere für alli Tier, si hegets also nöd nötig Touriste azknabbere 😉
Bim letzte Schnöörchi simer au anen schöne Strand anegfahre mit oisem super Touriboot. Det ischs Wasser ganz durchsichtig gsi und volle Baby-Seeleue…=) Die händ nüt als Seich im Chopf und sind so verspillt! De eint hät a minere Flosse agfange umebisse und zie, winen Hund! Und en Australier hät sone Mini-Unterwasserkamera debii gha wo farbig glüchtet hät. Die hät am Seeleu bsunders guet gfale, er hät si gad gstibizzt und isch demit devoo gschwumme 😉 Nachme Ziitli hätersi dänn widr us sim Seeleue Muul useglah und de Australier isch wieder happy gsi!
Diving in North Seymour
Szweite riesige
Hightlight, woni definitiv nöd sletschtmal gmacht han i mim Läbe isch de Tauchgang gsi. Nach langem schwätze, hani dConny chöne überzüge, mit mir go Tauche ga. Jupiii! Min Tauchinstructor hät mir gseit, wohnich sTauchbrevet im chalte Zürisee mal gmacht han, ich söl unnnnnnnnnnbedingt uf Galápagos go tauche, fallsich mal dMöglichkeit heg. De Tipp gibi allne wiiter, s isch e traumhafti Sach!
De Tauchgang hämmer am letzte Tag vor oisere Abreis wieder zrugg nach Stinki-Guayaquil respektiv uf direktem Weg ufs bekannte strandige Montañita gmacht. Wämmer Iiheimische verzellt mer gäch uf Montañita, chun zersch mal es ahaaa fiestafiesta zrugg! Eigentli isch nöd grad Hochsaison gsi, aber glich de Bär los gsi, bsunders natürli am Abig. Au wänns e ziemlich touristischi Aglägeheit isch, das chline Strand-Dörfli, häts irgendwie doch na Charme. Am Abig packed dHippies ihr Können uf de Strasse us und zeiget ihri Trick mit Füürspiel, HackieSackies oder spieled Lieder und singed im Züüg ume. Am Tag chammer de fitzige Surfers zueluege wies über dWälle ineriited!
Nach es paar wenige Täg umehänge in Montañita hämer ois na di letzti Stadt vor de Conny ihrere Heireis wele agügsle. Japp, es sind tatsächli scho 3 Wuche wi im Nuuu verbigfloge.
Time flies when you’re having fun, and we definitely did =) Danke Conny für dis Bsüechli und die lustig Ziit! <3
Advertisement
Tot: 0.091s; Tpl: 0.013s; cc: 15; qc: 59; dbt: 0.0568s; 1; m:domysql w:travelblog (10.17.0.13); sld: 1;
; mem: 1.2mb
