Perúanische Handshake mit Cusco, Macchu Picchu, Huacachina, Máncora

---

Nach dem schöne Insle-Usflug ufm Titicacasee bini Richtig Peru gstüüret. Zersch uf Cusco, sone schöni Stadt! Nach langer Ziit in Bolivie, wohni usser Sucre nie es schöns, pflägts Städtli atroffe ha, ääääntli mal es Prachtsexemplar namens Cusco. Am morge am 5i bini mitm Bus am Cusco-Terminal achoo und lueg au daa, chund mer es bekannts Gsichtli entgäge! Dä holländisch Daan, wohni im Jungle in Bolivie känneglernt ha. Dasmer Lüüt immer wieder atrifft, wo i di gliich Richtig reised, isch jedoch kein Zuefall…all händ meh oder weniger di gliich Route im Chopf =)

So hani mitm Daan sTaxi und es Hostelzimmer teilt und am nächste Morge hämmer plant, wimer de Macchu Picchu uf eigni Fuust chönd bechlättere. Das hämmer mit ä biz Chopfweh gmacht, will am Abig vorher „Queensday“ in Holland gfiirt worde isch! Au wänns es holländischs Fäscht gsi isch, händs die partyfreudige Ängländer natürli nöd chöne lah, nur mit Tigerunterwösch uf de Bar umeztanze! 😉 haha, cheers!

Halloooo Mr. Picchu! In Aguas Calientes, s Dorf wo am nöchste bim Machhu Picchu liit hämer ois e günstigi Unterkunft gschnappt und sind am erste Tag zersch mal für es Ziitli ime Thermalbad go relaxe bevormer ois uf de Wäg zude Inkastätte gmacht händ. Ufm Wäg vo Cusco uf Aguas Calientes hämer ois nämmli nach 7h Holperfahrt no verloffe will sich en uralte Iiheimische en Witz erlaubt hät und ois de falsch Wäg uf Aguas Calientes zeigt hät!! So beliebt sind Touriste...Drum simmer öpe 4 statt 2h am wandere gsi (bim falsche Wäg häts sich übrigens um 45 Grad Stiigig ghandlet und dezue ischs no en Heuwäg gsi!) Mässssssi alte Chnuschti!

Am 4i am Morge hät de Wecker gschället zum die steili Steistägge zum Macchu Picchu uechräsme. Phuu…öpe 1e halb duruf ischs gange, und ich bin verruckt worde wili das so ungern gmacht ha! Wandere mit duruf und durab isch eifach nöd mis Ding. Lieber echli mitm Benny (oise Hundi) im Züri Oberland umespaziere 😉 Schlussendli häts sich natürli scho glohnt und mer sind mit schönem Wätter und gueter Ussicht über de Macchu Picchu belohnt worde. Wili aber scho soo vil Fotis und Bilder vo dere Touristeattraktion zGsicht becho ha, häts mi gar nüm so umghaue wie erwartet… aber jänu, de Macchu Picchu isch eifach es MUSS vo Perú 😉

Nachdem de Daan und ich wieder zrugg in Cusco ime Hostel übernachtet, aber sauschlächt gschlafe händ, händ sich oisi Wäg trännt und ich hami uf de Wäg uf Lima, de Hauptstadt vo Perú gmacht. Sauschlächt gschlafe, wilmer uu müed gsi sind vom Macchu und wilmer anschiinend mitme Drogedealer im gliche Dorm übernachtet händ. Di ganz Nacht dure sind Lüüt is Zimmer inechoo, händ dem Typ Gäld gee und sind nachme Sniff wieder verschwunde! Schad hani gfunde und gschockt bini gsi, obwohls nöd serschtmal isch wo sich Travellers so hemmigslos vor mir oder andere Lüüt e Linie zoge händ. Hami aber nöd wele drimische, bin dänn am negschte Tag abgreist und froh gsi, no ali mini siebe Sache zha.

Nachme lange Schwätz mitere peruanische Dame vo Trujillo, isch äntli oise Bus vo „Cruz del Sur“ ready to rumble gsi. Das isch eini vode beste Langstreckebuslinie vo Südamerika und ich muen säge, was die a Service büütet isch besser als flüge (usser mer flügt mit de SWISS natürli😉)! Eine isch mit de Kamera im Bus umegloffe und hät all Lüüt mit de Sitznummere gfilmt, im Fall dases en Unfall git. Zuesätzlich händs au de Chauffeur gfilmt während dem er de Alkohol-Blas-Test gmacht hät. Da chasch nüt me säge! Nach 21h Busfahre hani mi spontan entschide, vor Lima uszstige und zwar in Huacachina, es chlises Städtli umgee vo Sand, Sand und Sand. Siehe Fotos! Meh als en Tagesusflug id Wüesti und go Sandboarde giz det nöd zmache 😉 aber definitiv lohnenswert!

Drum ischs bald wiiters uf Máncora, Nordperu gange. Han nachli meh Sand- und Strandfeeling bruucht 😉 Im Bus hani mit zwei finnische Girls agfange pläuderle und denn hämer ois gad zämme es Hostelzimmer gschnappt. Näbed surfe, am Strand relaxe, frische Kokosnüss trinke/esse, us fertig gässne Kokosnüss brasilianischi Bikinis bastle, und mich ufs kommende Weekend freue, will mini best Kollegin dConny in Quito, Ecuador achunt, hani in Máncora nöd vil agstellt.

Hello and Byebye Perú, dich hani echli schnäll abklapperet! Bisch aber es schöns, ich chume bald wieder verbii. Tschiääu!

---

Photos

Hello Macchu Pichu Llama!
...nice bum!

In the sandbuggy...
..going sandboarding!

Máncora
...Surf Camp Hostel =)

Surf Crew
..with the two finnish Girls Ina and Aini

Hanging around at the beeeeeeeeach =)
...and eating fresh coconut!