99 Stunden Santiago

---

03.03.2006 06:20 Ankunft Nachtbus am Santiago Busterminal
Ich bin zämme mit em Andi im Nachtbus 10 Stund vo Pucón dirägt nach Santiago de Chile - Capital gfahre. Noch e paar unterhaltsame Drinks am Strand vo Pucón hän mirs im Bus sauglatt gha - e bitz zum Widerwille vom Busschoför - anschinend dörf me in Chile in de Langstreckebüs kei Bier trinke. Jänu, das hän mir jo nid chönne wüsse, somos turistas...
Umso weniger hän mir denn drfür chönne schloofe - mehr als 2Stund sind in däre Nacht nid drin gsi
Dr Andi isch anderthalb Stund schpöter nach La Serena witergfahre. Mir händ am Busterminal imene Stehcafé e café cortado grande gschlürft und denn han ich mich uf die 7i uf d Suech nachemene Hostel gmacht.

03.03.2006 08:30 Sightseeing
Han im Barrio Brasil es Hostel gfunde, mini Sache deponiert und e usgiebigi Duschi gnoh. Denn ab in d Stadt. Bi mol durchs Zentrum gschlenderert und uf dr Cerro Santa Lucia gange, e kleine Hügel zmitzt im Zentrum wo me e gueti Ussicht über d Stadt Stadt het.

03.03.2006 11:00 Jä nei - dr Chris
Ich will mich grad uf e Wäg zrugg ins Hostel mache, do triff ich uf em Fuessgängerstreife vis-a-vis vo dr Universidad de Chile uf dr Chris us Dänemark wo mit mir uf em Vulkan gsi isch. het grad mitere Fründin abgmacht und meint, ich söll doch schnäll mitkoh.

03.03.2006 12:00 Mit Gigia im Auto quer durch Santiago
D Gigia fahrt mich zum Hostel zrugg, wo ich am 12 kurz mis Zimmer bezieh muess. Unterwägs redet sie fascht ununterbroche und erklärt alli Strosse, Dänkmöler, Musee, Brunne, und eifach alles wo mir dra verbigfahre sind.

03.03.2006 14:00 Odontologische Fakultät der Universität von Santiago
Mir laufe per Zuefall an dr odontologische Fakultät verbi. D Gigia isch Zahnärztin und het dört studiert. Dr Chris und ich wärde grad durchdie ganzi Uni gfüehrt, in Praktikumssääl voll vo Zahnarztstüehl, d Kantine, d Studänte Ufenthaltsrüm - und natürlich wärde mir jedem vorgstellt wo uns übere Wäg lauft - Sightseeing beyond Lonely Planet

03.03.2006 15:00 El Museo historico de Santiago
Wieso nid a bitz Gschicht für e Afang. S Museo Historico de Santiago isch am Plaza de Armas, im ältischte Teil vo Santiago. D Gigia zeigt sich in Geduld, uns zue jedem Usstelligsgegestand d Gschicht z erlütere. Ha zwor nid d Hälfti verstande - ab und zue eifach mol nigge "Si. Entiendo" sunscht hät si alles nomol vo vorne neu erklärt.

03.03.2006 18:00 Los Cafés con piernas
E Bsunderheit in Santiago - sehr sehenswärt. Hinter de abdeckte Schiibe hets nur UV Liecht. Mann goht dört ab und zue go e Kaffi trinke währenddäm dass d Fraue am schoppe sind.

03.03.2006 21:00 Wohnungseinweihungsparty bei Macarena
D Macarena isch e Fründin vo dr Gigia, au Zahnärztin. D Gigia het uns zwei kurzum au iglade. D Chicas sige fürs ässe verantwortlich und d chicos würde drfür dr Alkohol mitbringe. Ha e Fläsche dunkle Havanna Rum kauft und Cola - näbe Pisco mit Cola (Picsola) isch Cuba libre DAS Getränk in Santiago (Oli, das wär öbis für dich;-) Dr Rum isch denn au nach ca 20 Minute läär gsi - zum Glück isch es nid die einzig Fläsche gsi wo dr Wäg an die Fiesta gfunde het... Schpöter isch au no dr Pepe iglade worde. Die händ sich zwor au nid kennt, aber schliesslig isch jo e Amigo (Pepe) vomene Amigo (ich) vonere Amiga (Gigia) au e Amigo vo eim (Macarena), isch doch logisch, oder nid?

04.03.2006 02:30 Feiern in Bellavista
Ha mich inzwüsche vo dr fiesta verabschieded und bi vomene ziemlig atrunkene (was är nie zuegäh hät)Kolumbianer zämme mit em Pepe nach Bellavista gfahre worde. Bellavista isch eins vo de Usgangsviertel vo Santiago. In dr Bar träffe mir uf 2 Chicas - die wärde vom Pepe ufgforderet zue uns übere an Tisch z sitze - - ich bin überrascht wie fliessend mi spanisch nach e paar drinks wärde cha. Schpöter gohts zämme witer in e Club - vamos a bailar...

04.03.2006 10:45 Aufstehen
Mi Wecker goht ab und mi Schädel brummt ziemlig vo geschter zoobe - s isch öbbe 5i worde bis ich im Hostel gsi bin. Ich erinnere mich dass dr Pepe gseit het, dass är mi am 11i im Hostel abhole will. Has Gfühl, dass ich nie im Läbe ufstoh könnt - dr Pepe kunnt wohrschinlig eh nid, är isch nämlig no länger bliibe. Doch schlagartig wird mir bewusst, dass är pünktlig wird dosi - so sind d Lüt do, wenn si öbis saage, denn mache sie das au. Ich stand also uf und zieh mich a. Ich bi dr letscht gsi vom 6er Zimmer wo heicho isch und dr erscht wo wieder ufstoht. Am 5 ab 11i - ich bi grad azooge - klopfts an dr Türe: s Zimmermeidli meint es würd an dr Reception öber uf mich warte.

04.03.2006 11:00 Cerro San Cristóbal
Mir sind zum Rodrigo heim gfahre und händ au ihn us em Bett gholt - är het nämlig no gar nid gwüsst das ich inzwüsche in Santiago bin. Egal, e viertel stund schpöter isch är au parat und mir fahre uf e 2. Husbärg vo Santiago: dr Cerro San Cristóbal (dä mit dr Jungfrau)

04.03.2006 14:00 Almuerozo bei Pepe
Zum Mittagässe sind mir bi dr Familie vom Pepe iglade. D Verhältnis wo si läbe sind öbbe ähnlich wie bi minere Hostfamily in Córdoba - e bitz eifacher als mir Mittelschichtler in dr Schwiz, aber es fählt eigentlich an nüt gravierendem. Vo Computer über Mikrowälle und Färnseh mit Videokonsole isch alles vorhande - eifach d Wohnrüm sind im Durchschnitt viel änger als bi uns.

04.03.2006 16:00 Shoppingmalls & Mercados Artesanal
Mir bueche eini vo vielne RIESIGE Shopping Malls in Santiago - drin isch me nümm in Südamerika. Könnt Paris si, oder London - Markeklamotte, Parfüm, Sportswear, Elektronik, Schmuck - we live in a globalised world! e Swatch koschtet umgrächnet zwüsche 100 und 200 Franke - dopplet so tür wie bi uns. Sackmässer (wo sehr belibet sind) au.

04.03.2006 21:00 Matrimonial - ein chilenischer Polterabend
E Unikolleg vom Pepe hürotet inere Wuche. Amigos vo Amigos sind au do Amigos. Me wird eifach mitgnoh. D Fiesta isch imene bessere Usseviertel vo Santiago. E schönes freistehends Eifamiliehus mit Garte und Pool. Es git Asado. Dr Oobe bliibt aber erstunlich zivilisiert - es isch eifach e fiesta nur mit chicos gsi.

05.03.2006 09:00 Ab in die Cordillera
Am Sunntig isch Santiago tot. Heiliger Tag! Mir göhn dohär e bitz us dr Stadt use in d Bärge. Us eme kleine Spaziergang sind denn allerdings stolzi 34km worde! Aber beidruckendi Bärglandschaft - und das nur e knappi Stund vo Santiago ewäg.

05.03.2006 20:00 Bei der Familie der Novia von Pepe eingeladen
Es git Chueche und Sandwich. Die Familie isch extrem neugierig und froge mir Löcher in Buch. "Soy ingeniero de software", "Soy soltero", "Estoy viajando solo". Wurum ich denn nid bi ihne wohne würd, s Hostel würd jo nur Gäld koschte, ich söll doch am beschte grad mini Sache go hole. Dr Pepe kennt mich scho bitz besser und klärt, dass ichs Hostel äbe scho zahlt heig, bevor ich öbis ha chönne sage.

05.03.2006 23:59 No ei Minute bis zum Moorgestraich
Ich ha mir vis-a-vis in dr Botilleria 2 Dose Bier kauft und sitz im Hostel im Internetruum vor em PC. Vor mir uf em Bildschirm dr Rümelinsplatz. D Clique sind scho igstande; d Larve a, d Kopfladärnli lüchte. Denn wirds ringsum dunkel. Moorgestraich, Vorwärts, Marsch! S Bild wird ruckig, d Leitig schiint grad e bitz überlaschtet z si. Ich bi elai im Ruum, aber wohrschinlig bin ich nid dr einzig wo die Bilder grad vo irgendwohär abrüefe duet. Ich nimm e Schlugg CRYSTAL Bier - das isch e anderi Wält - doch ich bin froh drfür, dass ich beidi kennelerne cha.

06.03.2006 17:00 Ein Tag Off
Dr Pepe schafft und Rodrigo isch an dr Uni. Mir händ zoobe nomol abgmacht, zum zämme go ässe. Ich ha druf bestande, dass ich si emol will ilaade. Dr Tag bin ich zämme mit em Thomas us Dütschland e bitz in dr Stadt gsi. Mir sind e bitz durch d Stadt gschlenderet und sind in Bellavista öbbis go ässe. Es duet zwüschedure wieder guet, mit ere us em gliche Kulturruum reede z könne, Erläbnis z reflektiere.
Aschliessend han ich mich im Internet in de "Paginas amarillas" vo Santiago uf d Suechi gmacht nach emene Restaurant mit schwizer Kuchi. Nach soviel chilenischer Kultur han ich mine beide Chilene zum Abschied au e mol e bitz öbis schwizerischs welle abiete. 2 Adrässe han i gfunde. Die erschti het nur no e Schild an dr Türe gha "Cerrado hasta noticia" - "Geschlossen bis auf weiteres". Bi dr zweite Adrässe bin ich denn fündig worde. E Argauerin wo vor ca 30 Joor usgwanderet und mitemene Peruaner verhürotet isch. Sie zeigt mir d charte und meint si cha uns alles abiete. Brotwurscht mit Röschti Käsfondue, Raclette, Zürigschnätzlets, usw.

06.03.2006 20:30 Kääsfondue im Walhalla
Mir sitze zu dritt vor eme Käsfondue. Die Beide händ kei Ahnig gha was das genau isch - händ aber gmeint si häge gärn Chäs. Ich erklär ihne wie me Fondue isst - mit Kirsch dünggle und so witer. Beidi sind ziemlig skeptisch. Em Pepe schiints aber ziemlig guet z schmegge. Dr Rodrigo meint aber nach eim Biss nur no "Uuuuhh!! Que fuerte! Muy, muy fuerte!!!! denn het är s Brot ohni Fondue gässe! Chilene (wie au Argentinier) ässe und trinke normalerwis äbe nie scharfi oder rezänti Sache und trinke au kei starke Alkohol pur und für ihn isch wohrschinlig scho dr Gschmagg vom Chäs und vom Kirsch too much gsi...
An de Wänd hets überall bilder und Karte vo dr Schwiz gha, was die beide Chilene sehr interessiert het. Zum Abschluss het dr Wirt uns 2 grossi Poster mitgäh 2sitig mit vielne Bilder und Erklärige über d Schwiz in castellano. Die heig är vo dr schiwzerische Botschaft becho, damit är de Gescht öbis cha mitgäh. E gueti Sach.

07.03.2006 09:20 Im Bus nach Valparaíso
Ich sitz im Bus nach Valparaíso. Hinter mir liege knapp 100 Stund Santiago. 100 Stund wo so intensiv gsi sind, dass ich die Erläbnis nonig ha chönne verarbeite. Ich fühl mich ziemlig erschöpft vo de letschte Täg - und e bitzli spür ich au no s Fondue vo geschter zoobe im Maage - dr Pepe und ich händ z zweit jo immerhin au 3 Portione vertilgt. Ich überleg mir, dass dr Pepe s jetzt grad no e bitz mehr spüüre wird - hehehe, e Erinnerig an d Schwiz ;-)

---

Photos

Santiago de Chile
The Virgen