Advertisement
Published: March 15th 2006
Edit Blog Post
Noch 2 gmüetlige Täg in Chilóe (die wichtigschte 2 Erkenntnis: wirkt sehr europäisch & chilenischi Fraue sind viel feschter als argentinischi) und 2 Tág in Valdivia, wo ich näbe alte Forts mit viel Kanone und Fischmärkt au e bitz Fasnacht miterläbt han (la Noche Valdiviana, mit Schiffscortege uf em Fluss und Räpplischlachte - Fotos drzue hets uf Ringo), bin ich am Mäntig am 27. Februar nach Pucón cho.
Pucón het 21000 Iwohner und liegt am Fuess vom 2860m hoche Vulkan Villarica und isch fescht durch dr Tourismus beherrscht. Dr Ort erinneret ane Skiort, überall Holzhüser und alles seht sehr suber us. Überall reihe sich d Touroperators, Sport und Designeshops anenander. Und 8000 Pesos (20 Fangge) für e Hostel ohni Desayuno (zmoorge) isch bis jetzt au s Maximum wohn i zahlt han - aber e aktive Vulkan het halt au do nid jede Ort.
Im Hostel bin ich uf dr Andi us Wintherthur und dr Chris us Copenhagen troffe. Si händ grad e ganz e spezielli Tour uf e Vulkan buecht, nämlich am nögschte Morge am 4i. Ich han imene Travelforum scho drvo gläse dass es genaui ei Guide git, wo d Erlaubnis het z Nacht uf e Vulkan zgoh
und dass das s ultimativ Richtige isch wo me sött mache, well
a) dr Sunneufgang uf em Vulkan sehr imposant isch,
b) me dr Vulkan denn no für sich elai het (isch dr wichtigschti Grund gsi (siehe Fotos)
c) dr Vulkan am Morge früeh aktiver isch als am Nomidag (me weiss nid wieso, är isch glaub eifach e Früehufsteher ;-)
und d) wells Wátter am Morge oft besser isch und am Nomidag durch die ufstiegendi Füechtigkeit sich denn oft e Wolke ume Kratergipfel ume bildet
Do die beide andere mich jo eh zmitts in dr Nacht wegge würde wenn si göhn, han ich nid lang überlegt und bi grad die glich Tour go bueche. Ich han denn au alles mögliche an Usrüschtig für die Tour grad mitbekoh: Rucksack, Steigeisen, Eispickel, Bergschuhe, Hosen, Jacke, Handschuhe, Bankübefallmütze, u.v.m. Allerdings isch am nögschte Tag s Wätter nid guet gnueg gsi und mir sind umsunscht so früeh in s Bett: d Tour isch um e Tag verschoobe worde.
Mir händ uns denn für eins vo de vielne Vulkan-Schlächtwätter-Ersatz-Agebot entschiede: Hidrospeed - mit Wetsuit und Flosse und eme Art Plastikbob wo me druff liegt und nur mit de Händ hebt durch d Stromschnelle vom
Rio trancura - isch no ganz e glatti Sach gsi.
Am Oobe denn het uns dr Guide denn definitiv grüens Liecht gäh für dr nögscht Tag! S Wätter würd guet si.
Punkt 4i sind mir mitemen Kleibus bim Hostel abgholt worde und richtig Vulkan losgfahre. E halb stund usserhalb vo dr Stadt hän mir kurz aghalte um unser Ziel in Rueh kurz us dr Distanz azluege. Es isch e stockfinschteri Nacht gsi ohni Mond, nur Stärne - und in ca 40º über unsere Köpf het me orange schimmernd d Rauchschwade us em Krater gseh ufstiege - e unglaublige, fascht e bitz schaurige, sicher allne respäcktiflössnede Ablick!
Um die 5i am Morge sind mir an dr Talstation vom Skigebiet (wo allerdings nur im Winter offe isch) acho. Vo do isch es zfuess witergange. 1400 Höhemeter unterhalb vom Krater.
Mir sind 7 gsi in unserer Gruppe; e holländischs Paar (sie isch sehr fit gsi, doch är het e bitz z kämpfe gha und nach 2 Stund scho gfunde är fühli sich wie e alti Frau ... - er hets aber denn trotzdäm duurezooge und s bis uf e Gipgel gschafft!), e Ami, e dritte Schwizer und mir zu dritt. Drzue
Der Kratergipfel
eine gute Stunde vor dem Gipfel sind 2 Guides cho - also im ganze e 9er Trup.
Die erschte 600 Höhemeter händ uns uf steinigem Gländ entlang vo de Skilift und Pischte gfüehrt, aschliessend händ mir d Stigise montiert und dr Ispickel zur hand gnoh. Ab dört isch es im zigzag über Isfälder und Gletscher witer gange. Noch 2 Stunde Marsch in völliger Dunkelheit hets avo Dämmere und am halbi 8i isch denn d Sunne ufgange.
Noch guet 4 Stunde Ufstieg sind mir denn uf die 9i uf em Krater ako! Dä isch öbbe 100m tief gsi und het obe viellicht e Durchmässer vo 150m gha und zwüsche bissemdem Rauch sind pauselos riesigi Lavafontäne mit rumorendem Grolle drusufegschosse, an d Kraterwänd klatscht und dört fescht worde oder wieder in Krater zruggflosse. Es fantastischs Naturschauspiel!
Übrigens isch das Schauspiel bi Vollmond am Beschte z beobachte, well denn dr Magmapegel im Krater höher liegt durch d Aziehigskraft vom Mond. Denn kömme d Lavafontäne schiins zum Teil bis fascht an Kraterrand uffe.
Noch einer Stund händ mir uns vo däm faszinierende Ablick müesse löse, und händ uns an Abstieg gmacht. Inzwüsche het d Sunne s Iis scho e bitz zum schmelze brocht, was dr Abstieg eher erschwert het,
es isch jetzt alles sehr rutschig worde und e paar vo uns sind au ziemlig froh gsi um dr Ispickel - wenn me uf 50º steilem Iis abrutscht - hilft nur no dr Pickel als Bräms. Wo mir denn guet 2 Drittel vom Abstieg hinter uns gloh händ händ mir die räschtlige Tourischte krützt wo am Morge am 7i losgange sind und mir sind uns mit eim Mool bewusst worde, wie guet dass es gsi isch, dass mir so früeh ufgstande sind: uns sind bestimmt 20 - 30 Trups mit zwüsche 10 und 63 (!) Lüt entgegekoh! Zuedäm het s Wätter in däm Momänt au scho avo zuemache und d Wolke sind um e Vulkan immer höher und höher gstiege.
Uf die eins am Mittag sind mir denn wieder zrugg gsi und händ uns im Office vo dr Tourorganisation s erschte Bierli gönnt. Kurz druff - umzooge und früsch duscht hets denn no eins gä, und no eins. Dass das nid guet kunnt wenn me so früeh afangt isch uns glaub scho bewusst gsi, aber nach 2 Nächt am 10 im Bett händ isch alli wiederemol e richtige Usgang gwünscht - und dä hän mir denn au gnosse
... ;-)
Advertisement
Tot: 0.073s; Tpl: 0.011s; cc: 12; qc: 69; dbt: 0.0485s; 1; m:domysql w:travelblog (10.17.0.13); sld: 1;
; mem: 1.2mb