Wir haben Argentinien hinter uns gelassen

---

Zwüsched Bariloche und Puerto Varas, dä Ort wo mir jetzt grad sind, hend mir en zweitägige Stopp im ruhige Örtli Castro uf de Insle Chiloé gmacht. Mir sind chli go laufe, vil go ässe (Muschelcuranto, Salmon und Panqueque). Wel üses Zimmer anre Bruchbude gliche het, hend mir de ganzi Tag dusse verbrocht und hend d'palafitos (Hüser uf Stelze) d'Holzchirche und d'artesania aaglueget.
Chiloé bildet en recht grosse Gegesatz zu Argentinie. Das zeigt sich i de Lüt, wo indigener und weniger europäisch wirked, im Baustil (ali Hüser sind us Holz oder Blech und sehr farbig), und au i de Landschaft. Bi de Überfahrt mit de Fähre sind mir s'erschte mol mitem Pazifik in Berüerig cho und hend au di erschte Robbe gseh. Schön wars aber kalt.
Puerto Varas isch e chlises herzigs deutsches Staedli am Lago Llanquihue mit emnae wunderschoene Blick uf dae Vulkan Osorno, wo mir leider nur wolkevohang gseh hend. Die deutsche Iifluess erkennt mer am breite deutsche Agebot. So findet mer im Supermarkt Haribo, Rocher etc.. Und a jedem Ecke cha mer Kuchen und Strudel esse. Aktiv simer au gsi. Am Sunntig simer go Perle vom Parque Nacional Vincente Perez Rosales go aluege, dae Lago Todos los Santos und d'Saltos Petrohue. Mir sind beidruckt gsi vo dae voschidene blaue Farbe vom Wasser und vo dae Schoenheit vo dae Natur. Am noechste Tag hemer dae Cerritito (sehr,sehr chline Huegel) Philippi bestiege, vo doet hemer ae schoeni Ussicht ka uf dae Vulkan. Aber zum no ae besseri Sicht uf dae Vulkan ueberzcho, hemer ues dur Gstrueb (Distle und Brombeeri) kaempft. Doch leider simer nur uf ae Chueweid gstosse und hend ues wie Dihei gfuehlt.

---