Iguazú Falls - Wonder of Nature!

---

Nach öpe 19 h Busfahrt vo Buenos Aires uf Iguazú (ide Provinz Misiones) bini total kaputt ime Hostel die Nöchi vodem Dörfli glandet. Sogar mit Pool, wo aber nöd soo wahnsinnig relaxend gsi isch will us de luute Luutsprächerboxe näbed dra immer wider de Pitbull mit sim nöd alzu kreative Tacatasong oder de Gangnam Style sich händ müse bewiiise. Jänu so isch das halt i dene „PartyHostels“ 😉

Am gliche Abig vode Akunft hani mi no ufd Suechi vome Bankomat gmacht, tatsächli erfolgriich aber leider häts kei Gäld me drin gha zum abhebe. Isch normal Ändi Wuche in Argentinie! I so Moment findis amel no rächt schwirig relaxed im Pool zbädele!! Aber me mues sich da chli uf di argentinisch Lockerheit verlah und devo usgaah das de Bankomat i más o menos zwei Täg wieder ufgfüllt wird :P

Cataratas Iguazú: Es git di argentinisch und di brasilianisch Siite zum die wunderschöne, wükli unbeschribliche Wasserfäll vo Iguazú (Cataratas de Iguazú) zbeguetachte. Uf di brasilianisch bini natürli nu gange, dasi no es Stämpfeli meh überchum i mim Pass! Das isch es nois Hobby vo mir, Zollstämpel sammle 😉

D Iitrittsprise sin no intressant: es existiert das sogenannte zweitegeilte Priissystem in Argentinie. Als „Extranjera“, Usländerin, chasch sowieso immer devo usgah dasd am tüfschte in Hafersack muesch lange. Por ejemplo bide Itrittsprise für de Parque Iguazú: Am wenigste zahlt d Altersheim Generation vode Provinz Misiones. Dänn chömed dRäntner vom Reste vo Argentinie, als nägschts wird unterschide zwüsche Iiwohner vo Misiones oder vom Rest-Argentinie, dänn Lüüt vo Brasilie, Paraguay, Uruguay und Venezuela. Als höchschts werded dänn all Touris vom Reste vode Wält rangiert. Fühl mi gschmeichlet! Und Argentinier sind nöd kompliziert? Tzetzetze..Siehe Foto.

Papperlapapp egal wieviel mer am Änd zahlt, näbed dene Wasserfäll chönt ich stundelang stah und am Wasser zuelose..da vergisst mer grad mal all sini Problemli (en Usschnitt vo mine Problem sind zur Ziit folgendi: Entscheidigs-Schwirigkeit (wo söli als nächschts hii? Es gfallt mer überall vill zguet!), Söckeverlust (argentinischi Wöschfraue chlaued die amigs), Ziitknappheit zum Ussortiere (vo dene 1000 Föteli wohni scho gschosse ha) und Ziitknappheit zum Charte schribe (ich han ja no Ziit)!

Und ab geht’s nach Salta!

---