Advertisement
Published: December 1st 2005
Edit Blog Post
Inzwüsche han i mi dritte Schueltag do in Cordoba hinter mir und au bi mirere Familie han i mi langsam igläbt.
Am Sunntig Mittag bin ich mit eme Taxi vom Busbahnhof an die Adrässe vo minere Familie gfahre. Noch öbe 10 Miunute rasanter Ralliefahrt het är inere Quartierstroos voremene zweistöckige Reihehus mit eme gäle Glasbalkon aghalte. D Taxiuhr het irgendöbis mit 45 ungrad Pesos azeigt (das sind ca 20 Franke). Ha natürlig scho dängt dass dr Taxifahrer mi linkt, ha aber denn nid grad dört mit ihm welle afange umemeise und han ihm mürrisch e Hunderternote anegstreggt. Das het ihn denn aber irgendwie sichtlich verwirrt und är het irgendöbis avo umefuchtle und verzelle - kei blasse Schimmer was. Irgendwenn het är denn au no welle in mis Portemonnaie luege, was ich natürlich nid welle ha. Noch e paar Minute het sich denn aber usegstellt, dass ich s Komma uf dr Taxiuhr falsch abgläse han und dass die Fahrt nur 4,5 Pesos also 2 Franke koschtet het ...
Mmmhh! Zum Glück het är au nid gmergt das ich nid gmergt han wieviel das es koschtet het, suncht hät är natürlig 50 uusegäh und wär ab. Ich glaub är het isch denn
do drüber au e bitz gnärft nochhär (wenn einem doch scho mol so ne dumme Turischt übere Wäg lauft ... ;-)
Immerhin han ichs gschafft und han mini Host Family gfunde. Die isch denn au grad e bitz überrascht gsi, dass ich scho dört bin. Wie sich denn usegstellt het streike nämlig sit am Wuchenänd in ganz Argentinie d Pilote und Flugzügtechniker und si händ irgendwie gmeint ich würd diräkt uf Córdoba fliege.
Mis Zimmer isch eifach igichtet: Ibauschrank, Bett mit Nachttischli, Tisch und Stuehl - und - ganz wichtig: E Deckeventilator! Es isch natürlig nid supermodärn, aber es isch alles rächt suuber, was s wichtigschte isch.
D Familie sind d Cristina und dr Arthuro mit em Sohn Pablo wo 28 isch und - natürlig: e Hund - d Ossita (vo dr Art här glaub e mischling e bitz ähnlich wie e Husky, ha aber kei Ahnig was genau). Dä isch uf jede Fall rächt verspielt und het mi scho am erschte Tag regelrächt welle bespringe. Isch aber e Wibli, dohär glaub i dass sie nur het welle spiele.
Am Sunntig Noomidag het denn au grad e Asado gäh. Das isch e Argentinischs Grill Barbeque. Nur ässe die do wirklig alles vo däne Tier. Näbe Bluetwurscht und andere Innereie ässe die sogar d Dünndärm - mit Inhalt verstoht sich! Die wärde an so Holzspiessli im Kreis ufgspiesst und dass seht denn us wie die runde Spiral Grillwürscht wo me in Europa kaufe ka. Am Sunntig han ich das aber äbe noonig gwüsst. D Cristina het nur gmeint, die meischte Studänte heige das nid so gärn, aber ich söll doch mol e bitz vo ihre probiere... Ha denn erfahre dass d Läbenserwartig in Argentinie sehr hoch sig (Uffh!). Die händ amel alli voll ihneghaue und jede het meh als 2 ganzi vo dänne Darm-Dinger gässe. Das het mi e bitz beruhigt. Die gueti Nochricht: ich ha noonig ins Spital müesse und ha bis jetzt au no kei Immodium bruucht.
Sunscht isch d Familie bsi jetzt rächt nätt. Im Momänt isch halt e Converstation rächt schwierig, denn si rede alli kei änglisch und mi Spanischwortschatz noonig so wirklich Konversationstauglich.
Aber si gänd sich rächt müeh, mir Sache z erkläre - was mängmool nid ganz eigfach isch.
D Schuel isch am Rand vom Stadtzentrum und isch rächt familiär. 3 Lehrer unterrichte ca 10 Schüeler. D Afängerklass isch die Wuche immer am Noomidag, am Moorge chan i also no bitz usschloofe. Mir sind zu dritt in dr Afängerklass. Dr Marc us Cham isch 24 und isch sehr aktiv. so bitz e Vollgas-Typ, eine wo für jedi Fete z ha isch. Är het sich au scho e ganzi Wiche in Buenos Aires umetriebe und sich scho e bitz "aklimatisiert". D Lena isch erscht 20 und no e bitzli schücher - aber au ganz nätt.
Unter de andere Schüeler wo scho länger do sind hets unter anderem e öschtrichischi Krankeschwester wo im Gundeli wohnt und bis vor kurzem im Bruederholzspital gschafft het. Die andere sind vorwiegend Öschtricher und Dütschi.
Also s gäbt eigentlig no viel me zum schriibe, aber ich muess jo s nögscht mool au no öbis zum verzelle ha.
Dorum: Enjoy Winter & Bis Bald!
Dani
Advertisement
Tot: 0.061s; Tpl: 0.011s; cc: 7; qc: 24; dbt: 0.0394s; 1; m:domysql w:travelblog (10.17.0.13); sld: 1;
; mem: 1mb
zbh
non-member comment
zoophilie
ich würde mich vorsichtshalber vergewissern, dass der hund wirklich ein weibchen ist... ;o) L&P zbh