Deep Blue

---

Hüt isches als erstz ab is Science Museum gange. Es isch genau so riisig wi alles anderi in London und mir hend eifach mal unde aagfange. Abr zerst hämmer eus gad no tickets fürs IMAX 3D Kino postet. Dänn simmer mal dur di erste bereich gschländeret (Weltraum und technischi Entwicklige). Was da so ustelled isch zimlich interessant und beiidruckend. Bim Wältall hets e Projektion vo de Ärde, wo verschiedeni Date zeigt wärded (Liecht ide Nacht, Strömige, Flugvercheer...), es hät e Replika vode Mondchapsle wo de Neil Armstrong drin gsi isch, Triibwärk vo Raketä und sust was s Astronautähärz begehrt. Dänn simmer a diverse Damfmaschinä verbi cho zude erste Autos und sustige Alltagsgägeständ (Töff,Flugi, Wöschmaschine, Velo, und em erste Apple Computer). D'Entwicklig wo mir ide letschte 100-200 Jahr gmacht händ isch scho extrem gross.

Dadruff abe hämmer den en Bereich beträtte wos um de Mänsch und sis Ich gaht. Da wärded Themä wie Lebe, Tod, Genforschig, euses Hirn, euses Dänke und Sexualität aagsproche, au isches mit vill interaktive Statione fü d Chind uusgstattet und mega lässig. Es git Spiili zum Thema Konzentration und Ufmerksamkeit, Märkfähigkeit oder Gschichte womer ines moralisches Dilemma chunt und zwüsched zwei Optione muss uswähle. Spannend isch au wie d Chind a Frage zum Thema gschlächtstypisches Verhalte anegfüärt wärded und sich gwüsse Muster chönd bewusst werde.

Nachdem mer scho gueti 2.5h umegschwirrt sind simmer den aagstande für is IMAX und das isch wükli es Erläbnis: D Liindwand isch galaktisch (4 Doppelstöckerbüss höch und no breiter)! Mir sind mit de 3D Brülle usgrüschtet schön ide mitti aneghocked und den isches ja sowas vo los gange! MIr sind en Meeresfilm go luege (Deep Blue) und wo d Wälle am afang uf eus zue cho isch hani wükli dänkt ez gits nassi Füäss. Dänn sind hunderti chlini Qualle um eus ume gschwebt und mär hät si eifach müsse probiere aalange 😊 Die Wält in 3D z'erläbe isch fantastisch, mer hät immr s gfühl mer seg gad näbed de Fisch oder Tintefisch und alles schwümmt um eim ume. D Schilchröte sind wunderschön gsi und ich ha mi wükli gfühlt wie wänn ich mit ihne würd durs mehr tauche. Ich weiss ned ob ich mis Muul i dene 45min eimal zuebracht han und wo am Schluss no de Walfisch cho isch, bini komplett baff gsi. Chan so öpis aso nu jedem empfehlä! 😊

Nach dem überwältigende Erläbnis simmer a di frisch Luft und ich ha mich dank em schöne Wätter dezue entschloss, no en Spaziergang dur de Hyde Park z'mache. Es isch soo friedlich und mer vergisst komplett dasmer inere Stadt isch. Wiiter bini den über de Hyde Park Corner (de gröscht Chreisel woni känne) zum Green Park und bin no am Hard Rock Café London verbii cho. Nachm Park bini den richtig Piccadilly Square und d Ferarris, Lamborghinis, Bentley's und Aston Martins sind brav im Stau gstande und ich bi glückliche Fuessgänger gsi und han mis bewegigs Pensum bi Sunneschii absolviert 😊

Ez luegi den in Fridä mit chi Guetzli no England geg Italie und froi mi uf di letschte 4 Täg da in lovely London (mi döfed ja dochno schuel gäh).

Stay well und bis gli, 😊

---