Tower Bridge and Camden

---

Nachdem mr gester nüüt verruckts gseh hend, simmer hüt umso meh underwägs gsi. Zerst simmer mit eusere Metrolinie bis ad Endstation gfahre und vo det us zude Tower Bridge gloffe. Die Brugg isch aso wükli zimlich beiidruckend und es hanged au scho di Olympische Ring. Es isch wüklich en Spaziergang wärt über das einzigartige Bauwerk und mer gseht au no de Towerhill mit de Burg. Wänn mr dänn d Brugg vode andere Siite i ihrere volle Grössi chan bewundere, frögt mr sich, wie das die baut händ. Übrigens, wänn d Brugg söll aaghobe werde mummer das aso 24h vorher aamälde!

Vo da gahts den de Themse entlang richtig London Bridge, wobi mr uf em Wäg det ane ade HMS Belfast verbii chunt. Vode Tower Bridge us gseht das Schiff no retaliv winzig us, aber je nöcher mer chunt desto grösser wirds und wämmer denn dänäbet staht isches aso es riiiise ding vome Schiff. D'Touris wo sich de Gspass vom druf gah gönned amüsiered alli andere mit ihrem Gewinke und es isch e mega Ussicht vo da über d Themse.

Wiiter simmer den über d London Bride (nüt speziells) zum Monument (wider mal e Süüle) und det uf d Metro nach Camden Town: Das isch eifach de Wahnsinn. Zerst lauft mr de Strass na und überall häts Märt und Lädeli mit allem erdänkliche. Es isch eher so chli alternativ, hippie, metal, reggae mässig. Dänn chunt mr zunere Art Fabrik und zerst dänkt mr es hät eifach sochli Foodständ aber falsch! Es hät jedes nur vorstellbare ässe (vo polnisch, peruanisch, türkisch, indisch über chinesisch, thai, spanisch, lobanesisch und was no alles) und d Gasse wo sich da uuftüänd sind unändlich. Mär schländeret also dur die Gasse und Katakombe und es git alles, wie ufeme Bazar. Hippiläde, Metalschuppe und Vintage-Secondhand-Schopps reihäd sich da ebeso anenand wie Schmuck, Möbel und Kunsthandwärk. Mer lauft und weiss igendwenn nüme wo mer i dem Spinnenetz eigetli isch. Es dufted nach de ganze Wält und natürli döf au en chliine reggae ladä mit luuter musig nöd fähle 😊

Wommers denn nach öpe 2 Stund wider use gschafft händ, simmer dur de berüämti Regents Park mit sine Fuessballfälder gloffe (da hät scho de Bob Marley tschuutet, er hät ja in Camden gwohnt). Leider häts e bizeli gnislet aber das hät eus nöd wiiter gstört, so wie d Ängländer ihri riisige Picknick au ned beeänded wäg so bizeli nass. Am andere Ändi vom Park hämmer dänn de Buss nach Piccadilly gno (und eeewig brucht) aber mir sind denn dochno bim Trafalgar Square acho wo das Weekend no gratis alli Musicals und Theater sich vorstelled und hend no e churzi Uuffüärig vo Stomp gseh.

Dänn hämmer z'Nacht gässe und hend eus uf de Heiwäg gmacht. Ez druckemer Spanie de Tuume und morn gömmer denn mal is Museum.

Stay well, lots of hugs 😊

---

Photos

Reggae Ladä
de Sound het alles übertönt :)