Advertisement
Published: June 17th 2012
Edit Blog Post
Sooodeli, nacheme Ereignisriiche Weekend schaffis endlich zum eu devo brichte. Fangemer also ah bim...
Samstig: Mir sind dasmal mit de Piccadilly Line zum Green Park gfahre will ja de Queen ihri Geburiparade gsi isch. Det simmer den am 13:30 acho und hends sogar no in königliche Garte uf es Bluemebeet (natürli ohni Blueme) gschafft wommer eus den für d Balkonszena postiert hend. Denn händ d Guards de Platz göffnet und d Lüüt sind um de Circel ume gströömt und es hät nüme welle ufhöre. Pünktlich am 13:00 isch dänn Her Majesty the Queen uf de Balkon use trätte und genau dänn hätts natürli ganz England like auno churz müsse es Minütli rägne. D Lüüt sind hell begeisteret gsi und d Queen hät fründlich gwunke i ihrem gälbe Kostüm. Churz drufabe isch den au de rest vode Family uf de Balkon trätte. D Catherine in Hellblau und de William in rooter Uniform, er hät auno e Ehremedallie übercho anschiinend. Wo denn alli ufm Balkon gsi sind sind di verschidene Flüger über de Buckingham Palace drüber gfloge, das isch zimli iidrücklich gsi.
Nach dere königliche Audiänz hämmer eus uf de Wäg richtig Covent Garden gmacht. Euse Wäg det ane het eus
am Leicester Square verbii gfüärt und am Lyceum Theater, wommer den am Abig füs Musical nomal ane sind, und wommer denn am Garden acho sind hämmer die wunderbari Piazza Stimmig gnosse. S Wätter isch eus wie immer hold gsi und mir hend chli chöne Sunne tanke und dur die viele Ständ dureschländere. Nach em einte und andere chline Chauf simmer den zude St. Pauls Kathedrale spaziert, was eus au am Royal Courte of Justice verbii gfüärt hät.
D'Kathedrale isch sehr beiidruckend und extrem gross. Ihri rund Kupple gseht mer scho vo wiit här und d Stäge vorne draa isch super zum chli usruebe. Womer das Bauwärl denn gnueg bestuunt gha hend simmr über d Millenium Bridge zum Tate Modern Museum zottlet und händ eus det ufere Wisä niderglaa und eus vode Sunne wärme lah. Aschlüssend simmer den uf dere Siite vode Themsä am Oxo Tower verbi zude Waterloo Bridge gwagglet und händ die überquäärt zum wider zum Covent Garden cho. Da hämmer den im Bella Italia z'Nacht gässe.
Mit vollem Buuch simmer is Lyceum Theater gange und händ mit groose Auge eusi sitz iignoh. Das Theater isch eifach de wahnsinn, und übrigens hät da de Bob Marley no
bevor er würklich berüämt worde isch zu promotions Zwäck zwei uusverchaufti Konzert gäh, ich han aso Reggaehistorische Grund beträtte 😊 Zägg isches dunkel worde und s Musical Lion King isch los gange. Vor luuter stuune bini fast vom Sitz gheit, und es isch extrem steil gstuelet 😊 D'Musig, d'Kostüm und eifach alles isch de absoluti Oberhammer. Es isch sooo schöön und d Darstellig vode verschidene Tier isch eifach unglaublich genial gmacht. Es suugt eim richtig ine und mer isch eifach nume fasziniert vo dem wo uf dere Bühni abgaht. Natürli hani au s einte und andere Trändli vertruckt, es gaht eim eifach soo under d Huut, Hüänerhuut isch garantiert! Wenni wider uf London chumi gani das sicher nomal go luege, chas jedem nume empfelä!
Völlig gfläscht vo dem Erläbnis simmer den mit Studiekollegine no dur London by Night gloffe und hend de Big Ben und s London Eye mit belüüchtig bestuunt. Dihei achoo simmer müäd und glücklich is verdiente Bett gläge.
Sunntig: Hüt simmer zum Nothing Hill Gate gfahre mit de Tube und hend eus d Portobello Road und Nothing Hill gnauer aaglueget. Leider isch de Märt am Sunntig ned so gross, aber lässig isch es da trotzdem
allemaal. All die härzige Lädeli und Kaffis sind widermal eifach nume toll zume durelaufe und luege und stuune. Au hämmer eus ändlich mal e Crèpe gönnt, die isch aso wükli super gsi.
Gstärcht simmer den wider zum Nothing Hill Gate und vo det richtig Hyde Park gloffe. Zerst simmer den dur d Kensington Garden gloffe, da stönd alli Konsulat und die sind riisig und mega chic. Denn simmer den am Kensington Palace verbi in Kensington Garden cho und hend eus det als erstz mal amene chline See aneplanzt zum eusne Bei und Füäss ä Pause gönne. Hinder eus hät en talentierte Herr sogar nochli Gitarre gspillt, was euse Ufenthalt no schönner gmacht hät. 😊
Mit erholte Füäss hämmer dä Wäg dur de Hyde Park under d Sohlä gno und hend no en churze Abstächer zude Royal Albert Hall gmacht, bevor mär denn zude Hyde Park Serpentine (en See) cho sind. Da simmer uf d Wiise ghöklet und hend de Lüüt bi de verschidenste Sportarte zueglueget (Velo, Riite, Rollderblades, Skateboard, Ruedere, Pedalöle.....). Widermal hämmer mitm Wätter Glück gha und mir hend chöne d Sunne gnüsse.
Wiiter isches den richtig Piccadilly gange, wobi mir im Hyde Park no am
Rollerblade Mekka verbi cho sind und entdeckt hend, dass das da voll im Trend isch 😊 Und die chönd das also zimli guet! Bevor mer den uf Tube hei sind simmer no in Fortnum&Mason, das isch es uralts rennomierts Huus voller feine Sache zum Ässe und vill verschidenem Tee. Nuscho wie das alles ufgstellt und dekoriert isch, isch en Bsuech wärt! Natürli hämmer eus au vo da öpis chliises mitgnoh 😊
Nach dene zwei lange Täg mit vill spaziere luegemer ez no chli Fuessball bevor mer eus vode Müädigkeit is Bett schicke lönd. Es isch eifach es super Weekend gsi und London isch genial!
Hoffe eu gahts au guet, lots of hugs, stay well 😊
Advertisement
Tot: 0.074s; Tpl: 0.012s; cc: 10; qc: 47; dbt: 0.0454s; 1; m:domysql w:travelblog (10.17.0.13); sld: 1;
; mem: 1.1mb