Childrens Paradise

---

Hüt isch en ereigniss riiche Tag gsi. Ide Schuel hämmer inere 5de Klass mal döfe mithälfe bim schriibe und ide Mathi und am namitag händ d Chind mit Papmaschée Griecheland als 3D Charte bastlet.

Dänn simmer id City gfahre, det hämmr denn zerst gad en VespaClub aatroffe und händ eus bimene Ticketshop Billet fürs Lion King Musical für morn abig postet, mir freued eus ez scho mega druff! Nach dem Erfolg simmer ide Regent Street in riiiisige Spiilzüglade und das isch eifach s Paradies fü Chind und Erwachsni! Begrüessd wird mr mit Seifeblötterli en masse und überall präsentiered eim d Mitarbeiter di noiste Sache wommer ha muess. Es hät Lego und Autöli und Spiili und alles nume erdänkliche wommer sich chönt wünsche. Scho mir sind fast übere gheit vor luuter Faszination 😉 Nach ere halb Stund hämmer den müsse use, es isch eifach en overload a Iidrück.

Dänn hämmer en chline Boge über d Oxford Street gmacht und sind dur Soho nach ChinaTown gloffe wommer imene Resti Z'nacht gässe hend. Free Buffet für 6.50 Pfund 😊 ja mir hend eus de Buuch voll gschlage und sind den durch ChinaTown zum Leicester Square gloffe. ChinaTown isch wükli ultra härzig und ide ville Restaurant hanged überall grillierti Änte im Fänster und d Lädeli sind ebeso de hammer. Vo Leicester isches über de Trafalgar Square gange, wommer no en coole Musiker aatroffe hend, de Bob Marley isch eifach überall beliebt 😉

Dänn simmer s erste mal ad Themse spaziert und es isch eifach e hammer Stimmig gsi. Mir hend s London Eye, s House of Parliament und s Aquarium chöne bestuune und natürli d Themse sälber mit irne Brugge und Böötli. Am andere ändi vode Westminster Bridge simmer den as Ufer abe ghöklet und hend die Ussicht gnosse, eifach unbezahlbar! Über e anderi Brugg simmer den wider richtig Trafalgar Square und Picadilly gloffe. London ide Nacht isch also au sehr schön und beiidruckend. Am Picadilly isches dank de riisige LED Wärbig Taghell 😊

ez froied mir eus mega uf morn ufs Musical. Filicht gsehmer ja am Trooping the Colour no d Queen 😊

stay well, greetings 😊

---