Meeting the Dolphins - Curaçao

---

Eimol meh: was für e Dag!!!!
Eifach numme: wooooow!!! Es isch soooo toll gsi!
Alles dr Reihe noch:
Dr Wecker het 6.40h glüte, denn z'Morge esse und denn ca. 15' zur 'Dolphin Academy' übere gloffe.
Dört het d'Tanja nacheme Briefing denn mit 2 Delfin dörfe go schwimme! Und do nur no 5 anderi Lüt mit drby gsi sin, het me ächt viel vo däm Erläbnis gha! D'Delfin sin um eim umme gschwumme und meh het sie könne strichle (sie sin ganz fyyn und überhaupt nid schlyfferig) und mit schwümme. Zuedem het me könne unter ihne dure tauche und au het me sich könne mitzieh loh vo dene 2 sympatische und clevere Tier. Und s'Highlight isch s'Delfin-Schmützli gsi - eifach numme tooooll!!
Dr ganzi Schwumm isch ca. 40' gange und het e RIESE Lache ins Gsicht vo dr Fr. M. zauberet ;-)
Nochane sin mir denn d'Delfin-Show go luege und es isch scho cool, was die Tier alles könne! Sogar dr Kleinscht, wo erst ei Joor alt isch, het scho welle sie's Könne zeige ;-)
Am 11i isch es denn aber no witer gange und die ganzi Gruppe isch mit eim Delfin ins Wasser gange, wo me no het könne stoh. Dört het me denn dr Delfin au wieder könne strichle, einiges über die Tier könne erfahre (u.a. as sie bis 40-50 Joor alt könne werde - d'Wyybli älter als d'Männli, weil die immer wieder mol müen kämpfle und sich drby verletze), sich e Schmützli geh loh und ihm au eins geh.
E genials Erläbnis! Und au d'Felicia het sich getraut dr Delfin z'Strichle, nachdem sie bi ihrem Mami uf em Arm obe gsi isch und drum e besseri Perspektive gha het.
Nach dem schöne Morge hän mir Hunger gha und sin nach eme Sandwich denn no durch s'Aquarium gloffe und hän u.a. Stachelroche gstrichlet, Rieseschildkröt bestuunt und au es paar Hai (dene möchte mir lieber nid in dr freie Natur begegne...!).
Nach de 2i sin mir denn wieder im Hotel gsi und sin mit Taucherbrille und Schnorchel bi uns do innerhalb vom Riff die schöne Fisch go aluege - unglaublig, was es bereits do für vieli verschiedeni und farbigi Fisch het!
Z'Nacht hän mir denn im Grillrestaurant g'esse und vo dört us dr wunderschöni Sunneuntergang bewunderet.
So goht e unvergässlige und traumhafte Dag z'End, super-genial gsi!!
Euch wünsche mir morn en guete Wuchestart und schigge e diggs Druggi

---