Willemstad - Curaçao

---

Grad vornewäg: mir kömme am 14.8. def. heime, denn mir hän gescht z'Obe nüt gwunne im Casino ;-)
Hüt am Morge sin mir am 9i mit em Taxi nach Willemstad gfahre bzw. 2 vo uns sin füüre gloffe (ca. 50').
Die im grosse Taxi sin z'Mitts in ere Gsellschaft vo Amerikaner gsässe, wo uf em Wäg an e Barmitzwa gsi sin - mir hän uns chli so gfüehlt, wie d'Wedding-Crusher ;-)
In Willenstad sin mir denn über die schwimmendi Brugg in andere Teil übere gloffe und wo mir grad ca. in dr Mitti gsi sin, het's uf beide Siite bimmelet und d'Brugg isch denn langsam ufgange, zum e Schiffli dure lo. Dr Felicia isch das ganze Prozedere nid so ghüür gsi...
Im andere Stadtteil hän mir denn die bekannti Hüüserfassade bestuunt uf dr änere Siite und hän uns gfrogt, wurum me bi uns ab e chli anderst farbige Hüüser grad e Stadtbildkommission muess cho lo..?!
Nochane sin mir no in e 'Shopping-Mall', wo hauptsächlig für d'Gäscht vo de Krüzfahrtschiff dänkt isch - sehr härzig!
Denn no chli durch d'Gässli und d'Läde go aluege.
Nachdem denn d'Brugg wieder passierbar gsi isch (sie isch nämlig längeri Zyt offe gstande, um 2 grossi Frachter us em Hafe use z'loh), sin mir denn wieder zrugg und hän am Wasser no öbbis trunke und mit em Gotti Fabienne und em Oli telifoniert, wo mir do gaaaaanz fescht vermisse!!!
Nochane wieder zrugg mit em Taxi zum Hotel und denn s'übliche Programm:
Mittag esse, Strand, Schnorchle (es het wunderschöni Fisch do zum Bewundere!!), Pool etc.
Denn z'Nacht esse im italienische Retaurant und no chli Caribbean Music gniesse - das isch e Freud!
Jetzt denn ins Bett, denn morn müen mir früeh uf. Mir gönge ins Aquarium do und werde mit de Delfine schwümme bzw. mit ihne plantsche und sie strichle. Do freue mir uns RIESIG druf!!
Euch schigge mir e diggs Druggi und wünsche e schöne Sunntig

---