Vancouver Island

---

Vancouver Island

De Mäntig hei mer frei gha u somit hei mer es langs Weekend gha. Darum si d Kathrin, d Barbara, dr Stefan u ich de uf Vancouver Island gange. Am Samstig morge am sächsi hani ufe Bus müesse damit i am nüüni mit diesne ha uf d Fähri chöne. Ds Wätter isch uu genial gsi u dr Sunneufgang mitem Bodenäbel zwüsche dr Bäum het soooo schön usgseh, aber vom Bus us hani kes Föteli chönne mache... Womer de mit dr Fähri ds Victoria acho sii simmer üses Auto go abhole u de simmr uf Tofino gfahre. Unterwägs heimer mehrmals gstoppet u si under anderem mau chliini Wasserfäll u jahrhundertealti Bäum goge aluege. Vor allem die Bäum hei mich mega fasziniert, so öbbis hanich na nie gseh. I bi mir vorcho wie im Urwald. Am Samstigabe simmr de z Tofino acho u si de i üsri sehr gmüetlichi Suite. Am Sunntig morge simer de an Strand goge brunche. Eigentli heimer an Long Beach welle aber de heimer irgendwie gad verpasst u de simmer halt anen chliinere Strand wo au sehr schön gsi isch. Am Namitag simmr de go whalewatche. Das isch erscht rächt genial gsi. Mir si mit somne motorisierte Gummiböötli gange u üse Skipper het Fröid gha a däm Böötli wienes chliises Chind amne Spielzüügauto 😉 Für uf das Gummiböötli heimer sone coole rote Azuuug übercho u mit däm het mer usgseh als wür mer nägstens en Mondexpedition starte. Aber schlussendlich simer froh gsi drum wiu süsch wärs scho gad zimmli chalt worde. Mir si de drei Stund ufem Meer umecruiset mit däm Böötli u hei Adler, Seelööie, Grauwale u Buggelwale gseh. Die Tier si so faszinierend u vor auem riiesig. Mer hei de o rächt nach a die häre chönne. S isch nur chli schad gsi, si d Wale nid wirkli usem Wasser cho, sie si halt immer nur gad sowiit uftaucht dass sie hei chönne go Luft hole. Aber es isch glich es eimaligs Erläbnis gsi!
Am Sunntig Abe simmr de zrügggfahre uf Victoria u hei de dört üses Auto o wieder müesse abgää. Am Mäntig simmr de Victoria goge aluege u si de unter anderem o im Regierigsgebäude gsi vo British Columbia. Mer hei de dörte gratis chönne anre Füehrig teilnää u derte heimer de sehr viu o über d Politik u d Gschicht vo British Columbia erfahre. Krass het mich vor auem tünkt, was fürne Status die änglischi Queen in Kanada immer na het. Nach dere Füehrig simmer de nachli goge lädele bevor i de wieder zrügg bi mit dr Fähri. Die andere hei ds Waterplane gnoo gha u si de o schnäuer gsi als ich, aber hei halt es halbs Vermöge zahlt...
U ietzt isch scho wieder alles back to normal, s isch wiitergange mit Schuel u mir hei ietzt na vier neui Schüeler ir Klass, aber au alles Schwiizer. U wiu mir jetzt soviu CPE-Students si, heimer ietzt o en separati Grammar-klass u ietzt simmr halt nur na Schwiizer. Isch chli schad, aber chamer halt nid ändere u es het ja süsch na gnueg anderi Lüüt ume us anderne Länder.

So much from me for the moment. Liebi Grüessli übere grossi Teich,

Petra

---

Photos

Boat
mir si mitem linke unterwägs gsi

Comments

[simbuggel]

riesig... unglaublich!
Schön schön dä blog... *tieferseufz* hach, i empfiehl der eifach jetze scho, fang ah zelle wievilmal du s wort riesig bruchsch (es isch jo alles riesig, vo de cornflakespackig bis zu de bäum) ond s gliche bim wort unglaublich. Hoffe för dich es wird nie ganz alltag i dire Ziit dert äne ;). Liebe gruess zrugg simbuggel PS: De Steph ond i händ also wie richtigi Schwitzer nur 53 Minute uf de Grouse Mountain gha... Das erwartet mer det also vo de Schwiizer!

[Pidle]

ja i glaube du kennsch mini Begeisterig für bärguflaufe z guet zum wirkli zdänke dass i i so schnäll derte uelaufe... mir heis üsserscht gmüetlich gno :)