A month is already over...

---

A month is already over...

Es chunnt mer zwar einersiits vor, als wäri erscht gad gange, aber anderersiits hani o ds Gfüehl i bi scho ewigs hie, wiu i füehl mi da wirkli afe drheime. En Viertu vo mire Ziit da in Vancouver isch bereits ume, chum zum glaube.
Vorletscht Wuche hani de mis erste Erfolgserläbnis im Use of English gha u mittlerwiile bini o chli zueversichtlicher, dass i die Prüefig im Dezämber wirde bestah. U es isch cool chönne zgseh, dass es öbbis bringt, wemmer Wörtli übersetzt u versuecht o im Alltagsänglisch z bruuche. S Änglisch isch eigentli keis Problem aber ab u zue gits es haut glich, dass mer Wörtli bruucht womer na nie bruucht het uf Änglisch, aber zum Glück gits ja en Dix =)
Am vorletschte Friitig bini de mit dr Manuela im Queen Elizabeth Park gsi. Das isch u schön derte u s isch en chliini Oase zmittst ir Stadt. Mer gseht de o ganz Downtown u es het sone Tropehalle mit Papageie. De Papagei het sich zwar gweigeret, mit üs z rede, aber isch glich na cool gsi. Am Abe isch de ds Sabbatdinner gsi bim Brüetsch vor Tamar u es isch völlig säubverständlich gsi, dass ich derte debii bin. I wirde da wirkli behandlet wie en Teil vor Family u das fägt.
Am Samstig simer de nach White Rock, das isch en Stadtteil vo Vancouver, wo aber doch scho rächt wiit usse isch. Mir si derte chli a Strand u si chli umegloffe. Es gseht chli us wie z Italie am Strand u isch eigentli nid so spektakulär, aber mir hei en super Ziit gha. Am Nami simmer de o na zum Hockey und Footballstadium. Bis ietzt hanis nur vo usse gseh, aber zmindst ds Hockeystadium wirdi sicher mau na vo inne betrachte =)
Am Sunntig simmer de im Lynn Valley gsi. Derte hets sone Hängebrügg u aui wie derte drüber aber es het Lüüt wo mega Respäkt hei drvo. Isch na lustig gsi d Gsichtsusdrück vo de einzelne Lüüt chli z beobachte. Mir si de o na zum Lake wos wiiter obe het u isch landschaftlich na schön gsi.
Am Zistig bini de im Chinatown gsi. Es het derte o en chinesische Garte (en wiiteri chliini Oase) u diversi chlini Lädeli mit auem mögliche Krimskrams u diversi Läbesmittelläde mit so offnige Nüssli, tröchnete Fischli u auem mögliche anderem komische Züüg. Dr Gruch isch de o nid immer ganz so agnähm gsi…
Am Friitig heimer de eigentli welle go schlööfle mit de Brasilianer. Aber isch de leider nüüt drus worde, wiu dr IceRink zue gsi isch. Jetzt müemmer halt es anders mau gah, wird sicher lustig. Mir si de defür gester uf Bowen Island gsi. Das isch en chliini Insle mit es paar vereinzelte Bewohner vor Vancouver. Mir si de derte chli go hike, doch da mir kei Charte gha hei ischs meh chli es zielloses umenandlaufe worde. Uf jede Fall isches sehr schön u ermüedend gsi (villich au wiu mer d Nacht voräne nid so viu gschlafe hei…) u mir heis u gnosse. Die andere hei de o ihri wohlverdiente Fish and Chips becho, i han mi mit de Chips zfriede gää =)
Jetzt wartet de o scho gli ds Thanksgiving Dinner u Seattle uf mi!

Liebi Grüess us Vancouver

Petra

---

Photos

typical shop in Chinatown
the smell is definitely not my favourite...