Gorge d'Ardèche-Montpellier-Millau Viaduct-Carcassonne

---

Üsi Route steckt voller Öberraschige. Weder emol hets üs inen McDonalds zoge. Im moment semmer grad in Perpignan, de letschte grosse Stadt vor de Französisch-Spanische Grenze. Set em letschte Blog hemmer ide Schlucht vode Ardèche en Kanutour gmacht, send de Floss derufpaddlet und hend üs nochher dor die zerklufteti Landschaft weder la abetriibe. Vo det us eschs wiitergange nach Montpellier, en Stadt womer mol abgseh vo de Verchehrsfüehrig, wo mech fast uf de Psycho brocht het, nor super gueti iidrück metgno hend. die velle Grossbaute, de Triumphboge, die Pärk wos het und so wiiter send genial schön. Am gliiche Tag womer die stadt agluegt hend semmer denn uf de Autobahn no rechtig Millau gfahre, hend üs uf de Autobahn es Renne met Laschtwage fahrer gleferet, wo langi ziit recht usgleche gsi esch, bi strecke wos derab got send mer am gwönne gsi, bi strecke wos deruf got hend si üs huppend weder öberholt, aber ergendwenn het üses Röösi (de bus) eifach nömme möge wos denn schlagartig vo 300 uf 850 m.ü.Meer gange esch. tja, mer chan ned ememr gwönne. In Millau hemmer met secht uf die höscht brogg vo de welt öbernachtet, womer am folgende Tag au dröber gfahre send. Adem obig hemmer unöbertrebe öppe 20 Sternschnoppe gseh!! am Tag nachher hemmer üs uf em meh oder wenigste direktischte, aber ganz secher ned em schnellschte wäg uf carcassonne ufgmacht, en mettel alterlichi Stadt wo no super erhalte esch und uhmega iidröcklech esch. Und jetzt semmer wie gseit ufem Endspurt nach Barcelona wod dlaura denn am Friitig weder dHeireis atrett. Wönsched üch en ganz gueti Ziit!! lg

---