Weiter mit Boot und Bus bis nach Ecuador

---

Ja, sGirlie-Dream-Team haets dasmal leider nid gschafft. Vo Iquitos haet ois keis Boot nach Pantoja a di Ecuadorianischi Grenze wele bringe. Es goend nur oepe alli 2 Wuche Schiff und das haet leider nid ganz anepasst. Sind drum daenn mit aeme ander Schiff bis uf Jurymagua. Das isch au sehr laessig gsi...mir kaenneds jetzt ja scho chli mit dae Bootsfahrte. Haend aendlich die haessliche "bufeos" gseh. Sie mached ihrem Name also alli Ehr (feo=haesslich). Liebevoll au rosaroti Amazonasdelfin gnaennt. Uf aem Boot bin i mal wieder a mini brueflichi Vergangeheit (und villicht ja au Zuekunft) ufmerksam gmacht worde. Haet eine Malaria bedinngt hoech Fieber gha. Ja, isch ae super Idee mit Malaria uf aes Boot mit so viel Luet zgah. Han em daenn mini Malariamedikament vermacht, wo er natuerlich ueberhaupt kei Chance gha haet zum irgendwie oepis daefuer zahle. Isch aber aen Artesania gsi und ich bin jetzt mit Chetteli ideckt. Bis jetzt gahts mer au super guet und ich bin ziemlich sicher, dass er mer nid au dMalaria vermacht haet.
In Jurymagua simmer daenn direkt witer und haens i ca. 48 h bis nach Quito gschafft. Aes isch streng gsi und ich han sBusfahre langsam aber sicher gseh. In Quito simmer daenn am naechschte Tag grad mal uf dae Pichincha. Aen 4100m Huegel....guet, haends Baehnli gnoh, dae Hoecheunterschied isch aber glich oder grad ebe drum chli igfahre. Ueberall haets wieder Warnige gha, dass mer sich us Sicherheitsgruend nid zschnaell soelli Bewege...ja, zerscht choene vor welae :-)
Geschter simmer daenn am Aequator gsi und natuerlich wie sichs ghoert fleissig vo einere Site uf die Anderi ghuepft. Am Namittag simmer daenn uf Otavalo (uf dae groeschti Artesania Maert in Suedamerika) und haend ois det mal mit warme Chleider ideckt. Huet gahts au scho wieder witer...ja, langsam simmer chli im Vorwaertsgang...bis uf Lima blibed ois no ca. 3 Wuche und mir waend doch no so viel gseh. Drum gahts huet nach Riobamba (lohnt sich doch scho waeg aem Name). Det gits ae Bahnlinie, wo mer chan uf aem Dach mitfahre...die warme Chleider haemmer jetzt ja fuer so oepis. Und bald gahts au scho uf dGalapagos. Nach langem hin und her haemmer ois entschiede das Geld uszgaeh. Wenn mer scho mal so naech sind. Ja, froied ois riesig.
Ich hoffe ihr sind alli gsund und so und gruesse ganz liebe us Ecuador

---

Photos

Eduardo VI
oises Dihei fuer 3 Tag

Vor dae Abfahrt
Reges triebe am Hafe

Haemmer no aen Dieb an Bord gha...
...dae haends daenn mit Handschaelle an Betonmischer (au dae haet ae Bootsreis gmacht) gmacht, bis aen dPolizei gholt haet

immer wieder haend dChind..
...bim i- und uslade vo allem Moegliche zueglueget

Dae Gabriel...
...haet oise Drache gschaenkt uebercho wo mer nueme brucht haend und haet ae riese Froid gha....sin Papi haet aen daen drum no chli zum singe zwunge

sGrosi und dae Grospapi
Sie isch scho chli schwehoerig und dement gsi, aber er no sehr rueschtig

Uf aem Waeg nach Quito
Da oisi Busreis so unendlich lang gange isch haemmer halt nid choene dusche....daefuer haemmer ois dSchueh putze und dHaar waesche la. Immerhin oepis. So zsaege suber vo Chopf bis Fuess

frei Uebersetzt
Achtung, 4100m hoech, langsam, nid renne

Mer chan alles verchaufe...
...wenn Mitad del Mundo druf staht