Advertisement
Published: December 31st 2005
Edit Blog Post
Wiehnachte han ich in Bariloche in de Bärge (sogar im Schnee! - wie sichs ghört) verbrocht. Bariloche isch öbe 1700 km südlich vo Córdoba in de Ande und treit au dr Name "Argentinischi Schwiz". Näbe Bärge und See-e isch Bariloche bsunders bekannt für sini 12 Schoggifabrike und hunderte vo Schoggiläde, Käsfondue und als (nur Winter-) Schigebiet. Näbebi isch dört au alles e bitz türer als sunscht in Argentinie - als so ganz swiss-lig.
D Idee vo Wiehnachte in de Bärge isch aber eigentlig vo dr Carmen cho. D Carmen isch vo Bremen und macht in Córdoba es Marketing Praktikum (und het e Fründ in Boston - eifach damit do nid grad wildi Grüchtli entstöhnd ;-). Ich han jo au eh emol welle dört ane go und das Agebot vonere bärgsichere Trekkingpartnerin (das het sich ame früehere Wuchenändusflug eso usegstellt - sie het dört 1000 Höhemeter in de Sandale in 3 Stund und zrugg wieder in 1h20 gschafft, e Superleischtig!) han ich denn au nid lang müesse überlege.
Noch ere kurze Absproch mit dr Schuel (ich ha durch die ganzi Reis schlussändlig doch 4 Tag gfählt) sind mir denn 2 Wuche vor Abreis go Bustickets kaufe. Bustickets kauft me am
beschte dirägt am Busterminal. Dr Langstreckebus-Service in Argentinie isch privatisiert und es git do schätzigswis öbe 50 Busorganisationen (empresas). Wenn me jetzt zum Bischpil vo Córdoba nach Bariloche fahre will, muess me zerscht wüsse, welli empresas die Strecki fahre. Für das gits an de Busterminals eso Infoständ. Die gänd eim denn e Zettel mit luter Nummere druf. Die Nummere ghöre denn zue de Schalter (Boleterias) vo de einzelne Empresas. Als nögschtes ka me jetzt alli Boleterias abklappere und froge um welli Zit dä Bus fahrt und obs no Platz het. Do aber alli Lüt für Wiehnachte händ wäg welle, hets au sehr viel Lüt uf däm Busterminal gha wo das Prozedere absolviert händ; kurz, mir händ pro Boleteria bis 20 Minute müesse astoh. Natürlig sind denn alli dirägte Bus au usverkauft gsi und mir händ witer müesse improvisiere: Nach 4 Stund händ mir denn 2 Tickets vo Córdoba nach Neuquen in de Händ gha. Neuquen isch e Provinzhauptstadt, ca 450 Kilometer vor Bariloche. Mit däm isch denn au dä Tag gloffe gsi (d.h. mir händ denn scho no e paar Cervezas brucht, um die Asträngig z verdaue).
Mit dr Hilf vo minere Spanischlehrerin händ mir denn am nögschte Tag
über e Reiseagentur au no die 2 Tickets vo Neuquen nach Bariloche becho, allerdings nid dirägt sondern mit úbernachtig in Neuquen. Doch immerhin. Dr erschti Milestone isch erreicht.
Am 22. Dezember am 9i isch denn unsere Bus in Cördoba abgfahre. Es het denn eso Grüchtli gäh, dass d Busunternähme ¨ber Wiehnachte wänd streike, doch das het sich für unsere Bus denn zum Glück nid bewohrheitet und mir sind au wirklig losgfahre. User emen kaputte Keilrieme am nögschte Moorge wo si denn nach 2 Stunde aber händ könne ersetze isch die Fahrt eigentlig rächt bequem und agnehm gsi. In Neuquen händ mir denn vor Ort unseri Tickets für am nögschte Tag sogar könne umtusche, sodass mir am gliche Tag, bzw. durchg die nögschti Nacht händ könne witerfahre nach Bariloche. Dort sind mir denn am 24. Dezember am Morge am 6i acho.
Die ganzi Gegend dört ghört zum Nahuel Huapì Nationalpark und isch wirklig malerisch schön und au s Wätter hett sich vo dr beschte Site zeigt: blaue Himmel und kei Wölkli - und das die ganze 3 tag lang.
Mir händ uns denn nocheme ufweckende Kaffi grad in richtig Información de Turista ufgmacht und uns über d Trekkingmöglichkeite z
informiere. Mir händ uns denn relativ rasch könne fÚr e 3 tägigi Bärgtour mit 2 Überachtige in Bärghüttene (Refugios) entschiede, das heisst also dirägt loslaufe und Heilig Oobe uf em Bärg.
Karte kaufe, umszieh, Priviant ikaufe, Überschüssigs Gepack nöime istelle (i trag doch kei Spanischbuech uf e Bärg uffe...), Busfahrplan studiere und usefinde wo dä Bus denn au abfahrt, überlege wie mer am Schluss wieder zrugg nach Bariloche kömme...
Am viertel ab 12i isch dr Bus denn mit uns in Richtig Schigebiet gfahre. D Talstation isch denn au dr Usgangspunkt gsi für unseri Tour. Dört sind mir denn z erscht emol verschrogge, wells öbe 200 16-jöhrigi Schüeler gha het wo in Vollmontur (Moon Boots, Schiazug, Händsche und Chappe) dört Ramba Zamba gmacht händ. Bariloche isch Ändi Johr s Ziel vo allen Sekundarabschlussklasse wo dört ihir Abschlussreis händ. Es het sich aber usestellt, dass die nur mit em Bändli ins Schigebiet gfahre sind um in de letschte Schneeblätze e bitz z spiele - Schnee isch für e Argentinier halt scho öbis scheziells. Das ganze het ziemlig absurd usgseh, do s Wätter e so warm gsi isch dass mir in T-Shirt und kurze Hose (spöter au obe uf em Gipfel)rächt gschwitzt
händ.
Am eins sind mir denn öbe gstartet. Was mir dei nögschte Täg erläbt händ chönned ihr glaub besser anhand vo de Foteli erkenne. Das Nationalparkgebiet isch sensationell schön und vegetativ sehr abwächselnd gsi. Mir händ fascht alles gha, mediterani, trokokeni Vegetation, Bambuswälder, alpinänlichi Wälder mit vielen Bärgbach und Wasserfäll, hochandini Abschnitt, Schneefälder, Gröllhalde, Sumpfgebiet, Buschdickicht, Auelandschafte, ... isch eifach superschön gsi - aber das zeige glaub die Bilder au scho vo elai.
Viel Spass bim aluege!
Advertisement
Tot: 0.157s; Tpl: 0.014s; cc: 14; qc: 69; dbt: 0.1128s; 1; m:domysql w:travelblog (10.17.0.13); sld: 1;
; mem: 1.2mb
Dani W.
non-member comment
E Guets Neus!
Hallo Dani Viele dangg fyr di schöne Bilder und interessante Gschichte. Es muess wirklich e cools Land si. Ich und mini Family wünschen Dir uf jedefall no witeri erläbnisrichi Täg und natürlich e guets neus Jahr mit viel Glück und Gsundheit.