Sequoia Nationalpark

---

Nachdem mir uns hüt durchs Zmorgebuffet kämpft hän, denn es het soooo viel Lüt gha, hän mir uns uf dr Weg zum Sequoia NP gmacht.
Unterwegs no e kurze Stopp für e feine Cappuccino und e heissi Schoggi.
Denn isch es über kurvigi Strosse ufwärts gange. Als 1. hän mir ein vo de gröschte Bäum agluegt, dr 'General Sherman Tree'. Dä isch 84m hoch (d'Bäum im Redwood NP sin zwar höcher, hän aber nid so e digge Stamm) und het en Umfang vo 31m!! Unglaublig!! Zuedem sin viel vo dene Bäum do über 2000 Joor alt.
Denn sin mir witer zur Crystal Cave. Nachdem mir s'Auto parkiert gha hän, isch es knapp en Kilometer steil bergab gange (bi ca. 28 Grad). Unde acho, het uns dr Guide in Empfang gno und knapp ei Stund durch die Höhli gfüehrt (brrrr, bi 10 Grad isch es denn doch chli frisch gsi). D'Höhli het ihre Name, weil's inne immer wieder Stelle git, wo glitzere wie Kristall, wenn s'Liecht druf fallt. Und wie as es isch, wenn's gar kei Liecht me het, hän mir au grad erfahre: dr Guide het s'Liecht usgschalte und: stooooockduuunkeeel!!! Kei Chance zum au nur irgendöbbis z'gseh...!!
Wo mir denn wieder use sin und dr Ufstyg in Agriff gno hän, isch e kleins Mäitli vor uns ufe ghüpft, wo dr ganz Wäg ohni Punkt und Komma gschwätzt het ;-) so isch sie zumindest nid uf d'Idee cho, as sie nüm mag laufe ;-))
Wo mir wieder zrugg im Hotel gsi sin, hän mir grad wieder in Pool müesse, denn s'Thermometer het wieder an dr 100-Grad-Fahrenheit-Marke kratzt...
Zum Znacht hän mir äne an dr Stross welle go mexikanisch esse, aber wo mir s'Esse vor uns gha hän, hän mir grad d'Rechnig verlangt und sin gange! Vollkomme widerlig und unappetitlig und gruusig. So het's halt nomol Pizza geh.
Morn mache mir uns uf dr Wäg nach Los Angeles (ca. 3.5h Fahrt), wo mir denn 6 Nächt werde bliebe - ob mit oder ohni Disneyland entscheide mir no...
Euch schigge mir warmi Temperature, viel Sunne und e diggs Druggi

---

Comments

[Lena]

Schöni Föteli
Hallo zämme, so wunderschöni Föteli usem Sequoia Nationalpark. Viele Dank fürs teile. I ha dänkt i hinterloss wiedermol e Läbenszeiche vos Ernis:) Do alles im griene Berich, hän au bald Ferie:) Härzlichi Griess, Lena