On the way to Los Angeles

---

Kurz vor de 10i hän mir uns uf dr Wäg gmacht Richtig L.A.
Mir sin durch völlig kahli und kargi Landschafte gfahre, wo alles brun und trocke isch, über höcheri Hügel mit vielne Überholmanöver an de Trucks verby und über extrem vielspurigi Autobahne (8 Spure und das isch nur unseri Syyte gsi...).
Wo mir denn im Hotel Solaire acho sin, het uns die netti Dame am Empfang empfohle morn e gfüehrti Tour quer durch L.A. und Umgebig (inkl. Beverly Hills, Hollywood, Santa Monica etcetcetc) z'mache. So müen mir morn Morge am 8.10h dusse parat sy (das heisst dr Wecker stelle, weil morn die Klei sicher länger, als bis am 7i schloft...).
Mir sin denn vo do us zum Staples Center gloffe, wo unter anderem d'Heimspiel vo de L.A. Lakers (Basketball) stattfinde und no sunstigi diversi Sportverastaltige. Unterwegs hän mir no chli vom Usverkauf profitiert und d'Ygravierige im Bode vo de Grammy Gwünner us de letschte Joorzähnte agluegt.
Denn sin mir no fein go z'Nachtesse und zrugg ins Hotel. Doch oh Schreck, was isch das?!? In dr Duschi kunnt nur ca. 20 Grad warms Wasser... Ojeoje, do het d'Frau Müller dure müesse ;-)
Jetzt no chli läse - das isch au öbbis, wo mir wahnsinnig toll finde, an dene Ferie: ändlig Zyt ha und sich neh, zum Büecher läse - und denn ab go schlofe, zum morn die Stadt z'entdecke.
Euch e schöns Wuchenänd und e diggs Druggi

---