On the way to Three Rivers (Sequoia)

---

Bi strahlend schönem Wätter und rächt warme Temperature sin mir hüt Morge los gfahre und hän no e kurze Zwüschestopp bim Restaurant mit WLAN gmacht ;-) so hän mir au am Gotti Fabienne und Oli rasch könne 'Hallo' sage!
Denn isch es losgange... Eigentlig hän mir gemäss Navi dr kürzisti Wäg usgwählt (zytlig gmeint und nid d'Kilometer). Doch die Navis sin leider nid so gschyd, as sie merke, as d'Stross wo me 55 mph dörfti fahre e Bergstross mit 100 und meh Kurve isch, wo me maximal 30 cha fahre... So hän mir denn in Mariposa entschiede e kleine Umweg z'mache, aber do drmit immerhin uf dr Freeway z'cho und nüm Ringgeliränggeli durch d'Hügel.
Am Mittag sin mir denn kurz vor Fresno e Mittagspause go mache und hän zum 1. Mol dr In-n-Out-Burger teschtet. Die mache tatsächlig alles frisch vor Ort (drum bruchts au fast 15 Lüt in dr Kuchi) und s'Fleisch isch nie tiefgfroore worde. Zuedem hän sie e Protein-Burger, wo me s'Fleisch anstatt zwüsche 2 Brötli in Ysbergsalatblätter ygwygglet bechunt. Super Sach!
Knapp vor de drei sin mir denn do in 'Three Rivers' acho - das isch nur es paar Kilometer vor em Ygang zum Sequoia Nationalpark. Und wo mir us em Auto usgstyyge sin, het's uns fast umghaue! E Affehitz - 102 Grad Fahreheit (das sin 39 Grad!)!!
Drum hän mir rasch ycheckt und sin denn mit em Auto nomol es bitzeli witer gfahre, zum go e Glace ässe und denn grad wider zrugg do ins Hotel und ab in Pool. D'Felicia hän mir nach 2h Duur-Bade fast müesse go use risse, denn sie wär glaub jetzt no dört inne...
Nach em Dusche sin mir in dr Pizza-Factory öbbis go esse - ihr verrotet nie, was.. ;-)
Morn mache mir uns denn uf dr Wäg in Sequoia NP und wüsse nonig genau, ob mir dört in d'Crystal Cave sölle go oder doch nomol extrem hochi Bäum go aluege - ein drvo (dr gröschti vo allne), wird jedes Joor zum Wiehnachtsbaum Amerikas küürt.
So ändet e Dag mit ere astrengende und lange Fahrt, aber au es paar gemütlige Stunde am und im Pool!
Euch schigge mir e diggs Druggi

---