Advertisement
Published: April 24th 2010
Edit Blog Post
Goodbye Castlegar…
Ietzt isches scho wieder so wiit, d Koffere si packt u i reise wiiter! Morn am morge am 9i starti z Castlegar u flüüge via Vancouver nach Montreal. Und einisch meh, en völlige Neustart, neui Lüüt, neui Stadt, neui Sprach… I bi gspannt druf, was mi aues erwartet u fröie mi riesig, o wenns mer nid liecht fallt, vo de Lüüt hie Abschied znää!
Nach de Olympiade isch düre gsi, isches sehr ruhig gsi in Castlegar u i han zimmli d Krise gha, wiu i eifach ds Gfüehl gha han, dass i so hüüfig nüüt mache u dass es eifach o nüüt zmache git, wemmer kes Auto zur Verfüegig het. Die täglichi Warterei ufe Bus oder uf d Schuelstunde het doch sehr a mine Närve zehrt u zwüschedüre hani wirkli dänkt i wett nur na wiiterreise u wäg us Castlegar.
Wo de auerdings dr Früehlig cho isch, isch das o wieder besser worde; mer hei d Möglichkeit gha, üs eifach o mau verusse zträffe, mir si zäme goge hike, hei am Abe es Füür gmacht am Strand, oder hei süsch so guet wie’s geit hie Party gmacht. Mir si de o mau na zäme uf Spokane (USA).
Mini Gastfamilie isch de um Ostere ume zwe Wuche uf Mexico u so heimer sturmfrei gha u i hans sehr gnosse, mau wieder säuber zchoche. Am Ostersonntig hani de die wäutsbeschti Torte gmacht, u so hani mi de am Ostersonntig wie drheime gfüehlt =) Schad isch nur gsi, dass mini Gastfamilie gseit hei, sie welle nid dass mer da gross Party mached, was i ja eigentli chan verstah, aber wär halt gliich cool gsi (das Huus eignet sich vo de Rüümlichkeite nämmli perfekt drzue ;-)
U de isch plötzlich die letschti Schuelwuche da gsi u de isch ds Semester o scho fertig gsi. Am Abe vor mim Geburi isch de d Semesterschlussparty gsi, u isch voll schräg gsi… het nid wirkli Lüüt gha u de DJ isch en absoluti Katastrophe gsi… zudem hei mini Kollege hie sich so schräg benoh gha, dass i woni hei bin, mich wirkli gfragt han, ob ich das wirkli chan Kollege nenne…
Die letschte zwe Wuche si de auerdings namau absolut dr Hammer gsi u i bin mittlerwiile wieder richtig stolz, die Lüüt als mini Fründe chönne zha! Mer hei üsi Ferie u ds schöne (u mit 25 Grad scho zimmli sommerliche) Wätter so
richtig gnosse u hei üs eigentli jede Tag irgendwo troffe u si am Abe zäme i Usgang.
Am letschte Sunntig simmer am Abe ir Residence gsi zum goge Fium luege, u de heimer voräne na chli wöue goge laufe, damit mer nid ischlaafed. Dr Kolleg het de nur so gmeint, mer setted doch wirkli mau goge Bäre jage, die seiged ietzt sicher scho wach. Womer de zur Tüür us si, isch öbbe 10 Meter vor üs en Bär gstande… isch zwar en relativ chliine gsi, aber isch gliich cool gsi. Dummerwiis isch z dunkel gsi zum es Föteli mache… *gggg* … Nachdäm de öbbe 20 Lüüt verusse gstande si, het sich dr Bär denn o gmüetlich umdreit u isch langsam drvozottlet… mer hei de beschlosse nid a Strand abe zlaufe… wär chli riskant gsi.
Am Mittwoch isch de d Maria zrügg nach Mexico. Sie isch die ersti gsi zum heigah vo hie u da mir doch en sehr ängi Fründschaft ufbaut hei i de letschte vier Mönet ischs umso schlimmer gsi. Aber im Sommer wird i si goge bsueche, u das isch doch en guete Trost.
Hüt isch denn d Graduation Ceremony gsi. Obwohl i nur zwöi Englischklasse gha han,
hani ds EASL Programm abgschlosse u han somit chönne teilnää. Isch auerdings na es komischs Gfüehl so nachme Semester abzschliesse, wiu i han ds Gfüehl gha, i han ja eigentli gar nüüt gmacht… u au andere rund um di ume hei mindestens zwöi Jahr „richtig“ gstudiert… Naja, wie o immer… abgseh drvo dass es rächt langwiilig gsi isch zuezluege wie aui ihres Papierrölleli bechömed, isches doch rächt cool gsi u i han sone coole Umhang becho… nur ds Hüetli heimer leider nid becho, das isch aso scho chli schad gsi… Aber mer chan ja nid aues ha.
O wenns nid immer eifach gsi isch hie in Castlegar, die letschte zwe Wuche si absolut genial gsi u hei drfür gsorgt, dass mir das Semester u d Lüüt hie in beschter Erinnerig bliibe wärded. U hie isch wirkli aues um d’Lüüt gange, dementsprächend intensiv si d Fründschafte hie worde u es isch es komischs Gfüehl, morn aune müesse tschüss zsäge u nid zwüsse, wenn dassi die Lüüt jemals wieder gsehne… Aber dr Abschied ghört halt o drzue…
Advertisement
Tot: 0.111s; Tpl: 0.011s; cc: 10; qc: 52; dbt: 0.0648s; 1; m:domysql w:travelblog (10.17.0.13); sld: 1;
; mem: 1.2mb