Vancouver 2010 Olympics

---

Vancouver 2010 Olympics

Nachdäm i eigentli dänkt heigi, i wirde die olympische Spiu definitiv nid live miterläbe, hani mi de churzfristig glich entschlosse, die langi u nid ganz billigi Reis uf mich znää u fürne Wuche zrügg nach Vancouver zgah - en absolut gueti Entscheidig!
Am Donstig vorere Wuche isches de auso los gange. Zäme mit de Maria, em Mät, em Mäx u em Martin hani mi ufe Wäg gmacht nach Vancouver. Am Friitig am füüfi am Morge simmer de nachre 12stündige Busreis in Van acho u si zimmli müed gsi… d Maria u ich si de zu mire Gastfamilie us Vancouver, womer für die paar Täg hei chönne wohne. Nachdem mer de mau einigermasse fit gsi si simmer de Downtown gange u hei diversi Shows glueget u si o na schnäu am PLI goge verbiiluege. Es het zwe LiveCity’s downtown u derte findet de ganzi Tag gratis Konzärt u anderi Darbietige statt. A däm Friitig hei sich diversi Kulture präsentiert, einersiits d’ Natives, aber o die verschiedne asiatische Kulture wo in Van verträtte si. Am Abe heimer üs de unter die viele Lüüt begäh, wo ir Chälti u im Räge d Eröffnigsfiir uf Grossliinwand glueget hend. Scho derte isch die gueti Stimmig überecho.
Die folgende Täg heimer de mau prinzipiell bis am Mittag gschlafe, damit mer am Namitag de fit gsi sii zum d Stadt chli azluege. U am Abe isch de ame Usgang agseit gsi. Mir si goge Konzert lose u aschliessend simer downtown gsi. Downtown isch absolut crazy gsi, Robson u Granville Street si Fuessgängerzone gsi u voll mit Mönsche. Han na säute so viu Lüüt gseh. D Stimmig isch super gsi, aui si voll am feschte gsi u so kritisch wie d Vancouverians im vorus gsi sii, so hei sie doch ds Motto „with glowing hearts“ so richtig verkörperet. Obwohl mer überall het müesse astah hei sie s glasse gnoh u aui si mitme Lache umegloffe, u mer het richtig gseh, wie stolz die Mönsche sii die olympische Spiu z hoste, Vancouverians u Kanadier zsii! Mer het chum öbberd gseh wo nid irgendwie es Maple Leaf gha het.
Mir hei en absolut geniali Wuche dörfe erläbe u es isch en einzigartigi Erfahrig gsi u i bin absolut froh, dass i gange bin!

Süsch passiert nid sonderlich viu. Vor zwe Woche hani mini Volunteerwork agfange. Zwe Stund ir Wuche bini ar Robson Community School u hiufe unterrichte. I han d 2. u 3. Klässler u die si absolut genial. Sie si aui mega härzlich u chöme gäng mit mir choge brichte, am liebste würde sie mer aues verzöue, u natürlich gad aui gliichziitig. Aber sie si aso scho gad sehr erstuunt gsi woni ne gseit han, dass mer ir Schwiiz keni Inukshuks hei… das hei sie chuum möge gloube. Aber die Chind si eifach super u o d Lehreri isch en cooli. Sie laht mich viu o säuber mache u das ermöglicht mir en guete Iblick u en super Erfahrig.
Gester hei mer de zwöiti Schneetag gha mit dr Schueu, sprich mis zwöite Mau snowboarde. Boarde isch aso scho na cool, aber o zimmli schmärzhaft. Nachdäm i vor drei Wuche dummerwiis usem Stand uf ds Steissbei gheit bi u mi när fürnes paar Täg chum meh han chönne bewege, het gester einisch umgheie glängt, dass es wieder säumässig weh tue het. I han denn darum beschlosse s nid zriskiere namau druuf zgheie u han wieder uf mini gliebte Ski umgstellt ;-) Aber eigentli chumi scho ganz guet zrächt mit nur eim Brätt a de Füess, o wenns chli es komischs Gfüehl isch. U eis isch sicher, irgendwenn (wenn villich o nid in Kanada) wirdi wieder mau boarde!

Das si so chli d News vo hie füre Moment. Dir gseht, i han en super Ziit hie… und i zwe Wuche isch d Häufti vo mim Jahr in Kanada over :-(

---