We're going to San Francisco

---

Hüt Morge sin mir am 10i los gfahre und nach knapp 50' sin mir über DIE Brugg gfahre: Golden Gate Bridge!
Welcome to San Francisco!!
Dank em Navi hän mir denn au unsers Hotel 'The Hotel California' rasch gfunde (zum Glügg isch unsers Auto e Automat! Denn die Strosse könne wüüüürklig extrem steil sy...! Me seht amigs bim Ufefahre gar nid über d'Kuppe - voll schräg!) und scho ins Zimmer könne.
Mir sin aber nur kurz dinne bliebe und sin denn Richtig Union Square und hänn uns für e Sightseeing-Tour mit eme Doppeldecker-Bus entschiede - natürlig sin mir obe gsässe!
Ab isch es gange durch die Strosse vo San Francisco und an schöne und berühmte Gebäude verby und das alles bim schönste Sunneschyn und agnähme Temperature. Doch das het sich schlagartig gänderet, wo mir Richtig Golden Gate Bridge cho sin: Näbel und gfühlti 5 Grad und denn mit ca. 80 km/h über die Brugg brätteret... Brrrrrr! Isch das chalt gsi!!! Wurum sin mir numme obe gsässe?!? Zum Glügg hän mir alli no e Kapuzejäggli drby gha! Denn wo mir äne acho sin, hän mir gwüsst, es git nur ei Wäg wieder zrugg... Genau: wieder über d'Brugg!
Chum wieder in SF het d'Sunne gschuune und mir hän uns ufgwärmt.
Mit em Bus sin mir denn witer zum Chinatown und denn an Hafe an dr Bay Bridge verby und zu de verschiedene Piers abe.
Bim Pier 39 (Fisherman's Wharf) sin mir usgstiege und ab ins Gewusel - es wimmlet do nur so vo Touris und es isch verby mit dr Gemütlichkeit!
Aber Pier 39 isch ächt toll! Nur d'Seeleuie sin momentan nid do (bis uf eine), denn die gebäre momentan irgendwo anderst ihri Junge...
Nach ere Stärkig (inkl. Zuckerwatte, Karussell fahre und süessem frittiertem Irgendöbbis) sin mir denn bis zur einte Ändstation vo de Cable Cars gloffe und hän dört zimlig lang müesse warte, do's die Chauffeure eher gemächlich nämme mit Schaffe. Und denn sin mir in somene 'Trämmli' gsässe und es isch e sehr e holprigi und luti Fahrt gsi, aber toll!! Dr Christian isch uf em Trittbrätt gstande und het sich zimlig fest müesse hebe...
Denn sin mir no chli durch Chinatown gschlenderet, wobi das Viertel sicher z'Nacht no chli mehr här git, wenn alli rote Lampions und die spezielle Strosselampe brenne!
Allgemein gfallt uns die Stadt, aber es isch do SEHR touristisch, es windet viel und wirkt drum teilwiis rächt frisch und es het sehr viel Autos.
Aber mir freue uns sehr druf, morn dr 4. Juli do dörfe z'verbringe...!
Euch allne schigge mir e diggs Druggi

---

Comments

[móni]

Elias het d'Fotis agluegt....
Hallo mini liebe! Dr elias het grad mit mir d'fotis agluegt und stuunt wie gross die Brügg immer sind:) und ob die bäum bis zum himmel göhn...! Er het mi grad gfrogt wie lang d'felicia jetzt in amerika isch und gfunde, mir könne sie jo go bsueche!! Isch jo ganz eifach, mir könne jo s'flugi neh und go... hihihi! Genau, so eifach würd das go, wenn d'kinder d'wält regiere:)))) er schiggt euch au eganz e liebs griessli und d'felicia: du söllsch ganz viel so clowns ässe(pancakes) mmhhh die sind sicher fein, het dr gseit!! Big hug and take care!!