Shopping-Day in Petaluma

---

Grad nach em Ufstoh hän mir via Skype mit em Gromi & Gropi vo dr Felicia 'telifoniert'. Scho toll, as das so klappt und me sich um die halb Wält so cha gseh und unterhalte!
Denn zum Zmorge sin mir über d'Stross in e Pancake-Restaurant. Für eimol isch das ok gsi, aber definitiv nid für jede Dag!
Drnoch hän mir grad no s'WLAN vom Restauant gnutz, zum am Gotti Fabienne und am Oli via Face Time 'Hallo' z'sage...
Und denn isch es ab ins Premium Outlet Village gange. Dört het's x Läde imene kleine Dörfli agordnet.
Nach 5h Power-Shopping (nur eimol het's e kleins Päuseli geh zum öbbis trinke und knabbere), sin mir mit viiiiiielne Täsche belade Richtig Auto gloffe und wieder zrugg ins Hotel gfahre. Und me muess drzue sage, as NID d'Frau Müller die gsi isch, wo am meiste kauft het! Eher chunt sie fangs uf Rang 3... ;-)
Denn sin dr Christian und d'Felicia wieder im Pool go bädele und nach em Dusche sin mir go mexikanisch esse - mmmmh, sehr fein gsi, aber viel z'viel! Und eimol meh isch uns ufgfalle, wie guet die Restaurants bsuecht sin! Praktisch immer sin sie voll mit Gäst!
So, jetzt müen mir luege, wie mir die ganze Ykäuf in unseri Köffer bringe, denn morn fahre mir witer uf San Francisco. Scho ganz fescht gspannt sin mir uf die Stadt...
Euch e diggs Druggi

---