A long way to Petaluma

---

Hüt am Morge sin mir inere feine Bäckerei go Gipfeli und Kaffi hole und drmit zrugg ins Motel und vor dr Fernseh... So hän mir wenigstens die 1. Halbzyt vom Match Schwiiz gege Argentinie könne luege. Und was mir gseh hän, het uns sehr gfalle! Am liebschte hätte mir no witer gluegt, aber do mir no 4h Fahrt vor uns gha hän, sin mir denn ufbroche.
Voller Ungeduld hän mir immer wieder ufs Natel gluegt, wo mir via SMS uf em Laufende ghalte worde sin. Und chum hän mir erfahre, as es e Verlängerig git, hän mir au kei Netz meh gha... Kei guets Omen... Und wo mir nach knapp ere Stund wieder Empfang gha hän, hän mir erfahre, as d'Schwiizer zwar sehr guet gspielt hän, aber trotzdem 0:1 verlore hän. Schad!
So sin mir denn dr Räscht vom Wäg durch schöni Räbegebiet und teilwiis brüetendi Hitz (über 30 Grad) gfahre und knapp vor de drei do in Petaluma acho. So hän mir denn grad no d'Verlängerig vo USA gege Belgie gseh und leider sin au d'Amerikaner jetzt dusse...
Dr Christian und d'Felicia hän denn dr Pool teschtet und au d'Wöschmaschine hän mir in Gebruch gno.
So isch dä Dag jetzt langsam am z'End go und mir freue uns uf e Shopping-Dag morn do imene Premium-Outlet-Village... ;-)
Euch schigge mir e diggs Druggi

---