Advertisement
Published: August 21st 2006
in the beginning
sooo wiit isches no...am 10te auguscht am 9i am morge hemmer muesse parat si, fuer uesi sechstagestour zum monte roraima. en tafelberg (sprich eine wo uf allne siite eifach wie abgschnitte isch und obe meh oder weniger flach) wo vom guyanashield entsprunge isch, also i dere ziit wo eifach fangs de norde und suede vo de welt trennt gsi isch, aber meh noed. however, de roraima isch zaemme mit es paar andere uf all faell ein vo de erschtere gsi wo denn usem wasser sich erhobe het und spezielle a dem berg isch ebe, dasser sich sit dete kumm veraenderet het. alle isch no meh oder weniger glich und er het kei ifluess miterlebt, wie die reschtlich natur vo ues. abgseh vo verwitterig dur de wind, rege und so. tier wo doete obe lebed zum bischpiel sind dene vo afrika aehnlich und noed dene vo suedamerika und und und.
mir hend e mega cooli gruppe am start. zaemme mitem javier, de yolanda und em josé ra (alli drue usem baskeland, aber kei terrorischte...chch) und uesem guide am gustavo hemmer ues denn also uf de weg gmacht. zerscht simmer schnell zum hauptsitz gange vo de agencia, wommer ues schlofsaeck und maetteli gschnappt hend und in
fabienne alias e.t.
und soooo schoen het de mond wohl nonie gschunne ufeme finger... rucksack verstaut. denn het ziit auno fuer e chlini spielrundi mit herzige welpehuendli glanget und zum gruetzisaege vomene tucan, wos doete bi sich hend, well dem mol dfluegel gstutzt worde sind und sie ihn wieder ufpaeppeled zum denn irgendwenn freiloh. however...de henry tucan. nochig simmer numol schnell is doerfli, hend dete no e kaeffeli gschnappt und en donut und denn isches losgange richtig 'paraitepui', es igeborenedoerfli wos eigentlich nuet het und alli luet wo doet wohned schaffed als traeger fuer die toure uf de roraima, also fascht alli. paar sind auno i de landwirtschaft taetig und zuechtet yucapflanze...
nochdem mir ues im tourikontrollbuech itreit hend und alli sache vom jeep abglade gsi sind simmer also losglaufe...die erschti etappe isch 12km lang gsi und isch ueber huegeligi, mit luggem gruen bewachseni landschaft gange. ab und zue hetmer e chlises baechli muesse ueberquere wommer sich au trinkflaesche het choene uffuelle. de ganzi waeg lang het dsunne gschunne. i de mitti vo dem waeg hemmer ues ufeme huegeli de erschti happe goennt, herllichi sandwich, aber sesse soell no vil besser werde. irgendwenn gaege de spoeter nommi simmer denn bi uesem erschte lagerplatz itroffe, am 'rio ték'. mir sind noed die erschte gsi dete
heissi schoggi
da hemmer noch de zweite etappe definitiv brucht, hets doch so abeloh waeredem laufe...uuu aber es het no gnuegend platz gha, so dass mir fuef alli hend choene ihres zelt ufschlah. wobi fuef chli undertrippe isch. do isch jo auno de gustavo de guide plus 4 traeger, wo alles ueses esse mitschlepped, sowie zelt und sogar e portabels wc (scho chli ueberfluessig, aber dueberlegig dehinder isch noed schlecht...however) . nochdem mir uesi sache naebeds zelt deponiert hend simmer no in noeche fluss go bade und hend ues nochig sofort mit langarmige sache bekleidet. leider gits do e muggeplog wo sich 'pury-pury' nennt und die gits zu millione und loend sich eifach noed abschuettle. paar stich sind also unvermeindlich, aber ussertem biisse sinds ungfoehrlich. however, die reschtlich ziit bi sunneliecht hemmer ues denn mit chli laese versuesst und nochdems itunklet het hemmer en herrliche salat (endlich wiedermal mit salatsauce) und spaghetti bolo becho. zum abschluss bevor mir denn is zelt gschluepft sind het ues no de schoenschti mondufgang wonni je gseh han erwartet. de mond isch sooo gross und schoen gsi, eifach krass.
de zweiti tag isch denn scho am morge am 6i losgange, wells denn eifach so hell gsi isch, dassmer nuemm het choene schlofe und drum simmer denn au ufgstande. miteme kaeffeli und
sunnebeluechtet
am morge vom dritte tag het ues de roraima mit dere pracht zum finale ufstieg motiviert... herrliche dumplins (da isch e spezialitaet us brit. guyana, traeger sind die meischte vo dete, wie au die meischte guides, de gustavo aber noed) hemmer ues denn chraft gholt fuer die noechschti etappe. isch sie zwor chli chuerzer als die erschti, mit 10km aber defuer gits no chli meh als 800 hoehemeter zum bewaeltige, wa noed zunderschaetze isch. am afang hemmer denn auno die beide fluess (de rio ték und de rio kukenan) muesse ueberquere. mit socke a de fuess isch da perfekt gange. au trotz de schlipfige stei. noch ewigem deruf laufe und wetter wo au noed immer mitgspielt het, sprich ufem letschte abschnitt hets abeloh wie us chuebel und mir sind alli maechtig nass worde, aber zum glueck sind uesi kleider guet i plastiksaeck verpackt gsi. im stroehmende rege hemmer denn au uessi zelt ufbaut und es isch noed ganz zvermiede gsi, dasses inne chli nassworde isch,aber witer isch da noed schlimm gsi. nochig isch denn naemmli wieder dsunne cho und nocheme staerkende mittagesseznacht und erre heisse ovi mit rum isch denn sowieso alles vergesse gsi und mir sind fuer e witeri nacht is zeltli go penne. de noechschti morge het sich denn wieder vonere guete siite zeigt
steiler gohts nuemme
da isch de blick vom afang vo de wand vom roraima noch ufe...zum glueck isch uese waeg noed ganz so gsi... und uf isches gange zu de dritte etappe. 1000 meter hoeheunterschied i nur 2.5km. chend eu jo dementsprechend vorstelle, wie steil dasses gsi isch. recht streng gsi, aber dmotivation zum endlich uf dem wunderbare berg obe zsii isch so gross gsi, dasses irgendwie e liechtigkeit gsi isch zum ufegoh und so sind denn de javier und ich au die erschte vo allne gruppe gsi, wo die wunderbar skurile landschaft hend doerfe erblicke...
nochdem mir ueses "hotel" (en fellsvorsprung wo obe suber deckt und meh oder weniger windgschuetzt isch) in bezug gnoh hend hemmer ues zerscht mol wieder vom gustavo sine chochkuenscht ufem 'kerosinchocher' verzaubere loh. isch zwor immer chli fettig gsi, aber herrlich fein. am nommitag nochere churze regeschauer hemmer ues denn uf de waeg gmacht zum sogenannte carro, teil vo de berformation wommer vo venezuela us gseht (dozue gits no zaege, dass sich brasilie, venezuela und guyana de berg teiled), wo wie en alte chevi usgseht oder wie au immer. es isch de hoechschti punkt vom roraima und zuedem en perfekte ussichtspunkt ueber die ganzi 'gran sabana'. mir gseht de ganzi waeg wommer zrugggleit het und no vil witer. wommer denn am obig wieder bi uesne zeltli ghocket sind,
gschafft
endlich simmer alli dobe... hemmer sogar dliechter vo santa elena gseh wo wuerkli jeeenes wiit emtfernt isch. ipackt bis zum geht nicht mehr und mit trotzdem zittrige hend hemmer wieder uesen znacht und uesi ovi mit rum trunke und sind denn wie eigentli jede tag scho am 7ni/halbi achti is zelt.
am vierte tag hemmer denn e langi erkundigswanderi zu verschiedene orte uf dem berg gmacht. do gits aber no zaege, dass de berg zum ganz erkunde sicher 2-3 taeg in aspruch neh wuerd, mir sind nur uf de vene siite blibe. es isch eifach zu krass speziell, zum die landschaft richtig beschriebe. eifach jenschti schraegi felsformatione. zum teil errinerets a tier, zum teil a mensche (fiddel laesst gruessen) oder a suesstigi sache. mit viel fantasie, wa ich jo sicher han, loht sich alles i dene steigebilde gseh, wammer woett. hehe. smile. wells am morge wommer die erkundig gmacht hend recht neblig gsi isch, sind mir fuef denn numol gange am nommitga zum de guyanisch dschungel zbestuhne und numol zum sogenannte 'fenschter' en felse wo eifach so zwuesched zwei andere hanged und dur da en atemberaubende blick uf die oeppe 1000 meter witere unneligendi ebeni buetet. am obig hemmer ues denn numol verwoehne loh
how bizzare
forme wiemers no nie gseht het, eifach verdammt idruecklich... und am maentig morge hemmer ues denn wieder uf de waeg gmacht zum 'rio ték' sprich mir hend die 2.5km plus die 10km zaemme gmacht und somit fascht 2000 meter hoeheunterschied i eim tag bewaeltiged. dchnue und vorallem doberschenkel hend a dere ganze sach noed wuerkli freud gha und wo mir denn alli nocheme straenge abstieg im camp acho sind, simmer froh gsi, zum endlich choenne ufen bank hocke und ues entspanne. vorallem de fabienne ihri beinli hend am schluss nuemme so wuerkli moege, aber mit de hilf vo mir als skilift oder wa au immer isches scho gange. (aber was no zaege git zu dem, mir sind die schnellschti gruppe gsi wo de gustavo je gha het und do doerfmer wohl denn au chli liide, chch). im camp hemmer ues denn en usdehnte obedschmauss goent und nochig simmer zum schutz vor denne unablaessliche pury-purys, wos jetzt wieder gha het, is zelt ghuscht. no sletschti mol uf hartem bode penne und denn hemmers gschafft. die letschti etappe am sechtse tag isch denn nuno, fuer die eine s'i-puenktli und fuer die andere willenschraft gsi. sind jo numol die 12km ueber huegeligi wege gsi und jedesmol wenns abegange isch hettmer halt gmerkt
fidel castro
au vo ihm hets es abild ufem roraima... wammer am vortag gmacht het. jojo. aber noch 3h wandere oder chli laenger hemmers denn gschafft und sind wieder bim usgangspunkt in paraitepui acho. doete het ues denn e chuehls bierli us de chuehlbox erwartet und zuesaetzlich e warms esse. nochig simmer mitem cheep wieder zrugg gfahre und alli vor muedigkeit fascht igschlofe. zum glueck hends ufem ibaute bildschirm no paar alti videoclips brocht...hihi. ufem waeg hemmer no en churze stopp bi paar wasserfaell gmacht, sind aber noed lang bliibe. alli hend sich ufs bett und vorallem uf e warmi duschi, isch koerperpfleg wohl eher spaehrlich usgfalle i dene saechs taeg. am obig denn simmer alli zaemme no fein go aesse. de gustavo het no sini chinde mitgnoh und nochdem mir am mittwuch chli chillt hend in santa elena gohts jetzt witer uf ciudad bolivar. und doete erwartet ues drue taeg, zum hoechschte wasserfall vo de welt!
no en link fuer eu: http://de.wikipedia.org/wiki/Monte_Roraima
Advertisement
Tot: 0.114s; Tpl: 0.013s; cc: 10; qc: 56; dbt: 0.0543s; 1; m:domysql w:travelblog (10.17.0.13); sld: 2;
; mem: 1.2mb
