Salto Angel

noch de atemberaubende bergwelt vo roraima hets ues jetzt witerzoge noch ciudad bolivar, miteme chline stopp. hemmer naemmli scho in puerto ordaz de bus verloh, well bis zu saebem ziitpunkt noed sicher gsi isch, ob de flueger fuer di planti tour zu de angel falls vo bolivar oder ebe vo puerto ordaz goht. noch 2h warte, sind naemmli am fuefi acho, hemmer denn endlich de tourheini erreicht und mir hend miteme por puesto doerfe uf ciudad bolivar fahre. also vergebens usgstiege, aber egal...
in ciudad simmer denn inne hotel iquartiert worde. leider hets ebe i dere stadt fascht kei underkunftsmoeglichkeite gha, well grad irgend e fescht zu ehre vomene fisch, wo nur im auguscht usem orinocco zoge werde chan gsi isch. so hemmer mol fascht chli e luxusnacht gha und ich han endlich mol wieder fernseh choene luege (los simpsons...chch) i dstadt selber simmer denn auno gange, aber abgseh vo paar schoene koloniale baute rund um de plaza bolivar gits noed wuerkli vil zerwaehne. sind denn no fein go znacht esse und denn isches am morge frueh, vom 18te auguscht losgange richtig canaima und zu de angelfalls. mir hend richtig glueck gha mit de gruppe. zwor noed vo de groessi her, aber es sind alles jungi gsi. 6ire, 4spanier, 2tschingelis, 1venezuelaner und mir. mit chline tschessna flugzuegli simmer denn e stuendli uf roraima gfloge, immer zu fuenft i eim flugi. isch recht witzig gsi, leider hetmer aber bim hiflug ussert graue wolke nuet gseh. in canaima simmer denn vomene guide empfange worde und noch e bitzeli warte simmer denn uf e langs holzboot mit ussebord motor gstiege und hend ues richtig faell chaufiere loh. isch e mega langi fahrt gsi flussufwaerts. oeppe 5stund. eimol hemmer no muesse chli laufe, wells so starchi strohmschnelle gha het, dassmer noed mit de luetlis uefahre chan. de zweiti stopp hemmer fuer smittagesse (e troches sandwich) gmacht, wommer au chli hend choene bade. da hemmer natuerlich gmacht und i strahlendem sunneschii simmer denn witergfaetzt. wundervolli landschaft isch um ues umegseh mit de maechtige tepuys als highlight (sind aehnlichi berge wie de roraima). leider het sich de schoen sunneschii noed so lang ghebet und es isch cho go regne wie us chuebel. aber isch ues allne eigentli egal gsi, vorallem isches au nuemm so lang gange bis zum camp wommer uesi nacht verbrocht hend. doete acho hemmer uesi rucksaeck packt und ues i uesem friedliche herbergli (e huus, eifach nur mit dach und ohni waend, aber mit schmiiinee) de scherme ufgsuecht. wo denn dhaengematte ufghaenkt gsi sind hemmer ues chli ufs ohr ghaue bises znacht geh het. poulet mit riis. nochem znacht hemmer no chli mit de italiener und em venezuelaner plauderet und sind denn go penne. am morge simmer wie immer bi dene toure dur die ufgehend sunne gweckt worde. nochdemer alles zaemmepackt hend und mitem boetli uf di ander flusssite gange sind hetz en herrliche zmorge geh. gstaerkt und mit neuer energie hemmer ues denn uf de stuendig spaziergang gmacht ufe zu de angel falls. isch e riise voelkerwanderig gsi, so viel lueet hets gha. aber isch halt au sbekannteschte wo venezuela wohl zofferiere het. wommer denn bim fall gsi sind hani mir e guets plaeztli gscnappt und nur gstuuned. isch echt en idrueckliche ablick gsi und vorallem hetter sehr viel wasser gha, so dasses gad doppled idruecklich gsi isch. hend den au glueck mitem wetter gha und teilwiis sogar de ganzi fall gseh, wa noed wuerkli alltaeglich isch. nocheme churze bad underhalb vo de faell, fuer die wo hend woelle, simmer denn wieder zrugg zum camp. doete hets zmittag geh und nochig simmer wieder zrugggfahre mitem boetli noch canaima. am afang bi schoenem sunneschii und nochig bi stroehmendem rege. aber isch luschtig gsi, fascht wie riverrafting...zum glueck isch die ganz rueckfahrt nur 3 stund gange und mir hend ues denn i herrliche hotelzimmer doerfe niederloh und dusche. eigentli waeremer innere billigere abstiegi gsi, aber doete hets kei platz meh gha. isch ues au glich gsi. hihi. ueses zimmer isch i herrlich kitschigem leoparde-design deher cho. :-)
am obig am halbi achti hets denn znacht geh und nochdem mir de feini fisch...laolao oder sowas, gaesse hend (da isch etz ebe de, wo nur im auguscht ussem orinocco zoge wird) simmer zrugg zu dere hotelalag und hend zumene uebertuerede humpe bier en tschau sepp gspielt. de letschti tag denn hemmer no dlagune vo canaima aglueget und sind denn nocheme churze fuessmaerschli uebere insle zum salto sapo cho. en maechtige wasserfall, wommer chan hinedure laufe. da isch denn wohl au sabsolute highlight gsi vo dere tour. so oeppis geils hemmer alli wohl no selte erlebt. wie da tuet hinder demm wasserfall. isch eifach krass. de wind und die macht wo da wasser het. sehr sehr idruecklich. mir hend denn no chli baedeled und nochdem mir zrugg gsi sind und en feine zmittag hend doerfe gnuesse simmer wieder zrugg uf bolivar gfloge. die beide naecht bevor mir a kueschte goend chilled mir chli usserhalb vo bolivar innere herrliche alag...voila...i has etz gad agschnitte. noechschte halt rio caribe, karibik ¿iversuechtig(finds frogezeiche noed uf dere taschtatur) peace out...

---

---