Inselhüpfen

---

Copacabana (Bolivien):
Üse letscht Stopp in Bolivie isch Copacabana gsi. Da Städtli isch nöd zvowechsle mit em berühmte Copacabana in Brasilie. Das isch allerdings noch dem chline Örtli benannt wo mer üs drü Täg ufghalte hend. D'Hauptatraktion i seberä Region isch d'Isla del Sol im Titicacasee. Die simer selbstvoständlich au go aluege. S'Boot het üs am Morge früeh in Norde vo de Insle brocht. Vo döt us simer mit em Guide 30 Minute bergufglofe vobi a Grüeterrasse wo mit Sicherheit no us de Inkaziit stammet wenn nöd scho vo früehner und wo die Iheimische hüt no Herdöpfel, Quinoa, Bohne, Mais und Chrüter apflanzet. Bemerkennswert: Me kennt 4000 Sorte Herdöpfel. Mitte imenä Feld stoht de "Roca Sagrada". D'Inkas hend döt ihri Sünder uspeitscht. Die drü goldige Regle luut üsem Guide: Don't ä lie, Don't ä steal, Don't be lazy. Noch witerä 30 Minute berguf simer zunerä Tiwanaku/Inka-Ruine cho. Döt stoht dä Pumafelse, dä Gebuertsort vo de zwei erschte Inkas. Nebedzue isch de heilig Tisch mit de heilge 12 Stüehl. Uf em Altar wird au hüt no zwei Mol im Johr ä Lama gopferet. Die Tradition stammt vo de Tiwanaku. Und do sich die hütige Insulaner als d'Nochkomme vo de Tiwanaku vostönd, werdet ihri Traditione witergführt und nöd die vo de Inkas. Dodrus erklärt sich wieso das ä Lama gopferet wird und nöd än Mensch. Dä schönscht Spielplatz vo de Welt hend mir grad nochenä bsuecht. D'Dorfruine vo de Tiwanaku, wo hüt usgseht wie nä Labyrinth. Nocher simer drü Stund in Süde vo de Insle glofe uf rekonstruierte Inkaweg, schö langsam und schwer atmend, well mir uf 4200 m ü. M. gsi sind.
Am Palmsunntig het sich Copacabana inän farbige bluemige Strossemarkt vowandlet. Alli hend ihri Autos gschmückt und segne loh. Mir hend üs alli Müeh geh zum die letschte Bolivianos (Geld) loszwerde bevor mir in Bus noch Puno (Peru) gstiege sind.

Puno (Peru):
Puno isch ä wenig beidruckendi, normali peruanischi Stadt mit einerä Turistästross. Vo döt us chamer no die andere Insle vom Titicacasee bsueche. Mir hend d'Uros (Schilffinsle) und d'Isla Taquile gseh. Dä erscht Bsuech uf de schwimmende Schilffinsle isch beidruckend gsi. S'Volk vo de Uros lebt scho sit Johrhunderte uf selberbaute Schilffinsle und hend döt ihri ganz eigene Traditione. So hengets eifoch mol paar Insle zämä wenns ä Fescht hend und feschtet bis d'Insle vom vilä Tanze und wells während denä Täg kei neui Schilffschichte drüberleget halb under Wasser stoht. Sie hend au kei läschtigi Nochbuure, denn wenn sie sich nüme vostönd, sägeds eifoch d'Insle dure. D'Uros lebed vo Fisch, Schilffherze, vom Tuschhandel und neuerdings au vo de Turistä. Zerscht hend eigentlich kei Turistä uf de Insle wölle ha, denn sinds mit Solarzelle bestoche worde, wells kei Füür chönd mache uf em Schilff. Hüt löset sie sich langsam uf. D'Kinder gönd ufs Feschtland id Schuel und die meischte entscheidet sich für es anders Lebe.
Noch drü Stund Fahrt über dä wunderschö See, simer uf dä feschte Isla Taquile glandet. Döt hend üs vorallem die schöne farbige Trachte vo de Iheimische und die idyllisch Landschaft fasziniert. D'Manne träged stolz ihri selbergmachte Zipfelchappene. D'Farb zeigt dä Zivilstand und d'Art wiener sie treit zeigt inerä Vosammlig sin Standpunkt und bimenä Fescht signalisiert er anerä Frau sis Interesse. Sie antwortet indem sie mit de farbige Pömmel vo ihrem Schal spielt. Bim Hochziit den, nochdem sie zwei Johr lang zämä glebt hend, fiiret die ganz Insle nurs Bruutpaar chnület drü Täg i voschidene Hütene ohni ein Wank z'dörfe mache. Sie schlofed nöd, trinked nöd, essed nöd. Dä Sinn dähinder isch: wenn mers nöd mol drü Täg ushaltet wie den 60 Johr.

---

Photos

bi de Uros
Im Hindergrund gseht mer d'Segä.

Besametanz
traditionelle Hochziitstanz

Comments

[Vroni]

So viel Neus, wommer erfahrt üs euäre Blogs und gsieht vo dä Bilder. Faszinierend! Do ane werd i au no ämol reise. Damit i denn au vorbereitet bi, halti mi ab hüt sofort a die drü goldige Regle: "Don't ä lie, Don't ä steal, Don't be lazy." Hoffetli schribed ehr no vil über so fremdi Brüüch wiä: "Drü Täg nöd schlofe, nöd trinke, nöd esse". Wer cha denn da scho ushalte? Apropos: Gits i dä südamerikanische Länder au Oschteräbrüüch? I freu mi uf de nöchst Blog.

[moni]

Hoi ir 3!
Jo i cha mi denä kommentär nur aschlüssä, i wür jo überhaupt nöd gärn a euror stell si. ;-) Aso aber wenn öppert vo eu doch will dä rescht vodä reis mit mir tuschä ischäs also kei problem...! Bi üs isch gescht däfür dä osterhas do gsi und mir hend dörfä nestli suächä! (Beinah Rekord, i ca 20 Minutä hend alli iräs gfundä gha - hüli, mir müänd üs besseri versteck überlegä für nögscht johr) liebi grüäss

[Sonia Mexicanísima]

Hola viajeras!"
Cómo han estado?... por las fotos puedo decir que muuy bien, daría todo por estar disfrutando y conociendo todo lo que están haciendo ustedes, les quiero decir que las espero com mucha alegría aquí en México y por si quieren venir a conocer la ciudad en la que yo vivo y estudio(Guadalajara) una de las más tradicionales y al mismo tiempo bonitas ciudades de México, aquí tendrán mi casa como su casa por el tiempo que quieran... con un tour por la ciudad patrocinado por mí al igual que las comidas, en serio las quiero ver pero no sé si tendré algún fin de semana libre para ir a mexico-ciudad a verlas, sin embargo tengan por seguro que en el verano de 2008 me verán en St Gallen. Las quiero muuucho.

[Simone]

Halli Hallo Hallöle
Noch denä vilnä Oschterhasä und Näschtli, han ichs ersch jetzt gschaft än Kommentar z'schribä :-) Also dä mit denä drü täg chnülä, nüt ässä und trinkä war absolut nüt für's Simönli, obwohl do überleit mer sich's sehrwoschinli drü mol ob das jetzt dä rictig Maa isch.... :-) do wird sicher nöd so schnell gschidä bzw. denn wider ghürotä :-))) Eui Iträg sind würkli wiä immer richtig lässig gschribä, mä isch hald irgendwiä au däbi, so quasi im Handgepäck :-)) Do chunt so langsam dä Summer (au tschuldigung Däni dä Sommer) :-) und ich lauf au scho mit dä S(u)onnäbr(ü)illä dür gägend :-))) und Däni mir sind jetzt scho richtig mega hammer mässig mit Kricket-Hinderniss usgrüschtet, nur gönd jetzt so langsam aber sicher üsi Chuglä kaputt. Mir bstelläd jetzt denn än Satz neui :-) Ganz es liäbs Grüässli und bis zu Euem nöchstä Itrag, won ich (mir) mit Spannig erwartät Tschüssli zämä, bis bald