南美篇 - Rio de Janeiro

South America » Brazil » Rio de Janeiro » Rio de Janeiro
September 26th 2008

Published: December 3rd 2008

Edit Blog Post

shark7plus

Cristo Redentor

New 7 Wonder of the World & Landmark of Rio de Janeiro

<心目中的里約熱內盧>

諗起巴西里約熱內盧(簡稱Rio)，好自然先諗起足球，跟住就森巴嘉年華~ 直至真係着手plan行程o既時候就發現，原來Rio o的治安都真係幾差...好似講到打劫搶o野好common咁...大相機唔可以見光...仲要去之前無耐有單新聞係有的士上基督山o既時候被打劫...車上有四個中國人......到去打針o既時候，醫生又話Rio就係最多登革熱......雖然我o地亦都有聽聞有去過o既朋友話又唔係真係咁差......但始絡呢o的資訊都的確令我o地對Rio印象頗為負面...試想想，如果第一站就出事，都咪話唔灰!

話說上次講到Anna收到個消息...原來坐佢隔離o既一位女仕係o係巴西住o左好一段日子o既外國人...佢話佢不久之前又被搶完o野(下? 係咪咁common呀?)...提醒一下我們...而最重要o既係佢話俾我o地知我o地原本諗住去o個間hostel係o係o的貧民區附近!!! 佢仲叫我o地轉地方~ 一聽到呢個消息...我們這班驚弓之鳥即刻另外搵地方啦~ 幸好有呢位女仕o既幫忙...我們總算另外搵到間地點好一點o既hostel落腳~ 感謝主~

<基督山 - Cristo Redentor>

因為航班delay o既關係，我們o係Rio o既時間只剩下一天。所以只能揀那些「無理由唔去」的景點了，所指的就是新七大奇蹟之一的基督山。基督山其實係指座落於Corcovado mountain六七百米高山頂的一座耶穌像。我們選擇了乘纜車上去~ 同一車還有一個旅行團，當我們見到佢o地個個都身穿「重裝甲」o既時候...我們都心知不妙...別以為Rio一定是火辣辣的...現在其實算是南美的冬末初春...所以Rio的天氣都幾清涼下...再加上當日天陰又落雨(感謝主...我o地搭車去基督山腳的時候仲好大雨的...「恰巧」上到去就停雨了~) 仲要o係六七百米高山頂...都咪話唔凍...不過上到去能一睹Rio全景同埋耶穌像，我們都甚是興奮~ 說起來，在巴士上看，Rio的景觀不是太特別。不過在山上看就截然不同~ 既可看到Rio連綿數公里的沙灘(Copacabana, Ipanema & Leblon)，也可有城市中的熱帶森林，還有些奇形怪狀的山(好像Pao de Azucar和Leme)插在城市中間~!! 加上山上都幾大霧，市景跟耶穌像時隱時玩，就像跟我們玩捉迷藏一樣。影到耶穌像o既機會就好似天氣報告o既「呀?~~噢!~~」咁...算是為我們增添了些樂趣吧!

<不能錯過的還有甚麼?>

從山上下來，再逛逛沙灘(也許天氣麻麻...沙灘上人不是很多)和街道，話咁快就天黑了。這時宇欣說一定要買拖鞋，仲要買好幾對，因為佢的friend指定要呢個手信。其實我心裏一直有個疑問...乜巴西o的拖鞋真係咁特別的嗎?! 不過看看街上...又真係隨處可見這些Havaianas喎(勁多地方有賣同埋勁多人，特別係遊客着住)! 我們一直逛，直到見到一間有好多款的鋪頭，團友們立刻進入暴走狀態!! 不識貨的我則覺得它們好像人字拖版crocs....說起來，別以為在巴西的消費便宜...在Rio，特別是旅遊區，物格就好似美國咁...一o的都唔平...仲隨時唔抵過香港...不過Anna話我知呢度買Havaianas則比香港平勁多，所以她們都掃了不少。後來回來後發現Havaianas原來係那些「潮人恩物」，在香港買要成百幾二百(有多無少)，在巴西買圍返都只係六十幾七十幾港紙，仲要o的款色多好多...抵唔抵...我諗都唔使多講啦~

<還是太陽跟Rio合襯一點~>

我覺得每個地方都有跟它最合襯的顏色。第二天我們要離開Rio的時候，藍天一片，陽光普照~ 搭車時一路看見的景色，好像沙灘呀，湖呀，甚至街道，都披上了色彩，跟昨天的灰濛濛差得遠了~ 始終，還是陽光與海灘跟Rio合襯一點~ 希望有一天再有機會來欣賞一下陽光下的Rio~

接着下來我們將要為我們「非一般」的行程拉開序幕~ 想知係咩? 請看下回分解~!!

<小插曲 - Postcard迷了路?!>

Postcard真的會迷路嗎? hm...我不知道...但是我有張從墨西哥的Tijuana寄出的postcard用了一個月的時間才回到家...我真的還以為寄失了...勁唔高興...(感謝主~ 最後還是返到o黎~) 不過紀錄總會比打破...今次我們從Rio也各自寄了postcard回家...因為走的時候太趕了，所以交了給hostel的人幫我們寄。雖然唔係親手寄，但應該時間都唔會跟26, 27/9差好遠吧...結果...我個多月後回家都還未收到...仲要再過多個幾兩個星期先收到...真係呆o左...更奇怪的是我們四人當中宇欣竟然一早就收到了~ 但係我收到o既時候Anna同Shadow都仲係未有消息...還有令時事情再奇怪的是我的那張postcard上除了有巴西的郵戳外還有香港郵政的郵戳!! 究竟張postcard o係返屋企之前去o左邊度? 而佢又點解咁鬼耐先返o黎? 答案...真係一個謎.........

Additional photos below

Photos: 28, Displayed: 22