2 Days in Yosemite National Park

---

Zrugg zum Znachtesse in dr Zivilisation und um euch z'brichte, was mir die letschte beide Däg erläbt hän.
Dag 1 im Yosemite Park:
Näbe unserer Lodge het's e Restaurant, wo mir sin go Zmorge esse, denn das isch do eigentlig sälte bim Zimmerarrangement drby.
Und denn sin mir ca. ei Stund in Park ine gfahre. E grosse Teil vo dere Strecki het me immer wieder verkohlti Bäum oder was no drvo übrig bliebe isch, gseh. Aber mir sin au an ydrügglig hoche Felse und lauschige Plätzli am Fluss verby cho.
Denn sin mir im Yosemite Village acho und hän uns mit em Shuttle Bus zu dr Haltstell 'Yosemite Lower Fall' lo fahre. Es het in däm Park au wahnsinnig viel Touriste und es isch alles zimlig organisiert drum. Dört hän mir denn es paar Minute müesse ufe laufe und sin bi däm Wasserfall acho. Do aber momentan nid so viel Wasser obe abe chunt, isch s'Flussbett ziemlig trocke gsi und vieli Touris sin uf de Stei umme kletteret. Was es au ganz viel het in dem Park sind Eichhörnli und Reh, wo sich durch die viele Lüt aber nid löhn us dr Rueh bringe und nur es paar Meter wäg tüen grase oder umme hüpfe.
Nach ere kleine Zwüscheverpflegig sin mir denn wieder durch dr Wald zwüsche grosse Felsbrogge abe gwanderet. Und vo unde hän mir denn oberhalb vom 'Lower Fall' au no dr 'Higher Fall' gseh. Das isch schins dr 5. längschti Wasserfall uf dr Wält...
Mit em Shuttle Bus (wo uf ca. 12 Grad abeküehlt gsi isch!) sin mir zrugg zum Village gfahre und hän uns no e Kaffi bzw. e Glace gönnt, bevor mir wieder zrugg zur Lodge gfahre sin.
Dört acho, hän dr Christian und d'Felicia no dr Pool teschtet (es isch do momentan zwüsche 20 und 25 Grad warm und wenn d'Sunne abebrennt, sogar 30 Grad). Und nachdem mir au wieder frisch gwäscheni Kleider gha hän, sin mir ins Restaurant (en Art e Diner) näbe dra go öbbis esse und e Bierli trinke.

Dag 2 im Yosemite Park:
Hüt isch unseri Route über 'Tioga Road' Richtig 'Tuolumne Meadows' gange (ca. 1.5h Fahrt vo dr Lodge us). Do drbi isch d'Umgäbig ganz anderst gsi als geschter: fast wissi Felswänd (vo Witem seht's fast us wie Schnee...) wo z'mittst drus use immer wieder irgendwelchi Bäum wachse, Creeks (Wassertümpel), Tannewälder, See und z'hinterst im Tal lieblichi Wiese mit Bächli und Flüssli - ideal zum go wandere oder spaziere. Au mir sin e chli umme gloffe und hän uf de Felse unterhalb vom 'Lembert Dome' e Früchte-Rast gmacht. Leider het denn d'Felicia uf's WC müesse und mir sin wieder abe kraxlet und zu somene elende Plumpsklo (puuuuuh, het das gstunke, aber immerhin isch es suuber gsi und het Papier gha!). D'Felicia het denn no lang beschäftigt, wie das ganze Züg, denn vo dört unde wieder use chunt... ;-)
Damit's denn no für en Schwumm im Pool glängt het, sin mir ca. uf die drei zrugg in d'Lodge (d'Felicia het fast nüm use welle!) und jetzt ebbe zum go esse uf Groveland, wo mir wenigstens wieder Empfang und WLAN hän - es isch scho au erschreckend, wie fest me sich an dä Luxus gwöhnt het!!
Morn fahre mir denn vo do us witer (ca. 4h Fahrt) in Richtig 'Three Rivers', wo mir 2 Nächt bliebe und vo wo us mir denn dr Sequoia Nationalpark wärde go bsueche. Und schins het's im nögschte Hotel wieder WiFi, so as mir euch denn morn wieder wärde könne brichte...
Euch e diggs Druggi und mir finde's sooooo toll, as ihr uns via Blog uf dr Reis begleitet!!!

---