Arches Nationalpark

---

Wo mir hüt am Morge losgfahre sin, het bim Auto e Lämpli ufglüchtet 'Change Engine-Oil Soon'! Hmmm, was heisst 'soon'?!? Längt das no bis nach Las Vegas? Dr Byfahrerin het das meh Sorge gmacht, als am Fahrer, drum isch denn beschlosse worde, as mir nach em Zmorge (mmmmh, ändlig mol wieder Granola-Yogurt mit Frücht!) dr Autovermietig alüte. Die hän denn nur gfrogt, ob mir uns 'safe' fühle und do mir das mache, sött alles 'no problem' sy... Hoffe mir's mol!!
Denn sin mir es paar Kilometer zum Arches Nationalpark gfahre und hän dört die spezielle Steiböge bewunderet. Und immer wieder hän mir au gstuunt, was für Steiformatione as es do git! Unglaublig, as das nid um- oder abegheit!! So toll, eimol meh!
Uf em Ruckwäg hän mir bi Canyonlands Adventure e Stopp ygleggt und für morn e vierstündigi River-Rafting-Tour uf em Colorado River buecht, inkl. Halt mit Mittagesse. Kei Angst, es isch e kinderfründligi Tour ohni riese Stromschnelle...! Und mir freue uns alli sehr druf und sin gspannt!!
Zrugg im Hotel hän mir 4 liebi Daheim-Gebliebene via Face Time bim Jasse gstört ;-) schön gsi, euch gseh z'ha!!
Denn sin mir uns no chli im Pool go abküehle und d'Felicia isch eimol meh mehr unter Wasser gsi als drüber - sie will jetzt unbedingt könne schwümme und üebt fescht... ;-)
Zum go Znacht esse sin mir do wieder an d'Hauptstross und hän feini Pizza gha.
Jetzt goht's gli ins Bett, damit mir morn fit sin für unseri Bootstour.
Euch schigge mir e diggs Druggi und wünsche en schöne Sunntig!

---