On the way to Moab

---

Nachdem mir am Morge s'Buffet im Hotel gnosse hän (es isch e sehr e 'grüens' Hotel, aber sie stelle d'Klimaalag im Esssaal uf ca. 15 Grad y) und no chli telefoniert hän via Face Time mit div. liebe Lüt diheime, sin mir losgfahre Richtig Moab.
Knapp 3h spöter sin mir do acho - unterwegs isch es wieder immer grüener worde - und 2/3 vo uns sin in Pool und 1/3 het dr Ego-Joker yzoge und isch chli go chille.
Sit mir in Utah sin, sin mir übrigens nur no -8h zur Schwiizerzyt.
Denn sin mir do chli durch das Städtli gloffe, wo's vieli härzigi Restauräntli und Lädeli het.
In eim Restaurant sin mir denn en super Salat (mit Cranberries, Nüss und Geissekäs), bzw. Penne mit ere mediterane Sauce, bzw. en Burger mit Brie, Speck und karamelisierte Ziebele go esse und hän grad no emene live-Konzärtli vomene Gitarrespieler könne zue lose.
Morn wärde mir die spezielle Steiböge vo Arches go aluege.
Euch wünsche mir e schöns Wuchenänd und schigge e diggs Druggi

---

Comments

[René]

Ich schaff's au no ;-)
Hallo Ihr liebe Blogger! Bim 5. Versuech klappt's jetzt hoffentlich mit mim Itrag.... :-) Euri Biträg sin super! Au ich chumm mir vor, als würd ich mitreise. Ich bi ä flissige und amüsierte Läser. Machet bitte witer... Bi scho seeehr gspannt uf dr Blog vo Las Vegas :-)))) ä liebe Gruess René