River Rafting on the Colorado River

---

Go z'Morge esse sin mir wieder e feins Müesli mit Frücht, damit mir gstärkt gsi sin für dr hüttig Dag.
Denn am halb 12i isch es los gange mit unserer Tour! Mir hän alli e Schwümmweste becho und denn het uns e Büssli ca. 25' Fluss ufwärts gfahre.
Dört hän mir denn e kleini Yfüehrig kriegt, wie mir uns uf de Böötli sölle verhalte und vor allem au, was mache, wenn mir ins Wasser sötte plumpse...
Denn sin mir in unsers Boot ygstyge und hän unseri Hälfti vom Boot mit eme ältere, sehr nätte, amerikanische Ehepaar teilt - sie hätte glaub d'Felicia am Schluss am Liebschte grad mitgnoh ;-)
Nach ere gemütlige halbe Stund uf em Wasser, hän mir amene Strand aghalte und sie hän e riese Buffet ufgstellt gha, wo me sich dr Mage het könne vollschloh! Zuedem het me sich au chli könne abküehle im 22 Grad warme Wasser - herrlig!
Nach dem Rast isch es denn witer gange und es isch gli mol e zimlig heftigi Stromschnelle cho, wo zur Folg gha het, as dr Christian nüm uf em Rändli gsässe isch, sondern kurz ufgspickt worde isch und zuedem sin mir alli pflotschnass worde...
Denn het me in Fluss könne und sich näbem Blötli triebe lo. Und wär het das natürlig gmacht?!? Genau: d'Felicia!! Sie het das super gfunde und au do fast nüm use welle! Mir müend glaub an e Ort zügle mit mind. emene See... ;-)
Nach nomol 2 witere Stromschnelle sin mir denn am halb vieri wieder an Land gange und dr Bus het uns denn wieder do nach Moab brocht.
Mir hän das e absolut fantastische Dag gfunde, wo uns allne RIESIG Spass gmacht het!!!
Witeri Foteli cha me übrigens unter folgendem Link go aluege: www.moabactionshots.com
Denn sin mir rasch go dusche, hän e Wösch gmacht und sin no e letschts Mol do go z'Nacht esse - öbber vo uns het lut Felicia 'Krawatte' g'esse, wo sie au het welle probiere ;-)
Morn goht's nomol e längeri Strecki Richtig Bryce Canyon und mir sin scho gspannt, was uns dört no erwartet...
Euch schigge mir e diggs Druggi und wünsche euch en guete Wuchestart!

---