Advertisement
Published: January 18th 2010
Edit Blog Post
Castlegar stellt sich vor…
Sit mim letschte Itrag isch ja scho wieder einigi Ziit vergange und ich han scho wieder einiges erläbt. Ich han mittlerwiile o züglet u bin ietzt im chliine, aber schöne Castlegar. Aber aues schön dr Reihe nache.
Zrügg vo Maui isch eigentli nümme allzu viu los gsi in Vancouver. Mini Kollege si nach u nach abgreist u so isches de rächt ruhig worde. I hans aber i dere Ziit mau na nach Whistler gschafft. Zwar simmer nid goge skiine derte (isch viu ztüür) aber mer hei de Schnee süsch chönne gniesse u mir hei sogar en Schneemaa baue!
Nachher isch denn o scho glii Wiehnachte gsi u da bini am Heiligabe bir Krisi ihrere Gastfamilie iglade gsi. Das isch sehr cool gsi Wiehnachte mit mine Kollege chönne zfiire. Das derte na anderi Studente ir Family het heimer us jedem Land eis Gricht kochet oder bachet u so heimer de en riise Mix a Ässe gha, vo Fondue über Brate zu Risotto und venezualesischem Öpfelchueche. Am Wiehnachtstag säuber simmer de bi Fründe vo mire Gastfamilie iglade gsi u so hani denne chönne schwedisch-kanadischi Wiehnachte erläbe. Die Täg si aso sehr multikulturell gsi u natürli mit ganz en
huufe feine Sache :-)
Scho glii druf abe isch denn o für mich d Ziit cho zum packe u mis Zimmer ruume. De Tag vor i hett selle flüüge isch denn die grossi Überraschig cho - es Mail vo mim neue Gastmami, dass min Flug villich chönnti cancelled sii wägem Wätter in Castlegar. Mini neui Roommate het a däm Tag nämmli nid chönne flüüge wius ds Castlegar so näblig gsi isch. Nachdem i denn mis „Notfallszenario“ scho usklüglet han, isch denn aber am nächste Tag alles tiptop gange und d Sonia, mini koreanischi Mitstudenti bi dere Gastfamily, und ich sind pünktlich am halbi Zähni am Morge in Castlegar im Schnee acho. Es isch en interessante Flug gsi imne chliine, aber umso lärmigere Flugzüüg und isch das Mau o nur öbbe einehalb Stunde gange.
Am Flughafe bini de vo de Karina (mis Gastmami) und de Arija (mini Gastschöwster) abgholt worde. De Jim (min Gastvater) u dr Murphy (de absolut geniali Hund da) hei üs de i mim neue deheime begrüesst. Ich wohne ietzt also in Castlegar, das isch es chliises Städtli mit öbbe 8000 Iwohner im Süde vo British Columbia, öbbe 600km östlich vo Vancouver. Ich gniesses so richtig, wieder chli
amne chlinere Ort zsii, wieder chönne zmittst uf dr Strass zlaufe ohni gad überfahre zwärde, dass eim jede grüesst u dass jede mit eim redt. Es isch auerdings o es Städtli, wos relativ schwierig isch nöime härezcho ohni Auto. D Büs fahred nämmli nur öbbe föif Mal am Tag und vor allem nur Mäntig bis Samstig. So bin i halt zimmli abhängig vo mire Gastfamily u anderne Lüüt mit Autos, aber mini Gastfamilie fahrt üs eigentli überall häre oder holt üs ab, absolut genial u lieb. Ds Huus woni ietzt drinne wohne isch au voll cool. Es isch zimmli gross u vor auem hets viiiiuuu Fänster u grossi und helli Rüüm. Ich han denn ietzt o es riiesigs Zimmer, mit emne riiiesige Schrank, emne grosse Pult und emne grosse Bett - en Traum. Es isch aso fast dopplet so gross als mis drheime =)
Am Mäntig hani de am College mini zwe Ifüehrigstäg gstartet und han mau chli de Campus und die andere internationale Studente kenne glehrt. Ich han denn i dene zwe Täg o min Stundeplan chönne gstalte u de isch ietzt wirkli sehr abwächsligsriich. Ich han EASL-Kürs (English As A Second Language) und UT-Klasse (University Transfer). D EASL-Kürs
hani zwar weniger wägem Änglisch als wägem Spass gno. U vor auem hani dänkt isch das en gueti Glägeheit für mich, die andere internationale Studente chli kennezlehre. Die Lektione si de halt defür chli under mim Niveau, aber es isch für mich ietzt o na guet zum chli weniger schwierigi Klasse zha, wiu d UT-Kürs forderet mi gad na chli. I han Anthropology (über ethnischi Beziehige), History of the West Kootenays (d Region hie) und Peace Studies. Das isch aues sehr interessant, aber zum Teil halt scho gad chli sehr akademischs Änglisch. Und vor auem isches schwierig, glichziitig uf d Powerpoint zluege, zuezlose und Notize zmache. Vor auem mit em Gschichtskurs hani am Afang zimmli Müeh gha, wiu ich halt überhaupt ke geographischi Kenntnis vo dere Umgäbig gha han und au wiu i keinerlei Vorwüsse han über kanadischi Gschicht im Allgemeine… mittlerwiile bini aber o derte so chli drii cho.
Aber ds absolut beste hie in Castlegar isch natürlich dr Schnee! Die letschte paar Täg hets zwar grägnet, aber hüt Morge isch wieder aues wiis gsi, wunderschön. Natürli tuen ich da ietzt o flissig chli Wintersport betriibe. Letscht Weekend bini mit dr Karina, dr Arija und dr Sonia gsi goge
langläufle. Das isch ja schön interessant gsi… am Afang hei mich die dünne Skii gad chli überforderet, aber i bin na gli dri cho und es het denn o voll Spass gmacht. Aber ds normale Skiine isch ganz klar besser. So richtig goge skiine bini denn am Samstig. De Bastien het es Auto da u het na es Plätzli frei gha für mich u so bini de mit ihm, dr Marion, em Mathieu (aui us Quebec) u em Jan (eine vo de zwe andere Schwiizer am College) gsi goge skiine am Red Mountain. Es isch extrem cool gsi - wunderschöns Wätter mit em Ussicht uf ds Näbelmeer, geniale Schnee und es cools Skigebiet! Ds einzige wo mer chönnti kritisiere si die veraltete Sässelilift ;-) Es si natürli aues Schwiizer Sässelilifte, aber sie si uralt. Die Lifte wo ir Schwiiz ersetzt worde si vor zäh Jahr si aso na moderner gsi… aber anyway, mer chan nid immer gwinne :-) So würkli müehsam isch vor allem gsi, dass nur ein Sässelilift Fuessstützine gha het. U das geit de scho rächt id Bei… Am nächste Friitig hei mer de dr ersti Schneetag mit dr Schuel u i wage mi de mau ufnes Snowboard…
Christmas Day
Inna, Tamar, Linnea and me bi ja gspannt wie das usechunnt - wird wohl schief gha… Hals- u Beibruch :-)
Advertisement
Tot: 0.073s; Tpl: 0.013s; cc: 9; qc: 25; dbt: 0.0398s; 1; m:domysql w:travelblog (10.17.0.13); sld: 1;
; mem: 1.1mb