Maui

---

Aloha...

En Wuche lang wunderschönsti Natur, Sunneschii, Spass u en huufe cooli Lüüt. Das isch mini Ziit uf Maui in Kürze. Es isch absolut genial gsi, u i bi glaub a eim vo de schönste Ort uf däre Ärde gsi. Dert würd sichs aso läbe lo. Vor auem dr Lifestyle isch voll gechillt derte. Es laht sich niemerd stresse, aues verlauft rächt gmüetlich, u d Lüüt wüssed ds Läbe z gniesse! Aber aues schön dr Reihe nache.

Mir si am vorletschte Friitig Abe abgfloge uf Maui. Mir isch i däm Fall dr Andrew, d Kristin und ich. Sie han ich am PLI kenne glehrt u mir hei de beschlosse zäme en Wuche uf Maui z reise.
Agfange het denn das ganze na guet, ich han mini ESTA Nummere bir Gastfamily vergässe u han natürli ke Ahnig meh gha, wo genau dass ich die ufgschriibe han. I han denn also Mau mim Gastmami aglütet u sie het sie de zum Glück nach me Wiili sueche gfunde… ui hett das Närve kostet. Nachher hei sie de o na es riiese Züüg gha mitem Andrew sim Pass, wiu sie irgendwie gmeint heig er brüchi es Visa für id USA z reise u ds ESTA längt nid… Anyway, Mir si de auso am Friitig z’Abe spät im Banana Bungalow acho. Ir Nacht het die ganzi Umgäbig chli komisch gwürkt, u üse Taxifahrer het de o na gmeint, das seigi nid so die sichersti Umgäbig… wie au immer, am nächste Morge het aues wieder andersch usgseh. Mir si ufgwachet u hei de zerst Mau Palme u Sunne gseh, so steit mer doch gärn uf.
Ds Hostel het Free Tours abote, u die vom Samstig wäri en Hike gsi ufem Haleakala, das isch dr Vulkan derte. Mir hei natürli unbedingt welle gah, aber dummerwiis isch d Liste womer sich muen iträge scho voll gsi. So simmer de halt goge ichecke u hei de gfragt ob das irgendwie möglich wäri, derte na mitzgah. Es het de gheisse mer selled üs eifach Mau parat mache u dusse warte, es gäbi immer sönigi wo im Usgang gsi sii u nid ufstöi. Mir hei de z Glück gha, dass mir üs schnäu gnueg parat gmacht hei u dusse gstande sii u dass es na genau drei Plätz het gha. Mir hei de auso mit chönne.
Mitem Büssli ischs denn also ufe Haleakala ufegange. A däm Tag simmer insgesamt dür 12 vo de 14 Landschafte cho. Andersch cool. Mir si de auso vo Meereshöchi uf 3000 Meter über Meer uegfahre u hei de derte i zwe Gruppe üse Hike gstartet. Zerst Mau simmer i Krater abeglaufe u i bin mer vorcho wie ir Wüesti. Je wiiter dass mer aber cho si, desto meh grüen hei mer gfunde. Nach öbbe acht Meile heimer de de Krater durquert gha u de heimer na vier Meile müesse uelaufe, damit mer wieder zum Krater uscho si. Es isch zwar na gad rächt asträngend gsi u i bin mer vorcho wie i de Schwiizer Bärge, aber d’ Natur isch eifach atemberaubend u wunderschön! Zrügg bi de Büssli simer de namau ganz ufegfahre bis zum Science Center u hei derte dr Sunneuntergang glueget.
Mir hei a däm Tag o scho mit einige Lüüt chli chönne gsprächle u hei en erste Idruck becho, vo de Lüüt wo süsch na so im Hostel wohned. U vo däm Tag här heimer en fantastischi Ziit gha in Maui u heis so richtig gnosse. Mir hei de o jedi Tour chönne mitmache u hei so rächt günstig sehr viu gseh.

Am Sunntig simmer de a Strand ga relaxe. Big Beach u Little Beach isch ufem Programm gstande. Derte ischs wunderschön u Little Beach isch chli de Partybeach, aber o na rächt schräg wius en Clothing-Optional-Beach isch. Wie au immer, mir hei d Sunne u ds Meer so richtig gnosse.

Am Mäntig simmer de namau goge Hike. D Insle isch eigentli sochli dreiteilt. Uf dr einte Siite isch dr Vulkan, de chunnt ds Tal, u uf diesere Siite isch de ds Iao Valley. Das isch gröschteteils Rägewald u derte simmer goge hike.
Mir si ufen Bärg ueglaufe u hei de vo derte chönne die wunderschöni Ussicht uf Wailuku u ds ganze Tal gniesse. Es isch na rächt speziell düre Dschungel z hike, wiu irgendwie muesch immer glichziitig ufe Bode und uf Chopfhöchi luege, dassd nid irgendwo inelaufsch. Zudem isches teilwiis o rächt steil gsi, u mer hett scho meh müesse chlättere als hike… u das stellt sich also na als schwerig use, wenn dr Wäg so sandig isch… Mir hei de o Strawberries u Kaffi gfunde ufem Wäg derte ufe. Wieder dunde im Tal simmer de i Fluss goge bade. Ui isch das chalt gsi, aber nach somne Hike ebe gliich o agnehm.

Womer de am Mäntig zrügg cho si, isch d Liste für d Tour nach Hana leider scho voll gsi. Mer hei de aber erfahre, dass en Kolleg vom Adam u em Matt (das si üsri Tourguides gsi) mit me zuesätzliche Auto wird fahre. So heimer de am Zistig glich mit uf die Tour chönne u i wür ietzt Mau säge es isch üses grosse Glück gsi, dass mer mit em Luca hei chönne mitgah. Mer si de auso im Banana Cruiser, ds uralte Auto vom Hostel wo aber uu cool isch, ufe Wäg nach Hana. Die Strass het über 600 Kurve u zahlriichi chliini Brüggli, isches aso definitiv wärt. De Nick isch o na mitcho mit üs (er het sichs im Kofferruum gmüetlich gmacht), das isch en Franzos wo o irgendwo im Hostel wohnt für längeri Ziit. D Kristin u i hei de ämu es riese Gaudi gha uf dere Fahrt u mer het o Mau chli mit dene Lüüt chönne gsprächle, womer süsch haut nid so chan, wemmer mit de grosse Büssli unterwägs isch. Das Auto isch denn also o es Abentüür gsi. Dr Alasser muemmer zerst Mau astecke u de het mer de sones Kabel mit emne Hebeli am Ändi, womer de chan drücke damit de Motor startet. Chum simmer de abgfahre, isch de plötzlich ds Handschuehfach usegheit… normau für das Auto… =) Ds Dach vom Auto isch inne vollgschriibe gsi, u o mir hei üs dörfe verewige.
Dr ersti Halt isch de bimne Bananabread Stand gsi, u das isch aso voll fein. I weiss zwar nid gnau was dass das mit Bread ztüe het, isch eigentli meh en Chueche. När isches denn wiiter gange zure Höhli, womer het chönne drinne schwimme. Vo derte simmer de an Black Sand Beach gloffe. Wiiter gange isches denn zumne Barbecueplace. Derte hets de wieder Mau sones riichtig guets schöns Schiinssteak gää, isch das fein gsi! Vo derte simmer de anen andere Strand go bade, vo üsne Tourguides Salt and Pepper Beach gnennt, wiu de Sand wirkli öbbe so usgseht. Nachhär simmer zu de Seven Sacred Pools. Das isch Meerwasser wo mängisch id Bucht inechunnt u de derte wiene See biudet. Es het de derte o en Fels, womer chan abegumpe. Zum Schluss simmer de an Red Sand Beach, allerdings nümme go bade, sondern nur na chli ga d Natur gniesse =). Vo derte isches de wieder zrügggange ids Hostel u d Krisi u ich hei namau üse Spass gha i däm Auto - gueti Musig, gueti Luune, viu glachet =) Plötzlich het de dr Luca aghaltet u Motor u aues abgstellt u mir hei scho dänkt er heigi ke Benzin meh… de isch er de aber so haube usem Fänster useklätteret u woni ne de gfragt han was los isch, hett er de nur so gmeint lueg mau d Stärne aa… so viu zum Thema sich uf d Strass konzentriere bim fahre. Anyway, han wirkli na säute sone schöne u klare Stärnehimmu gseh!

Am Mittwoch simmer de goge schnorchle. Mir hei sogar chönne mit Schildchrote schwimme. Das isch andersch cool. U womer an Strand cho si heimer o na zwe Buggelwale gseh gha. Die sie mega im Züüg umegumpet u hei ta u gmacht, voll idrücklich. Nachem schnorchle simmer de uf Lahaina gange, zerst ids Whaler’s Museum. Dert isch so chli d Gschicht vo Lahaina beschriebe wie sie sich vo de Walfangstadt pur zur Walschutzstadt entwicklet het. När simmer de o na zu sonre grosse Buddhastatue, was natürli vor allem füre Andrew ds Highlight vom Tag gsi isch. U woner de es paar Asiate gseh het, het er sich de o gad sofort wieder drheime gfüehlt ;-)
Zum Schluss simmer de na ids Städtli säuber u i bin mer de chli vorcho wie am Mittelmeer i dene Ferieregione. Eis Souvenirlädeli nach em andere u o mau en Glacestand. I han de aso na es Ananassorbet becho, ganz fein, müesst mer ir Schwiiz aso o na ha. D Kristin u i si de chli goge lädele, de Andrew het beschlosse er göch es Bier goge trinke…

Am Donstig simer de scho uf üsi letschti Tour gange. Mer si namau go schnorchle, aber amne andere Ort. Mir si ds Turtletown gsi, was eigentli en blöde Name isch, wius derte gar nid so viu Schildchrote git. Mir hei aber gaaaaaanz viu verschiedni Fische gseh u das het das ganze entschädiget =)
Wiiter simmer de a dä Ort, wo ds erste Mau öbber uf Maui glandet isch. Das isch en wunderschöne Ort, mit de Rägewaldsiite vom Vulkan hinde, u em Meer vorne. Ganz genial. När simmer de zrügg uf Kinei, es wiiters Touristeörtli. Derte simmer de zerst en Mai Tai go nää (schiins de besti uf Hawaii u guet ischer auso gsi…) u när simmer goge sunset luege, once again.
A däm Tag heimer o Mau na chli öbbis meh über üsri Tourguides erfahre u es isch uu cool gsi. Mer hei de aber o brichtet becho, dass die na relativ krassi Arbeitsbedingige hei. Sie si o Traveller (si vo California) u hei ken wirkliche Arbeitsvertrag u kenned o die gnaue Richtlinie nid, wo sie müessted ihalte… sie chönnd eigentli us jedere Lust u Luune vom Manager entlah wärde, u sie hei o scho Troubles becho, wiu dr Adam schiins zwenig Infos git uf dr Tour u wiu sie d Hana Tour liecht abgänderet hei (was auerdings de meiste sehr pässlet het…). Anyway, sie nämeds rächt easy, u läbed eifach chli nachem Motto every day could be your day… aber isch scho na krass, die letschte 20 Täg si 8 Lüüt entlah worde…

Am Friitig ischs de scho wieder ads packe gange, d Sunnecreme isch ufbrucht gsi u ds chalte u nasse Vancouver het uf üs gwartet. Dr Luca isch de so nätt gsi u het üs a Flughafe gfahre u so heimer de o namau chli chönne Banana Cruiser fahre =) Aber isch na lustig gsi, am Flughafe isch er de vor Polizei kontrolliert worde… si hei de aber glich nüüt uszsetze gha, wiu fahrtüchtig isch de Cruiser ja.
Mit zwe Stund Verspätig simmer de schlussendlich z Vancouver usem Flugi gstige u hei einisch meh all die Kontrollfrage über üs ergah lah.

Es isch wirkli en cooli Wuche gsi. I han so viu lässigi Lüüt dörfe kenne lehre, cooli Gspräch füehre u last but not least hani o einiges dörfe lehre über die asiatischi Kultur u i han gmerkt wie andersch dass mir Schwiizer reised als d Asiate… mir nämmed aues viu gmüetlicher. Nid chum im Hostelzimmer (wenn überhaupt scho) d Frag u was machemer ietzt… aber die Kulturunterschiede hei üs o immer wieder zum schmunzle bracht u aues i auem isches wirkli awesome gsi! One day I’ll go back there…

---

Photos

typical Haleakala flower
wachst nur in Hawaii...