The first part is nearly over...

---

The first part is nearly over…

D Ziit vergeit unglaublich schnäu hie. Letscht Friitig hani bereits mi letschti Tag gha am PLI. Chans chum glaube, dass die erste 12 Wuche scho düre si. Jetzt heissts aber nanid ganz Ferie, am Donstig hani na mini schriftliche Proficiency-Prüefige. Die mündlichi hani gester gha. Isch nid brilliant gsi, aber doch okay.
Nach einige sehr trüebe u rägnerische Wuche, het mittlerwiile d Sunne dr Wäg zrügg nach Vancouver gfunde u mir hei ietzt en wunderschöni, wenn halt o rächt chauti Wuche hinder üs (u es sett na chli so wiiter gah :) Mer hei de o wieder chli meh unternoh, wenn o meh richtig käfele aus richtig sightseeing. En grosse Teil vor Stadt kenne mer ietzt haut scho. Aber mau alles chli de Reihe nache.
Afangs November hanis tatsächlich mau na ids Aquarium gschafft. Das isch sone Art Unterwasserzoo u isch henne cool. Die hei derte unter anderem o en 4D-Film. Das isch aso na rächt speziell u zum Teil scho fast chli beängstigend… u definitiv nid ds Beste für so schreckhafti Lüüt wie mich. Do sticht eim zum Bispiu plötzlich öbbis i Rügge, oder öbber sprützt di a… i han ämu wirkli ds Gfüehl gha i seig zmittst drinne, isch wirkli uu cool gmacht.
Einisch simmer bim Znacht gsi u när het plötzlich dr Clive (Brüeder vo mim Gastmami) aglüütet. Sie si im Auto ghocket vor ihrem Huus, vor ihne zwe Waschbäre u sie hei sich nid getraut uszstiige… mir hei sie de schlussendlich chönne drvo überzüüge, dass d Waschbäre scho nid soooo gföhrlich si u sie si de so schnäu wie möglich ids Huus grennt. Mir hei ämu öbbis zlache gha :)
Einisch simmer de im Sportsmuseum gsi, das isch wie en Spiuplatz für Grossi… Basketball, beweglichi Chlätterwand, Airhockey, Töggelichaschte, Ishockeytöggelichaschte, Unihockey, 100-Meter, Minicurling u na einiges meh.
Am 11. November isch denn hie Remembrance Day gsi, sprich mir hei frei gha u si de ane offizielli Zeremonie goge luege. Es isch rächt idrücklich gsi, aber o rächt schräg so drissg-jährigi Chriegsveterane z gseh, wo in Afghanistan gsi si. Für mich sie die eifach zjung, zum scho Veterane zsi. Krass het mich o de unglaublichi Nationalstolz vo de Kanadier tünkt, gad au vo all de ibürgerete Kanadier. Mer merkt wirkli, dass das ihri Heimat isch, u dass sie stolz si, chönne Bürger vo Kanada zsii!
Amne sunnige Tag bini de mit de Kristin im Lighthouse Park gsi. Vo derte het mer en wunderschöni Ussicht uf Downtown u mit de Wolke u dr Sunne hets sone richtig cooli Stimmig gä. Ufem Wäg dert häre, heimer de en Maa troffe, wo ursprünglich Schwiizer isch, aber scho sit öbbe zwänzg Jahr hie wohnt. Isch na lustig gsi mit ihm z gsprächle, u mir hei ne sofort als Schwiizer chönne identifiziere, da er en Coop Täsche drbii gha het :)
Unterdesse bini o es paar Mau ufem UBC Areal gsi. Das isch wirkli riesig u es isch eigentli chli wiene eigni Stadt, es het wirkli aues derte. I bi de o zimmli froh, dass i nid derte muen studiere, wiu i glaube i wür so zimmlich nüüt finde, ämu nid im erste Semester… Es isch aber wunderschön, es het en eigne Strand u o en botanische Garte (wo äbefalls rächt gross isch) u über Pflanze vo aune Kontinänte verfüegt. Mir hei sogar en Adler gseh derte (Eichhörnli si afe nümme erwähnenswärt…).
Letschti bini o mau na am ne NHL-Spiel gsi: Canucks gäge LA Kings. Isch aso na rächt interessant gsi. Es isch zwar nid ds Beste Spiu gsi woni bis jetzt gseh han, aber o nid gad schlächt. U d Atmosphäre hie im Stadion isch so ganz andersch aus imne Schwizer Stadion. Obwohls fascht zwänzgtuusig Lüüt het gha, ischs fast mucksmüüslistill gsi, usserd ds Maskottli het d Lüüt gad chli animiert oder es het es Goal gää. Da chöme d Lüüt definitiv meh zum ds Spiu luege u analysiere, aus wäge dr Atmosphäre. Am Schluss isch rächt schräg gsi, chum isch abpfiffe worde, si aui Spieler abem Iis u ir Kabine verschwunde. Nur de besti Spieler vo de Canucks isch zrüggcho, de vo de Kings isch gar ndi erwähnt worde… u so öbbis wienes handshake kennt mer da o nid… Defür wird da am Afang immer d Nationalhymne gspiut, aso die vo Kanada u dr USA. Isch na idrücklich… u ds ganze Stadion singt mit :)
Wos de dr ersti Morge so richtig chaut gsi isch, hei de natürli o aui Büs Verspätig gha - gfrornigi Fahrleitige. Aber i han na Glück gha, woni ad Bushaltestell cho bi, si gad füüf Büs mit em 17ni hinderenand cho, u i han chönne uswähle… Zwe devo si de auerdings en anderi Route gfahre, ir Hoffnig ihri anderthaub Stund Verspätig wieder chli chönne uszgliche. Ei Frau het de nur so gmeint: How is this gonna work during the olympics… :)
Ja u am Friitig isch de scho de letschti Schueltag gsi. Mer hei drei verschiedni typischi Schwiizer Chüeche gha für ir Pause, isch uu fein gsi u üsi Lehrer hei riesig Fröid gha dranne :)
Jetzt namau chli lehre bis am Donstig u am Friitig geits de fürne Wuche uf Hawaii. Fröi mir riesig!

---