First school day

---

Hello there!

Hüt morge isches s erste mal id Schuel gange. Grimsdyke School heisst eusi Schuel vode 1. bis 6. Klass und liiht öppe 10 auto-minute vo eusem dihei wägg. Es isch e mittelgrossi Schuel und het pro Jahrgang zwei Klasse. D LehrerInne sind alli mega nett und mir hend e kompletti Füärig vode Mrs. Marrow becho. Nachr simmer denn inere 4. Klass bimene recht lustige Lehrer gsi und hend mal chöne aacho und erlebe, wie das da so zue und häär gaht. Pro Klass hetts öpe 30 chind und alli hend en roote Pulli mitem Schuellogo ah. Es git fü d chind gwüssi Hose/Röck wos döfed alegge und es gseht rächt härzig us. Eus hät d art vom Schuelgeh rächt verwirrt bis ez. D chind höckled a Gruppetisch und es isch gern recht unruhig, wobi das d Lehrer nöd z'störe schiint. Au ide 5. Klass am namitag isches recht turbulent zue und här gange ide Stund.

Grundsätzlich gits scho en Stundeplan, aber de chönd d Lehrer rächt flexibel handhabe (Sport wird all wuche chli verhandlet und au alles andere isch recht optional) und somit sind d Stund au ned so klar abgränz. Es gaht igendwie vom einte zum andere und zrugg. Au isches eso, dass imr öpe 2 Lehrer en Assistänt händ und die lueged au uf d chind oder lueged uf die chind wo spezielli Bedürfniss hend und so isches igendwie chli es cho und gah, da d Zimmertüüre meistens offe sind.

Mi sind rächt verwirrt gsi ab dere wuslige betriibsart da ide Schuel. D lüüt sind alli mega offe und reded i eim tempo mitenand und mit eus, aber mi schlönd eus ganz ordentlich. D chind findet eus uh spannend und sind eigentli recht diszipliniert, aber mängisch au völlig nööd 😉 mal luege wie das no wiiter gaht. Im moment gsehts so us als ob mir 2 wuche i allne mögliche Klasse werded zueluege, aber filicht oder hoffentlich laht sich das ändere... we will see....

Nach eme Tag ide Schuel simmer den schnell hei düsed zum go fuessball luege. Euses Gastmami het eus no es stuck begleitet, damit mir s Pub au sicher finded und nach öpe 15min hemmer s "Pinner Arms" beträtte. Churzerhand hemmer eus wider es Strongbow bstellt und hend dank de Gwenda gwüsst, dasses im hindere Teil vom Pub no e extra Bar hät wo di junge Fuessballer vom Ort sind. Mir händ eus no en Stehplatz ade Bar chöne ergattere und scho isches los gange. D Hymne hät gäg eusi Erwartig niemert gsunge, es hätt aber e aagspannti stimmig ghärscht und wo den ide 30. minute s gool gfalle isch häts keis halte meh gäh. "Eeeeenglaaaand, Eeenglaaand oooh Eeeengland", häts ganze Pub gsunge und mir zmitzt drinn. Di junge und au ältere Bsuecher sind voll debii gsi, händ aber glaub s spiil vo ihrem Team au ned sooo toll gfunde und natürli isch de Schiri stets aagmotzt und verfluecht worde (die händ e sprach da, gar ned di feini änglischi Art 😊 ). Nachem 1:1 het den chli bedrückti Stimmig ghärscht und s Bier isch nomeh in Ströme gflosse als vorane (die trinked das wie es Kamel Wasser). Nach 90minute hets Applaus geh und mir sind hei gwagglet im Räge.

D Gwenda hät eus scho erwartet und eus den feini Sausagges (so scharfi Würstli) und Härdöpfel gmacht. Zum dessert hämmer no d Rhabarbere-Crumble fertig verputzt und de Tisch gruumt damit ihre Ehemaa no öpis cha nähiä (ja das macht er nöd si 😊 ).

Hope you are well, lots of hugs, stay well 😊

---