Last day in L.A.

---

Was für e Freudedag hüt!!!
Mir hän erfahre, as gueti Fründe vo uns (ändlig) hürote! Mir freue uns druf, Nic & Marco...!!!

Und denn isch hüt ÄÄÄÄNDLIG au no d'LOUISA YARA uf d'Wält cho!!! Härzlig Willkomme du kleins Wunder! Und härzligi Gratulation Isa & Daniele! Mir freue uns druf, die klei Prinzässin denn in 4 Wuche persönlig dörfe kenne z'lerne...

So isch es cho, as mir am Morge diversi Face-Time-Telifon gmacht hän - schliesslig hän mir das Gottimäitli scho au live welle seh und die freudigi Nochricht diverse Lüt welle verzelle!
Sunst hän mir hüt en Dag im und ums Hotel umme verbrocht.
Am Morge sin mir in d'Coin-Laundry do näbe dra und hän unseri Wösch mol in somene typische Betrieb gwäsche.
Zuedem sin mir uns bi dr Post go erkundige, was es koste würd, all die Kleider und Schueh, wo für liebi Lüt diheime sin, z'verschicke. Mir hän jetzt mol alles fyyn-süüberli imene Päckli verstaut und luege denn am Schluss in Las Vegas, ob's vom Gepäck nid doch würd länge, das in unserne Köffer mit z'neh.
Denn sin mir öbbis go esse und am Nomidag sin zwei im Wasser y- und untertaucht und hän Bekanntschaft gmacht mit 2 junge Type vo Münchestei. D'Felicia isch froh gsi, ändlig mol öbber um sich z'ha, wo au Schwiizerdütsch redet und het sie grad belageret und voll quasslet und in ihri Rollespieli ybezoge ;-)
Die dritti im Bund het mol ihri und dr Felicia ihri Köffer neu packt, so as sie jetzt parat sin für die nögschte 15 Däg - puuuh, isch das es Buff gsi!
Zum Znacht sin mir (doch nomol mit em Auto, aber das mol sicher parkt imene Parking) nomol in das feine asiatische Restaurant.
Jetzt sin mir froh, as es morn mol wieder witer goht, obwohl uns L.A. sehr gfalle het! So mache mir uns morn am Morge denn uf dr Wäg Richtig Twentynine Palms, wo mir dr Joshua Tree Nationalpark werde go bsueche.
Euch schigge mir e diggs Druggi

---

Comments

[Caroline]

Gotthard
Hallo Ihr Liebe! Ändlich isch es mol spannend gse, durch dr Gotthard z'fahre... Ha Euri Biträg gläse und mi beschtens amüsiert :-) Mutzi