San Pedro de Atacama - Wüesti Schönheit!

---

Da bini aso glandet, irgendwo ime chline Dörfli die Wüesti, wos Wasser Mangelwaar isch. Bide Duschene die Hostels wird nöd länger als 3 Minute dusched, was mir erstundlicherwiis liecht fallt, da sWasser sauchalt isch 😉 Bide Hiifahrt bim hämer natürli en Halt bim Zoll gmacht zum Stämpel ihole und zum prüefe, dasmer kei Obst und Frischwaar mit übere schmuggled. Will die chilenisch Gränzübergang zimli sträng isch, hädmer nöd mal ei einzigi Banane defe überd Grenze nee! So han ich mich amne Banane-Ässende-Grüppli vo Touriste, Chilener, Argentinier und Co. agschlosse, bevormer s Stämpfeli sind go abhole.

Nach dem erfolgriche Banane-Ritual bini dän am Abig nach Sunneuntergang in San Pedro de Atacama acho, da häts mi fascht hineusegjättet wohni in Himmel usegluegt ha!! De Aablick vo dere klare Sternenacht isch fasch surreal.. Milchstrass, Oreon, Southern Cross, alli Sterne gset mer sunneklar. Wili nochli meh über die ganzi Sterne-Himmel-Gschicht ha wele wüsse, hani grad e Astronomie-Tour buecht. Aber zersch bini no s Moon Valley go aluege. E Landschaft ganz die Nöchi vo San Pedro (4km) wo usgseht wie ufm Mond… wobii ich mich eher echli hinderem Mond als ufem Mond gfühlt ha. Bin glaub chli beduslet gsi vode Höchi womer gsi sind (knapp 3 000 metros sobre el mar) 😉 oder ä bizli high vo dere gigantische Ussicht!

De negschti Abig hani dänn es Date mitm Sternehimmel gha. Oise Guide hät en hufe intressanti Sache verzellt, wohnimer aber leider nöd so vil ha chöne merke will di ganzi Astronomie no cheibe komplex isch! Ich bi eher abglänkt gsi vomene komische Grüsch vonre flotte Dame näbed mir, wohni aber nöd gseh han wils ja stockdunkel isch. S hät so grumoooret und ich han no dänkt die arm hät ja krassi Buuchproblem! Wosi dänn gmerkt hät das ich mich mal nach ihre umdreit han, hätsi dänn erwähnt dases ihres Baby isch, wo si vor sich ghebt hät und Friede Freude Eierkuchen am vor sich hiischnarchle gsi isch 😉 hihi, herzig!!

De Höhepunkt isch dänn ganz am Schluss gsi, womer händ defe dur 7 verschideni Teleskop duregügsle und i eim hätmer de Saturn uu guet gseh!! Rächt intressant, au wänner genau so usgseht wie imene Bilderbuech vo früener 😉

Nach dere intressante Sternenacht bini dänn i mim Bunker-Hostel voll zfride igschlafe und denn hani wiedermal drahdänkt was füres schöns Läbe ich eigentlich am gnüsse bin =) Am nächste Morge hani früeh us de Fädere müese, min negste Ufenthalt heisst Bunkerhüttli zmizzt die Wüesti. Ab geht’s durd Atacamawüesti uf Bolivia mitme 4x4 Jeep!

---

Photos

Komischi Gstalte ide Salzwüesti!
Oise Guide hät verzapft, dass die drü Kreatione rechts "die drü Marias" sind. Da en Tourist aber die Figur inks hät wele bechlättere, isch si umgfalle :P

Volcano Lincancabur
ufem Wäg nach San Pedro de Atacama (Höchi: 5 400m)