Von El Chaltén nach Villa O Higgins

---

D Gränze zwüsche Argeninie und Chile verlauft uf dr ganze Linie entlang vo de högschte Andekämm und de Wasserscheide zwüschem Atlantik und em Pazifik. Grundsätzlig darf me die Gränze nur an ganz bestimmte Gränzübergäng überquere. An däne hets an beide Site Zollstatione wo die ganze Zollformalitäte abwickle (Usreiseformular entgegenäh, Usreisestämpe in Pass mache, Ireiseformular usfülle, Iresiesstämpel in Pass und unter Umstände au Gepäckkontrolle, dass me keini Unerlaubte Ware mitnimmt (Frücht & Fleisch, oder sunschtigi Früschprodukt). Die meischte Gränzübergäng sind als Passstroosse oder Fähriverbindige für dr öffentligi und privati Verkehr usgleggt. Es git aber au Gränzübergäng (also mindeschtens eine) wo nur z Fuess oder per Caballo (Ross) überquert wärde könne. Eine drfoh (also dä einti) isch nördlich vo El Chaltén und füehrt über 22km über e kleine Pass nach Villa O Higgins. Do dä Übergang schlächt erschlosse isch, isch är au ziemlig unbekannt und isch in de wenigschte Reisefüehrer überhaupt erwähnt.

D Maya, e Israelin wo n ich in Puerto Natales kenneglernt han, het mir als erschti vo däm Übergang verzellt. Sie isch dört drüber vo Chile nach Argentinie ko, also in umgekehrter Richtig. S Interessante an däre Route isch, dass sie El Chaltén uf em diräkte Wäg mit em südliche Ändi vo dr Carretera Austral verbindet. D Carretera Austral isch e Nord-Süd Stross im chilenische Patagonie wo unterem Regime vom Pinochet, vorerscht vor allem us militärischem Interässe, baut worde isch und die südlichste Regione vo Chile mit em Norde verbindet.

Ich han mich drufabe avo genauer drfür interessiere und im Internet au e paar Informatione gfunde, allerdings nid so wirklig handfeschti Sache. Klarer isch die Sach denn in El Chaltén worde: ich han die MerMoz Reiseagentur gfunde, wo mir super witergholfe het. Die Frau isch wirklig sehr hilfsbereit gsi und het mir au abklärt, ob ich denn an de verschiedene Destinatione au sicher e Uebernachtigsöglichkeit han. Aber vor allem het si mir alli Priise vo de einzelne Verkehrsverbindige und Uebernachtige könne saage, denn weder in El Chaltén, no sunscht imene Ort während de nögschte 500km oder 7 Tag gits e Bancomat. Zum Glück ka me in El Chaltén an einige Ort wenigschtens mit Kreditkarte zahle. Ich han denn eifach im Restaurant immer für alli mit VISA zahlt und denn s Gäld wieder zämmegsammlet - und so bi de andere Trefvellers s Klischee vo dr Schwitz als Bankestaat au grad no bitz ufpoliert ;-)


Am Fritig am Moorge bin ich denn mitemene Bus vo dr MerMoz Agentur abgholt und an 35km entfärnte Lago del Desierto gfahre worde. Vo dört isch es mitemene Schiff 12km uf em See witer nach Norde gange bis zum Punta Norte. Dört isch dr Argentinischi Gränzposchte. Dr Poschte isch s ganze Joor über bsetzt, aber nur im Summer terrestrisch erreichbar - im Winter hets dört ca 2m Schnee d Gränzpolizischte wärde nur no vo Zit zu Zit mitemene Helikopter (in Südamerika ä högscht sältens Verkehrsmittel) versorgt - ziemlig e einsame Ort, aber sehr schön gläge am See!
Ich bin denn uf die 12i am Mittag dört akoh. Dr nögschti Abschnitt vo dr Reis - 22km Wanderwäg übere Pass an Lago O Higgins zur chilenische Gränzstation - isch eigentlig mit 2 Ross plant gsi (eins fürs Gepäck und eins für mich). Die hätte vo dr chilenische Site här uf di 12i am Mittag am Gränzposchte sötte akoh. Do mich d Frau vo Mermoz allerdings scho e bitz vorgwarnt het, dass si Schwierigkeite heig nach Chile z telifoniere, han ich mich scho bitz druff vorbereitet, die 22km z Fuess zruggzleege.

Nach 3 Stunde bi de Polizischte (die sind ganz nätt gsi sind - glaub au ganz froh, dass emol öber e bitz länger dört bliibt), bin ich denn uf die 3 am Noomidag losglaufe. Dr Wäg isch nid sonderlich asträngend gsi und guet 6 Stund schöter bin ich uf die 9i zoobe in Candelario Mansilla an dr chilenische Gränzstation akoh. Noch em Stämpel in Pass han ich uf ere Estancia am See dört übernachtet. Die älteri Frau isch sehr lieb gsi und het mir au grad no öbis z Nacht parat gmacht - ha doch ziemlig Hunger gha nach 6 Stund laufe mit em ganze Gepäck uf em Rucke...

Nid schlächt gstuunt han i bim Ablick vomene Puzzle wo im Wohnzimmer in däre Enstancia an dr Wand ghange isch: es zeigt Oberhofe am Thunersee (danke Julia fürs entschlüssle vom Rätsel). D Frau hets vor Joore emol in Coyhaique, dr nögschte Stadt 500km entfärnt kauft, um die lange Winteroobige e bitz z verkürze.

2 Mol pro Wuche (jewils am Samschtig und am Mittwoch kunnt e Katamaran vo Villa O Higgins verbi. Dä macht denn e Rundfahrt zue 2 Gletscher wo diräkt in See münde, bervors denn am 5i nomol in alegt um aschliessend wieder zrugg nach Villa O Higgins z fahre. An dämm Samschtig isch die Fahrt allerdings ussgfalle, do s z viel Wind gha het und dohär agäblig wäg de Isbäagäblig im Wasser z gföhrlig gsi wär. Somit isch s Schiff an dr Alegeschtell bliibe und d BEsatzig het sich e gmüetlige Tag gmacht (bi nid sicher, ob das mit de Isbärge wirklig stimmt - het glaub eher eifach zwenig Lüt gha). Uf jede Fall han ich mir denn dört amene Strand am See au e schöne Tag gmacht und e bitz gläse.

S Boot het sich denn doch no ziemlig mit Lüt gfüllt, vor allem viel Biker, wo uf däre Route unterwägs gsi sind - abäblich unter däne Kreise e guet bekannti Strecki, do si die ohni grossi Umwäg die Chilenischi Carretera Austral mit dr Argentinische Ruta 40 verbindet. Bemerkenswart isch dört vor allem es dütsches Ehepaar gsi wo au mit Bike und Zält unterwägs gsi isch - sind sie doch schätzigswies beidi um die 60 gsi - und für das Alter scho e ganz beachtlichi Leischtig - Chapeau!

Am 8i z oobe bin ich nach 3 Stunde Fahrt in Villa O Higgins akoh. Villa O Higgins isch dr letschti Ort im Süde vo Chile, wo momentan durch d Carretera Austral ershlosse isch und het öbbe 400 - 500 Iwohner, 2 kleini Supermercados, ca 4 oder 5 Guesthouses und e Aerodrómo wo sich grad näbem Dorf befindet und vor allem für Notfäll do isch. Usserdäm händ si e eigene FM Radiosänder (!).
Sit eim Joor händ si amene kleine Fluss e Kleikraftwärk mit 2 Turbine baut, wo s Dorf zueverlässig mit Strom versorgt. Vorhär hets agäblig nur zu gwüsse Zite vom Tag Strom gha - und das sehr unzuerverlässig - für die meischte vo uns wohrschinlig schwär vorstellbar. Busverbindige vo und nach Villa O Higgins gits 2 Mol wüchentlich am Mäntig und Mittwoch kunnt je e Bus a, wo denn am Zischtig und Donnschtig wieder nach Cochrane, em nögschte Ort an der Carreterra Austral (220km nördlich) zruggfahrt.

Soviel vorerscht zue Villa O Higgins. Ich bin im Momänt (10 Tag schpöter) immernoh uf dr Carretera Austral unterwägs, allerdings mehr als 800 km witer obe im Norde - das zeigt, wie wie lang die Strooss isch und wie "schnäll" me do öbbe vorwärts kunnt ;-) über mini Carretera Austral Erfahrige wird ich denn im nögschte Bricht einiges verzelle und au an Bilder zeige könne.

Bis denn wünsch ich allne Alles Gueti. BTW würds mi im Fall au Mol freue, vo euch öbbis z ghöre (und nid immer nur die gliche)
Ich weiss es goht uf d Fasnacht zue, aber genau dorum möcht me jo au e bitz wüsse was eso goht - Facts, Grüchtli & so witer & so fort ;-)

Hasta Luego.
Dani

---