Advertisement
Published: April 29th 2006
Edit Blog Post
Do das mit dr Besichtigung vomene Observatorium jo leider nid klappt hett, han ich mich entschiede, zämme mit minere momentane Reisegruppe witerzgo uf e dreitägigi Jeep Tour nach Bolivie durch d Atacama Wüeschti und dr Salar de Uyuni - dr bekannti Salzsee uf 3700m im Südweschte vo Bolivie. Am Donnschtig am 13. April am Morge am 8i sind mir miteme Micro (Kleibus) vo San Pedro abgfahre und in rund einehalb Stunde vo 2500m uf 4800m ufs Altiplano gfahre, wos an dr bolivische Gränze nach ere für Südamerika sehr legere Passkontrolle es letschts chilenischs Zmoorge gäh het - was uns ab sofort in Bolivie an Aesse erwarte duet, dass hett niemer vo uns gwüsst; mir händ alli 7 zum erschte Mol e Fuess in das Land gsetzt.
Noch em Ässe sind 2 Toyota Landcruiser Jeeps mit unserem Gepäck belade worde und mir händ unseri Fahrer und Guides, Dr Sandro und dr Javier kenneglernt. Mir sind im ganze 12 Lüt in 2 Fahrzüg gsi, was eächt komfortabel gsi isch zum fahre. Am erschte Tag hän mir zahlrichi Lagune besichtigt und in natürliche Hotsprings uf 5000m höchi es warms Bad chönne näh. Allerdings ischs ufstioh us em 37 Grad warme Wasser bi sowenig
Suurstoff in dr Luft es ziemlig interessants Erläbnis gsi. De meischte isch es ziemlig drümmlig bis schlächt worde und au ich, wo sunscht eigentlig no nie Problem mit dr Höchi gha ha, ha sehr langsam müesse ufstoh und us em Wasser go (viellicht hätte mir au kei Piscola sötte dringge im Pool).
Als nögschte Halt sin mir an Geysire cho. Ä sehr surreale Ort: gälbi Felse, graue Schlamm, Schwefelgruch, e unghüre Lärm - und überall zischts und blubberts 120 Grad heiss us em Bode use!
Gege die 3 am Nomidag sind mir im Refugio an dr Laguna Colorada acho wo mir au die erschti Nacht übernachte düend. Zerscht sind mir mit unsererm erschte bolivianische ässe überrascht worde: Wienerli und härdöpfelstock und Tomate und Gurkesalat - uf 4800m zmitts in dr Wüeschti wo nid emol die kleinschti Pflanze uffindbar isch.wohrschinlig isch d Höchi drfür verantwortlig gsi, dass ich grad für 3 Persone zuegschlage ha (s het au gnueg gha, do e paar us unsere Gruppe immerno s Bad in de heisse Quelle gschpürt het)
Nochere kleine Siesta sind mir denn zur 1km entfärnte Laguna gfahre wo mir zum Sunneuntergang Lamas und zigtuusigi vo Flamingos händ chönne beobachte.
Das Lama
... die sehen unglaublich dümmlich und herzig zugleich aus - ich habe hier ein neues Lieblingstier gefunden :) Unseri Refugio isch sehr eifach gstaltet gsi. Weder Wasser no Heizig isch vorhande gsi. Ich weiss nid wie kalt dass es znacht worde isch, aber ihr wüssed sicher alli, dass es in dr Wüeschti znacht amel sehr kalt cha wärde und au, dass es uf 4800m (ca. d Höchi vom Mont Blanc) Znacht sehr kalt cha wärde - und wenn me das Wüsse denn uf e Wüeschti uf 4800m Höchi bezieh duet, cha me viellicht öbbe e ahnig drvo becho. Zum Glück het jedes Bett dicki Lama Wulldeckene gha, aber ich bi trotzdäm sehr froh gsi dass ich au no mi Schloofsack drbigha ha - mit beidem zämme im Schloofrum mit 6 Lüt isch es so no knapp an dr Froschtgränze gsi. Drzue kunnt, dass es uf däre sowieso sehr schwierig isch, überhaupt z schloofe. Es het die ganzi Nacht tönt wie in dr Stärbeabteilig vomene Krankehuus - jede isch het regelmässig nach Luft gschnappt oder sunschtigi komischi Tön vo sich gäh. Aber schlussändlig hän mir alli überläbt und händ uns uf dr nögscht Tag gfreut, ganz nach em Moto "Its all part of the experience!"
Dr zweiti Tag het sich über die rieige Hochplateaus vom Altiplano hizooge; zahlrichi
Flamingos
in der Laguna Colorada; die Farbe des Wassers stammt von speziellen Algen Lagune in allne Farbe mit Flamingos, Lamas, groteski Steiformatione, 360 Grad Bärge in allne Farbe, drüber e paar Schneegipfel (d die ewigi Schneegränze isch öbbe bi 5500 bis 6000 Meter), Vulkän usw usf bis mir denn e bitz in tieferi Lage cho sind und mir durch die erschte bolivische Bärgdörfer cho sind. Denn Kulturschock. Mir Froge uns vo was die Lüt läbe. Gsehn Fälder wo si Getreide apflanze - mit 2 bis 3 vertrocknete Pflanze pro Fäld vo zig 10000 Quadratmeter. Mir sind immerno in Regione mit extrem wenig Räge und die Lüt händ fascht kei Wasser.
Alles was si händ sind Lamas (für Fleisch, Wulle und als Laschtetransportmittel). Die düend si au sehr verehre und mit luschtigem Schmuck beschänke.
Gege Oobe sind mir denn an unserem nögschte Tagesziel acho: Es Hotel us Salz am Rand vom Salar de Uyuni. Das Hotel isch wirklich komplett us Salz baut (bis uf d Innewänd vo Duschi und WC). Tisch und Stüehl, Better, alles isch us Salzplatte gmacht. Die Nacht also wieder nüt gsi mit süesse Träum, drfür han ich gschloofe wie e Ängeli, wohrschinlig nid nur wägem Salzbett, sondern au well mir do nur no uf 3700m sind und s au
nümm so kalt isch.
Am nögschte Morge sind mir am halb 5i ufgstande und am 5i am Morge abgfahre. Untereme stärneklare Nachthimmel sind mir mit unsere 2 Jeeps vom Land uf e Salar usegfahre. Dä Teil vom Salzsee isch zue däre Zit no ca 10-20cm unter Wasser gstande, wo dr wissi Salzbode im Mondliecht wiederspiegelt het - e unheimlichi Fahrt, speziell, wenn unseri Fahrer us Spass alli Liechter usmache und mit ca 50kmh durch das schimmrige Wasser brause. Nach ca einere Stund fahrt kömme mir zu dr Isla Pescado, enere kleine kaktusbewachsene Insle inmitte vom Salar. Do erläbe mir e sensationelle Sunneufgang überem Salar inmitte vo al däne groteske Katkeen. Aschliessend koche unseri Fahrer es guets Zmoorge mit Kaffi und Pancakes.Mir verwile no e bitz uf dr Insle, bzw. uf em Salzsee und mache e bitz Morgegymnastik mit Frisbeespiele (allzuviel Sport isch au uf 3700m no ziemlig entkräftigend)
Denn gohts witer quer übere Salar. Bi ne paar Stops gits Glägeheit für e paar Fotos in däre wältwit eimolige 'Land'schaft. Unter anderem Halte mir bimene andere Hotel us Salz wo zmitts im Salar stoht und mir finde nomol e Platz wo liecht unter Wasser stoht, was die ganzi Szene
El arbol de piedras
"Der Steinbaum" auf dem Altiplano zwischen dem Atacama Desert und dem Salar de Uyuni no viel verrückter macht (siehe Bild)
Uf e Mittag sind mir denn in Uyuni acho wo unseri Tour z änd gange isch. Uyuni isch e kleini Stadt am in dr Nöchi vom Salar wo einersitz vom Salzgwünn und anderersits vom Tourismus läbt. Do s uns dört aber nid bsunders gfalle het, sind mir mir denn nacheme kurze Mittagässe immerno alli 7 mit 2 Jeeps 5h witer südoschtwärts gfahre nach Tupiza wo mir erscht zoobe schpoot acho sind - ziemlig uf dr Schnuure nach däm 20 Stunde Tag. Sogar z müed zum dr Pris vo unserem sehr schöne Hotel mit Garte und Swimmingpool z realisiere - mis Einzelzimmer mit Bad und Zmoorgebuffet inklusive het umgrächnet 4 Franke koschtet! Welcome to Bolivia!
Advertisement
Tot: 0.144s; Tpl: 0.017s; cc: 14; qc: 63; dbt: 0.1148s; 1; m:domysql w:travelblog (10.17.0.13); sld: 1;
; mem: 1.2mb
Markus Frei (phw)
non-member comment
Sali Dani. Schön häsch d'Salar de Uyuni Tour chöne mache, die unwürklich Landschaft muen mir würklich gseh ha. Hoffentlich häsch d'Schueh nie agha im See, das cheibe Salzwasser löst nämlich bi vielne Schueh de Liehm. Wenn in Bolivie es paar Lüt gsehsch, wo fascht d'Solle verlüred, denn weisch, dass die au d'Salar de Uyuni Tour gmacht händ. Super Föteli übrigens, da möcht ich doch au grad weder ga. No witerhin viel Spass. Grüess Markus