Another day in San Francisco

---

Mir hän hüt tatsächlig bis am 8i könne usschlofe...!
Denn hän mir gaaaaanz lang mit Grosi, Nonno, Gotti Fabienne und em Oli 'telifoniert'. Isch scho super, wie toll das so goht!
Nach eme feine Zmorge inkl. Fuessballmatch sin mir Richtig Pier abegfahre und hän welle nach Alcatraz übere. Das könne mir au mache, allerdings erst ab em 5. August... Unglaublig wie usbuecht das isch!
So sin mir bim Fisherman's Wharf go luege, ob d'Seeleuie umme sin, aber nei, kei einzige het sich blicke loh.
Drfür het d'Felicia denn dörfe uf em Trampolin go gumpe und het zum Schluss tatsächlig e Salto gschafft...!
Nochane sin mir mittels Velo-Ritschka zum Ferry Building und dört uf e Spielplatz. Die zwei grosse vo uns hän Lust uf e Kaffi gha und zwar kei Pfütze und so isch d'Tanja über 20' bim Starbucks go astoh. Es isch UNGLAUBLIG, wie viel Lüt as es do in dere Stadt het!! Liggt's am Fyyrtyg vo gescht, oder dra as Samstig isch oder, dass ALLI momentan Ferie hän??? Mir wüsses nid!
Eigentlig hän mir denn no chli welle go shoppe und do grad e Cable Car Endstation um dr Egge umme gsi isch, sin mir dört ane gloffe. Und dört denn eimol meh Züüge worde vom gemütlige Schafftempo vo de Amis... Sie hän nämlig grad in einere Seelerueh d'Bremse vom Cable Car usgwächslet.
Wo das denn nach ere gfühlte Ewigkeit ändlig erledigt gsi isch, sin mir denn up and down San Francisco gfahre. Leider isch es nid die Strecki gsi, wo mir gmeint gha hän - denn au nach 3 Däg do, sin mir immer no völlig orientierigslos - und drum denn Richtig Hotel zrugg, zum go e Päuseli mache und grad no d'Verlängerig vom Match Holland gege Costa Rica z'luege.
Bevor mir denn zum go Znachtesse s'letschte Mol ins Getümmel vom Pier 39 sin, hän mir no ei/zwei Läde bsuecht und no paar Dollars in Umlauf brocht.
Morn verlöhn mir die Stadt mit gmischte Gfühl. Es isch e ydrüggligi Stadt mit vielne tolle und schöne Sache zum Gseh und Mache, aber es het au waaaaaahnsinnig viel Lüt, Autos und vor allem WIIIIIND!!
Morn fahre mir denn ca. 3h zum Yosemite Nationalpark, wo mir denn au drei Nächt wärde bliebe.
Euch en schöne Sunntig und e diggs Druggi

---