Seattle

---

Seattle

Das Wochenändi simmer in Seattle gsi. Am Samstig simer eifach chli goge sightseeing mache u si under anderem uf em Space Needle gsi. Das isch sone Turm womer uechan u de über alles ine gseht. Leider isch ds Wätter nanid ganz so super gsi womer uesii, aber mer het trotz Wolke die ganzi Skyline gseh. Es het de när o uftue u am Nami heimer ds schönste Wätter gha womer sich chan wünsche. Mir si de im Pine Market gsi, das isch de berüehmti Märt vo Seattle (de wos d Fische umeschüssed, damits schnäller geit). I dem Märt chamer so zimmli alles chaufe u es isch sehr interessant gsi die einzelne Sache chönne zgseh. Es het nur leider chli viu Lüüt gha. Sälbstverständlich simer de o im allererste Starbucks ever gsi, aber eigentli nur zum Föteli mache u Souvenir z chaufe, es isch nämmli vollgstopft gsi mit Lüüüt. Euses Kafi simmer de nöime andersch go trinke. Isch ja nid so schwierig hie en Coffeeshop z finde.

Am Sunntig simmer de im Premium Outlet chli usserhalb vo Seattle gsi. Mitem Car wärs eigentli nur en haub Stund ewäg, mit de ÖV heimer de aber zwöiehalb Stund bruucht… gueti Aschlüss si dert im Gägesatz zu Vancouver ur Schwiiz es Frömdwort, mer wartet prinzipiell scho mau en haub Stund uf dr nägsti Bus. Immerhin chostets fast nüüt (de Kafii während em warte isch türer als dr Bus…). Womer de im Premium Outlet acho sii heimers de chönne gniesse, dass alli Markeartikle zum ne absolut lächerliche Priis erhältlich sii u mir hei de dementsprächend viu Ziit derte verbracht u hei när irgendwie dopplet soviu Gepäck gha wie voräne…

In Seattle isch o scho fast Wiehnachte, Hotel hei gschmückti u belüchteti Wiehnachtsböim, u im Outlet heimer o en Lade gfunde wo voll isch mit Christmasdecoration… mer chönnt ja meine Haloween isch scho düre…

Seattle isch wirkli en Erfahrig wärt gsi, obwohls zwar nur öbbe drü Stund vo Vancouver ewäg isch mitem Car, isches unglaublich andersch u es het mini Vorurteil bezüglich Amerika eidütig bestätiget. Es het agfange bir Gränze, theoretisch hätte mer nid mau üsi Sandwich u Öpfle dörfe mitnää, aber mir hei sie erfolgriich verteidiget =) Und o die Formular womer muen usfülle si de absoluti Witz. Da frageds eim doch ernsthaft, ob mer beabsichtiget, ir USA en Terroraschlag oder sustigi Gwalt uszüebe… als wür mer das derte agää. U ds Beste findi ja immer na, dass mer muen zahle, wenn mer id USA wett ireise… aber trotz em warte u dr pingelige Tuerei ar Gränze simer de in Seattle acho u derte isch mer de ufgfalle, dass Vancouver viu schöner isch u dass ich niemals länger ir USA wett sii als zum Ferie mache. D Amerikaner si um einiges unfründlicher und ungsünder. S isch aso na schwierig einigermasse zahlbars Ässe zfinde, wo nid Fastfood isch. U wennd öbbis findsch, de isch en Starter scho so gross, dass es eigentlich en grosse Hauptgang isch… es si üs de o dementsprechend viu zimmli dicki Lüüt begägnet u i han mich einisch meh gfragt, wie mer so dick chan wärde…

I bin denn ämu froh gsi woni wieder zrügg in Vancouver gsi bin bi de fründliche Lüüt u dr schöne u moderne Gebäude. Seattle het nämmli teilwiis stark renovationsbedürftig usgseh.

Soviu News füre Momänt us Kanada,

Big hug u es liebs Grüessli,

Petra

---

Photos

Pine Market
I resisted...

Kids boot
chamer das ächt au als Handtäsche bruuche?