On the way to Springdale (Zion NP)

---

Am Morge isch doch tatsächlig dr Himmel blau gsi überem Bryce Canyon!
Mir hän no mit es paar liebe Lüt vo diheime telefoniert und sin denn los gfahre Richtig Zion Nationalpark (knapp 2h Fahrt).
Kurz vor em Ziel sin mir au scho in dä Nationalpark cho und es het eimol meh gewaltig usgseh!!
Mir hätte nie dänkt, as Stei so unterschiedlig usseh cha!
So hän mir scho diversi Foteli gmacht - zum Glück...
Denn obwohl das Städtli Springdale sehr härzig isch und vieli Lädeli und Restaurants z'biete het, hän mir uns entschiede scho ei Dag früehner nach Las Vegas z'go - denn dört könne mir sicher nomol chli meh mache, als do (vor allem für d'Felicia).
So hän mir denn vor em Ychecke do im Hotel en Ort mit WLAN gsuecht, damit mir unsere Ufenthalt in Vegas um ei Nacht hän könne verlängere. Nach dem das klappt gha het, sin mir in unsers Hotel und hän gseit, as mir morn scho wieder witer gönge. Die hän das voll easy gno und uns nur ei Nacht verrechnet...
Do mir jetzt numme hüt d'Glägeheit gha hän, zum dr Zion NP azluege, sin mir denn am Nomidag nomol los gfahre. Mir hän denn s'Auto parkiert gha und sin Richtig 'Canyon Overlook' los marschiert. Das isch zwar e Wäg vo numme ca. einere Meile (ei Wäg), doch do drby überwindet me ca. 100 Höhemeter und es wär bi uns als rot-wisse Bergwäg markiert... Denn es goht über Fels und Stei und drnäbe gohts steil ufe oder abe. D'Felicia isch wacker mit gloffe und het nur die letschte paar Meter nüm möge und dört denn päuselet, so dass z'erst öbber vo uns dr Usblick isch go gniesse und denn dr ander. Denn alles wieder abe und so sin mir nach ere Stund total verschwitzt bim Auto wieder acho (denn s'Thermometer het do wieder über 30 Grad azeigt gha).
So erstunts nid, as mir denn do im Hotel grad no in Pool hän müesse uns go abkiehle.
Denn sin mir go z'Nacht esse und hän tatsächlig uf em Wäg zrugg ins Hotel könne Kolibris bim Trinke beobachte - wild läbendi Kolibris wohlbemerkt!!
Jetzt freue mir uns scho fescht druf, morn nach Las Vegas z'go...
Euch schigge mir e diggs Druggi

---