Bryce Canyon

---

Wo mir hüt ufgstande sin, hän mir tatsächlig blaue Himmel gseh... Aber heiss isch es also au hüt nid gsi, knapp 18 Grad (und au am Nomidag nur knapp über 20 Grad).
Trotzdem aber: nüt wie los in B.C. Nationalpark!
Me cha do 18 Meile dr Kante entlang fahre und bi diverse Ussichtspünkt ahalte und die spezielle und unglaublige Steiformatione aluege!
Mir sin denn bis z'hinterst gfahre und hän denn es paar Mol aghalte und gstuunt.
Kurz bevor mir wieder bim Usgang acho sin, het's wieder afo blitze und donnere - was öbber vo uns gaaaar nid gärn het und so schnell wie möglig ins Auto zrugg het welle und denn ins Hotel...!
Im Hotel hän mir denn e Päuseli gmacht und sin uf die zwei e kleine Snack go neh.
Wo mir denn wieder use gluegt hän, het's tatsächlig ufghört gha rägne.
Drum hän mir uns entschiede, mit eme Rosswage es Stückli z'fahre. Chum isch aber die Fahrt los gange het's scho wieder afo schwarz wärde am Himmel und me het Blitz gseh und Donner ghört...
Drum rasch an d'Kante füüre, Wasserfall bewundere und rasch wieder retour - immerhin hän mir no zwei Antilope und es paar Reh gseh! Und denn het's afo 'schiffe' in Ströme!!
Pflotschnass und völlig durchfroore sin mir im Hotel acho und hän grad ganz heiss müesse go dusche, zum wieder einigermasse warm z'becho.
Go z'Nacht esse sin mir do im Hotel und do's eher e Masseabfertigung gsi isch und nid würklig fein, sin mir nid soooo begeisteret vo däm Hotel do...
Jänu, morn goht's witer Richtig Springdale und Zion Nationalpark. Mir hoffe uf e besseri Unterkunft und vor allem bessers Wetter!
Euch schigge mir e diggs Druggi

---